Jesu Khristu wativeta kubantfu baNefi, ngesikhatsi sicuku sibutsene ndzawonye eveni iNala, wabafundzisa; futsi wativeta kubo ngalendlela.
Ucala esehlukweni 11.
Sehluko 11
Babe ufakaza ngeNdvodzana Yakhe leTsandzekako—Khristu uyavela futsi umemetela ngenhlawulo yakhe—Bantfu beva emanceba etandleni kanye nasetinyaweni Takhe kanye naseluhlangotsini—Bayakhala batsi Hosana—Ubeka sobala luhlelo kanye nendlela yekubhabhatisa—Umoya wembango wadeveli—Imfundziso yaKhristu kutsi bantfu kufanele bakholwe futsi babhajatiswe baphindze bemukele Moya loNgcwele. Cishe ngemnyaka weNkhosi wa 34.
1 Manje kwenteka kutsi bekunesicuku lesikhulu lebesibutsene ndzawonye, sebantfu baNefi, batungelete lithempeli lebeliseveni iNala; bamangele baphindze batibuta lomunye nalomunye, bakhombisana lomunye kulomunye ingucuko lenkhulu nalemangalisako lebeseyentekile.
2 Futsi ngetulu kwaloko bebakhuluma ngalo Jesu Khristu, lobekuniketwe ngaye sibonakaliso ngekufa kwakhe.
3 Futsi kwenteka kutsi ngesikhatsi basakhuluma kanjalo lomunye nalomunye beva livi shengatsi belivela ezulwini; baphonsa emehlo abo yonkhe indzawo, ngoba bebangalicondzi lelolivi lebebaliva; futsi bekungasilo livi lebelikhahlabeta, noma livi lebelisetulu; noko nanoma bekulivi leliphansi lahlaba ekhatsi kulabo labaliva, kangangekutsi akubanga khona incenye yesicu semtimba wabo lesingatange sitfutfumale; yebo, labahlaba emphefumulweni lucobo, futsi lenta tinhlitiyo tabo kutsi titsintseke.
4 Futsi kwenteka kutsi baphindze baliva lelolivi, kodvwa abatange balicondze.
5 Baphindze baliva kwesitsatfu lelolivi, bavula tindlebe tabo kute balive; emehlo abo bekabheke lapho bekuchamuka ngakhona umsindvo walo; babuka ngekugcila ngasezulwini, lapho umsindvo bewuchamuka ngakhona.
6 Buka, kwesitsatfu balicondza lelolivi labebaliva; latsi kubo:
7 Bukani iNdvodzana yami leTsandzekako, lengitfokotako ngayo, lengidvumise libito lami ngayo—yiveni.
8 Futsi kwenteka, ngesikhatsi sebalicondza lelolivi babhekisa emehlo abo ngasezulwini; buka, babona iNdvodza yehla iphuma ezulwini; beyigcoke ingubo lemhlophe; yehlela phansi yema emkhatsini wabo; emehlo esicuku sonkhe ajika abuka kuyo, abatange balokotse bavule imilomo yabo; ngisho lomunye kulomunye, bebangati kutsi loku bekuchazani, ngoba bebacabanga kutsi bekuyingilosi leyo lebeyivele kubo.
9 Futsi kwenteka kutsi welulela sandla sakhe embili wakhuluma kubantfu watsi:
10 Bukani, NginguJesu Khristu, baphrofethi labafakaza ngaye kutsi uyawuta emhlabeni.
11 Bukani, ngikukhanya kanye nekuphila kwemhlaba; futsi nginatse kuleso sitja lesibabako Babe langinike sona, futsi ngimdvumisile Babe ngekutfwala tono temhlaba, ngaloko ngivumele intsandvo yaBabe kuto tonkhe tintfo kusukela ekucaleni.
12 Futsi kwenteka kutsi ngesikhatsi Jesu sekawakhulumile lamavi sicuku sonkhe sawela phansi; ngoba besikhumbula kutsi bekuphrofethiwe emkhatsini wabo kutsi Khristu uyawutibonakalisa kubo emvakwekwenyukela kwakhe ezulwini.
13 Futsi kwenteka kutsi iNkhosi yakhuluma kubo yatsi:
14 Sukumani nite ngaphambili kimi, kute nifake tandla tenu eluhlangotsini lwami, niphindze nive emanceba etipikili etandleni tami kanye nasetinyaweni tami, kute nati kutsi nginguNkulunkulu waka-Israyeli, kanye naNkulunkulu wemhlaba wonkhe, futsi ngibulawelwe tono temhlaba.
15 Futsi kwenteka kutsi sicuku saya ngaphambili, safaka tandla taso eluhlangotsini lwakhe, bativa tibati tetipikili etandleni takhe kanye nasetinyaweni takhe; loku bakwenta, baya ngaphambili ngamunye nangamunye bate baya bonkhe ngaphambili, babona ngemehlo abo baphindze beva nangetandla tabo, bati ngekweliciniso baphindze baba nebufakazi, kutsi bekunguye, lokwabhalwa ngaye baphrofethi, kutsi uyawuta.
16 Ngesikhatsi bonkhe sebahambile baya ngaphambili futsi sebatibonele ngekwabo, bakhala ngelivi linye, batsi:
17 Hosana! Libusisiwe libito laNkulunkulu Longetulu Kwako Konkhe! Futsi bawela etinyaweni taJesu, bamdvumisa.
18 Futsi kwenteka kutsi wakhuluma kuNefi (ngoba Nefi bekasemkhatsini wesicuku) futsi wamyaleta kutsi ete ngaphambili.
19 Nefi wasukuma waya ngaphambili, waguca phambikweNkhosi waphindze watanga tinyawo tayo.
20 INkhosi yamyaleta kutsi asukume. Wabese uyasukuma wema phambi kwayo.
21 INkhosi yatsi kuye: Ngikunika emandla ekutsi uyawubabhabhatisa labantfu emvakwekube sengiphindze ngenyukela ezulwini.
22 Yaphindza iNkhosi yabita labanye, yasho nakubo kanjalo; yabanika emandla ekubhabhatisa. Yatsi kubo: Niyawubhabhatisa ngalendlela; akuyikubakhona kuphikisana emkhatsini wenu.
23 Ngicinisile ngitsi kini, noma ngubani lophendvukako etonweni takhe ngenca yemavi enu, aphindze afise kubhajatiswa egameni lami, niyawubabhabhatisa ngalendlela—Bukani, niyawukwehlela phansi nime emantini, futsi niyawubabhabhatisa egameni lami.
24 Manje bukani, lawa ngemavi leniyawuwasho, nibabita ngemagama, nitsi:
25 Ngeligunya lengilinikwe nguJesu Khristu, ngiyakubhabhatisa egameni laBabe, neleNdvodzana, kanye nelaMoya loNgcwele. Amen.
26 Emvakwaloko niyawubacwilisa emantini, niphindze nibakhiphe emantini.
27 Ngalendlela niyawubhabhatisa egameni lami; ngoba bukani, ngicinisile ngitsi kini, Babe, neNdvodzana, kanye naMoya loNgcwele bamunye; ngikuBabe, naBabe ukimi, futsi Babe kanye nami simunye.
28 Njengoba nginiyaletile niyawubhabhatisa ngaleyondlela. Akuyuba khona kuphikisana emkhatsini wenu, njengoba bekusolo kubakhona kute kube manje; noma kube khona kuphikisana emkhatsini wenu mayelana nemaphuzu emfundziso yami, njengoba bekusolo kukhona kute kube manje.
29 Ngoba ngicinisile, ngicinisile ngitsi kini, lonemoya wembango akusiye wami, kodvwa wadeveli, longubabe wembango, futsi uphehla tinhlitiyo tebantfu kutsi tibange ngelulaka, kulomunye nalomunye.
30 Bukani, lena akusiyo imfundziso yami, kuphehla tinhlitiyo tebantfu ngelulaka, lomunye avukele lomunye; kepha ngunayi imfundziso yami, kutsi tintfo letinjena kufanele tiyekelwe.
31 Bukani, ngicinisile, ngicinisile, ngitsi kini, ngitawubeka ngalokusobala imfundziso yami.
32 Lena yimfundziso yami, yimfundziso babe langinike yona; ngifakaza ngaBabe, naBabe ufakaza ngami, futsi Moya loNgcwele ufakaza ngaBabe kanye nangami; ngiyafakaza kutsi Babe uyaleta bonkhe bantfu, yonkhe indzawo, kutsi baphendvuke baphindze bakholwe kimi.
33 Loyo lokholwa kimi, aphindze abhajatiswe, nguye loyo loyawusindziswa; ngibo labo futsi labayawudla lifa lembuso waNkulunkulu.
34 Loyo longakholwa kimi; aphindze angabhajatiswa, uyawulahlwa.
35 Ngicinisile, ngicinisile, ngitsi kini, lena yimfundziso yami, futsi ngifakaza ngayo kutsi ivela kuBabe; noma ngubani lokholwa kimi ukholwa nakuBabe; kuye Babe uyawufakaza ngami, ngoba uyawumvakashela ngemlilo kanye naMoya loNgcwele.
36 Futsi ngaleyondlela Babe uyawufakaza ngami, naMoya loNgcwele uyawufakaza kuye ngaBabe kanye nangami; ngoba Babe, nami, kanye naMoya loNgcwele simunye.
37 Ngiyaphindza ngitsi kini, kufanele niphendvuke, niphindze nibe njengemntfwana lomncane, nibhajatiswe egameni lami, ngoba ngaphandle kwaloko ayikho lenye indlela leningatfola ngayo letintfo.
38 Ngiyaphindza ngitsi kini, kufanele niphendvuke, niphindze nibhajatiswe egameni lami, nibe njengemntfwana lomncane, noma ngaphandle kwaloko angeke nikwati kudla lifa lembuso waNkulunkulu.
39 Ngicinisile, ngicinisile, ngitsi kini, lena yimfundziso yami, futsi loyo lowakhela etikwaloku wakhela etikwelidvwala lami, futsi emasango esihogo angeke ababulala.
40 Loyo loyawumemetela lokucishe kufane naloku, aphindze akumise njengemfundziso yami, loyo uvela ebubini, futsi akakhi etikwelidvwala lami; kodvwa wakhele etikwesisekelo lesisihlabatsi, futsi emasango esihogo avulekile kwemukela labanjalo ngesikhatsi kufika tikhukhula kanye nemimoya seyishaya kubo.
41 Ngaloko-ke, hambani niye kulaba bantfu, nimemetele lamavi lengiwakhulumile, kute kube sekugcineni kwemhlaba.