Sehluko 17
Jesu uyala bantfu kutsi bazindle ngemavi Akhe futsi bathandazele kuwacondza—Uphilisa labagulako babo—Uthandazela bantfu, asebentisa lulwimi lolungeke lubhalwe—Tingilosi tiyabasebentela futsi umlilo utungeleta bantfwana babo. Cishe ngemnyaka weNkhosi wa 34.
1 Buka kwenteka kutsi ngesikhatsi Jesu sekawakhulumile lamavi waphindze wabuka esicukwini, watsi kubo: Bukani, sikhatsi sami sesifikile.
2 Ngiyabona kutsi nibutsakatsaka, nekutsi ngeke niwacondze onkhe lamavi lengiyaletwe nguBabe kutsi ngiwakhulume kini ngalesi sikhatsi.
3 Ngako-ke, hambani niye emakhaya enu, futsi nizindle ngetintfo lengitishito, nicele kuBabe, egameni lami, kute nicondze, futsi nilungise tingcondvo tenu tilungele likusasa, futsi ngitawuphindze ngite kini.
4 Kodvwa manje sengiya kuBabe, futsi etikwaloko ngiyawutibonakalisa etiveni letilahlekile taka-Israyeli, ngoba atikalahleki kuBabe, ngoba yena uyati kutsi watiyisa ngakuphi.
5 Futsi kwenteka kutsi ngesikhatsi Jesu sekakhulumile kanjalo, waphindze waphonsa emehlo akhe esicukwini, buka bese bakhala, babuka kuye ngekugcila shengatsi bebatamcela kutsi ahlale nabo sikhashana lesidze.
6 Watsi kubo: Bukani, tibilini tami tigcwele sihawu ngani.
7 Ninabo yini labagulako emkhatsini wenu na? Baletseni la. Ninabo yini labatishosha, labatimphumphutse, noma labachutako, labakhubatekile, labanebulephelo, labo labafe tinhlangotsi, labatimungulu, noma labo labeva buhlungu noma ngayiphi indlela na? Baletseni la kute ngitawubelapha, ngoba nginesihawu ngani; tibilini tami tigcwele umusa.
8 Ngoba ngiyabona nifisa kutsi nginitjengise kutsi ngentani kubomnakenu eJerusalema, ngoba ngiyabona kutsi lukholo lwenu lwenele kutsi nginelaphe.
9 Futsi kwenteka kutsi ngesikhatsi sekakhulume kanjalo, sonkhe sicuku, kanye kanye, saya ngaphambili, labagulako babo nalabeva buhlungu, labatishosha, timphumphutse, kanye nabo bonkhe labebeva buhlungu noma ngayiphi indlela; futsi wabelapha bonkhe ngamunye ngesikhatsi baletfwa ngaphambili kuye.
10 Bonkhe, labo labebalashiwe kanye nalabo labebaphila, baguca phansi etinyaweni takhe, bamkhonta; futsi ngebuningi balabo labebeta esicukwini bamanga tinyawo takhe, kangangekutsi batimantisa tinyawo takhe ngetinyembeti tabo.
11 Futsi kwenteka kutsi wabayaleta kutsi baletse bantfwana babo labancane.
12 Ngako-ke babaletsa bantfwana babo labancane babahlalisa phansi bamtungeleta, Jesu wema emkhatsini; sicuku savula indlela bate bonkhe baletfwa kuye.
13 Futsi kwenteka kutsi ngesikhatsi bonkhe sebaletsiwe, naJesu sekeme emkhatsini, wayaleta sicuku kutsi siguce phansi.
14 Futsi kwenteka kutsi ngesikhatsi sebaguce phansi, Jesu wabubula ngekhatsi kwakhe, watsi: Babe ngikhatsatekile ngenca yebubi bebantfu bendlu yaka-Israyeli.
15 Futsi ngesikhatsi sekashito lamavi, naye lucobolwakhe waguca phansi; buka wathandaza kuBabe, tintfo latikhuluma ngeke tibhalwe, futsi sicuku sakufakazela loko labo labamuva.
16 Futsi bafakaza ngalendlela: Liso alikate likubone loku, noma indlebe ayikate ikuve loku, ngaphambili, tintfo letinkhulu futsi naletimangalisako kangaka ngesikhatsi sibona futsi siva Jesu atikhuluma kuBabe;
17 Futsi kute lulwimi lolungatikhuluma, kute umuntfu longatibhala, noma kute tinhlitiyo tebantfu letingaticabanga tintfo letinkhulu futsi naletimangalisa kangaka ngesikhatsi sibona siphindze siva Jesu atikhuluma; futsi kute namunye longayicabanga intfokoto leyagcwala imiphefumulo yetfu ngesikhatsi simuva asikhulekela kuBabe.
18 Futsi kwenteka kutsi ngesikhatsi Jesu sekacedzile kuthandaza kuBabe, wasukuma; kodvwa beyiyinkhulu kakhulu intfokoto esicukwini kangangekutsi senganywa.
19 Futsi kwenteka kutsi Jesu wakhuluma kubo, wabacela kutsi basukume.
20 Basukuma, futsi watsi kubo: Nibusisiwe ngenca yelukholo lwenu. Manje bukani, intfokoto yami igcwele.
21 Futsi ngesikhatsi sekawashito lamavi, wakhala, sicuku sakufakazela loko, waphindze watsatsa bantfwana babo labancane, ngamunye nangamunye, wababusisa, futsi wabathandazela kuBabe.
22 Futsi ngesikhatsi sekakwentile loku waphindze wakhala;
23 Wakhuluma esicukwini, watsi kuso: Bukani bantfwana benu.
24 Futsi ngesikhatsi bacalata kutsi babone baphonsa emehlo abo ezulwini, babona emazulu avuleka, babona tingilosi tehla tiphuma ezulwini shengatsi betisekhatsi emlilweni; tehlela phansi taphindze tatungeleta labo bantfwana, batungeletwa ngemlilo; tingilosi tabasita.
25 Sicuku sabona saphindze seva futsi sakufakazela loku; futsi bayati kutsi bufakazi babo buliciniso ngoba bonkhe ngamunye batibonela baphindze bativela, wonkhe umuntfu ngekwakhe; bebasibalo lesingangetinkhulungwane letimbili kanye nemakhulu lasihlanu ebantfu; futsi kuso bekukhona emadvodza, besifazane kanye nebantfwana.