Sehluko 18
Jesu usungula sidlo seNkhosi emkhatsini wemaNefi—Bayaletwa kutsi bathandaze ngaso sonkhe sikhatsi egameni Lakhe—Labo labadla umtimba Wakhe baphindze banatse ingati Yakhe ngalokungakafaneli bayalahlwa—Bafundzi baniketwa emandla ekuniketa Moya loNgcwele. Cishe ngemnyaka weNkhosi wa 34.
1 Futsi kwenteka kutsi Jesu wayaleta bafundzi bakhe kutsi baletse kuye sinkhwa kanye neliwayini.
2 Ngesikhatsi basahambile kuyawulandza sinkhwa neliwayini, wayaleta sicuku kutsi sihlale phansi.
3 Ngesikhatsi bafundzi sebafikile nesinkhwa kanye neliwayini, wasitsatsa sinkhwa wasihlephula waphindze wasibusisa; futsi wanika bafundzi wase ubayaleta kutsi basidle.
4 Emvakwekutsi sebasidlile futsi sebesutsi, wabayaleta kutsi banike sicuku.
5 Ngesikhatsi sicuku sesidlile futsi sesutsa, watsi kubafundzi: Bukani kuyawubakhona munye emkhatsini wenu loyawugcotjwa, futsi ngitawumnika emandla ekutsi uyawuhlephula sinkhwa asibusise bese usinika bantfu belibandla lami, kubo bonkhe labo labayawukholwa baphindze babhajatiswe egameni lami.
6 Futsi loku niyawucaphela ngaso sonkhe sikhatsi kutsi niyakwenta, njengoba nami ngentile, ngisho njengoba ngisihlephulile sinkhwa, ngasibusisa ngaphindze nganinika sona.
7 Futsi loku niyawukwenta kute nikhumbule umtimba wami, lenginitjengise wona. Futsi kuyawuba bufakazi kuBabe kutsi nihlale ningikhumbula njalo. Futsi uma ningikhumbula njalo Moya wami uyawuba nani njalo.
8 Futsi kwenteka kutsi ngesikhatsi sekawashito lamavi, wayaleta bafundzi bakhe kutsi batsatse liwayini kuyo indzebe balinatse, nekutsi banike sicuku kute naso ngalokunjalo silinatse.
9 Futsi kwenteka kutsi benta njalo, balinatsa benela, base banika sicuku, naso salinatsa, senela.
10 Ngesikhatsi bafundzi sebakwentile loku, Jesu watsi kubo: Nibusisiwe ngalentfo leniyentile, ngoba loku kugcwalisa imiyaleto yami, futsi loku kufakazela kuBabe kutsi nitimisele kwenta loko lenginiyalete ngako.
11 Futsi loku niyawukwenta njalo kulabo labaphendvukako baphindze babhajatiswe egameni lami; futsi niyawukwenta kukhumbula ingati yami, lengayicitsela nine, kute nifakaze kuBabe kutsi niyangikhumbula njalo. Futsi uma ningikhumbula njalo Moya wami uyawukuba nani njalo.
12 Futsi ngininika umyaleto wekutsi nitente letintfo. Uma niyawutenta njalo letintfo nibusisiwe, ngoba nakhelwe etikwelidvwala lami.
13 Kodvwa noma ngubani na emkhatsini wenu loyawukwenta lokucishe kufane naloku akakhi etikwelidvwala lami, kodvwa wakhele esisekelweni lesisihlabatsi; futsi uma imvula yehla, netikhukhula tifika, nemimoya ihhusha, ishaya etikwabo, bayawukuwa, nemasango esihogo asavele avulekile kubemukela.
14 Ngako-ke nibusisiwe uma niyawuyigcina imiyaleto yami, Babe langiyalete kutsi ngininike yona.
15 Ngicinisile, ngicinisile, ngitsi kini, kufanele nicaphele niphindze nithandaze njalo, hleze nilingwe ngudeveli, niholelwe ekutfunjweni nguye.
16 Futsi njengoba ngithandazile emkhatsini wenu nani ngalokunjalo kumele nithandaze ebandleni lami, emkhatsini webantfu bami labo labaphendvukako baphindze babhajatiswe egameni lami. Bukani ngikukhanya; nginibekele sibonelo.
17 Futsi kwenteka kutsi ngesikhatsi Jesu sekawakhulumile lamavi kubafundzi bakhe, waphindze wagucukela esicukwini watsi kuso:
18 Bukani, ngicinisile, ngicinisile, ngitsi kini, kufanele nicaphele niphindze nithandaze njalo hleze ningene ekulingweni; ngoba Sathane ufisa kunibamba, kute anihlunge njengakolo.
19 Ngako-ke kufanele nithandaze njalo kuBabe egameni lami;
20 Futsi noma ngabe yini leniyawuyicela kuBabe egameni lami, lelungile, nikholwa kutsi niyawuyitfola, bukani niyawuniketwa yona.
21 Thandazani emindenini yenu kuBabe, njalo egameni lami, kute bafati benu kanye nebantfwana benu babusiswe.
22 Bukani, niyawuhlangana ndzawonye njalo; futsi ningavimbeli namunye umuntfu kutsi ete kini uma nihlangene ndzawonye, kodvwa bavumeleni kutsi bete kini ningabavimbeli;
23 Kodvwa niyawubathandazela, ningabakhipheli ngaphandle; futsi nangabe beta kini njalo niyawubathandazela kuBabe, egameni lami.
24 Ngako-ke, phakamisani sibane senu kute sikhanye emhlabeni. Bukani ngikukhanya leniyawukuphakamisa—loko leningibone ngikwenta. Bukani niyabona kutsi ngithandaze kuBabe, futsi nonkhe nikufakazele.
25 Futsi niyabona kutsi nginiyalete kutsi kubete namunye wenu lohambako, kodvwa esikhundleni saloko nginiyalete kutsi nite kimi, kute nive niphindze nibone; nani niyawukwenta kanjalo-ke emhlabeni; futsi loyo lophula lomyaleto utivumela kutsi aholelwe ekulingweni.
26 Manje kwenteka kutsi ngesikhatsi Jesu sekawakhulumile lamavi, waphindze wagucula emehlo akhe wawabhekisa kubafundzi labekabakhetsile, watsi kubo:
27 Bukani, ngicinisile, ngicinisile, ngitsi kini, ngininika lomunye umyaleto, emvakwaloko kumele ngiye kuBabe kute ngigcwalise leminye imiyaleto langinike yona.
28 Manje bukani, ngulona umyaleto lengininika wona, wekutsi ningavumeli muntfu nibe nati kutsi adle umtimba kanye nengati yami ngalokungakafaneli, ngesikhatsi niwubusisa;
29 Ngoba loyo lodla aphindze anatse umtimba wami kanye nengati yami ngalokungakafaneli udla futsi unatsa kwehlulelwa emphefumulweni wakhe; ngako-ke uma nati kutsi umuntfu akafaneli kutsi adle aphindze anatse umtimba nengati yami nibomvimbela.
30 Noko, ningamkhipheli ngephandle emkhatsini wenu, kodvwa niyawumfundzisa niphindze nimthandazele egameni lami; nangabe uyaphendvuka aphindze abhajatiswe egameni lami, niyawumemukela, niphindze nimuphe umtimba wami kanye nengati yami.
31 Kodvwa uma angaphendvuki angeke abalwe kanye nebantfu bami, kute angonisi bantfu bami, ngoba bukani ngiyatati timvu tami, futsi tibaliwe.
32 Noko, angeke nimkhiphele ngaphandle kwemasinagoge enu, noma etindzaweni tenu tekukhonta, ngoba kulabanjalo niyawuchubeka nekubafundzisa; ngoba anati kutsi bayawubuya nini futsi baphendvuke, bete kimi ngenhloso lephelele yenhlitiyo, futsi ngiyawubelapha, niyawuba yindlela yekuletsa insindziso kubo.
33 Ngako-ke, gcinani lamavi lenginiyalete ngawo kute ningangeni ekwehlulelweni; ngoba maye kuloyo Babe lamehlulelako.
34 Futsi ngininika lemiyaleto ngenca yetimphikiswano lebetikhona emkhatsini wenu. Futsi nibusisiwe uma nite timphikiswano emkhatsini wenu.
35 Manje sengiyahamba ngiya kuBabe, ngoba kufanele kutsi ngihambe ngiye kuBabe ngenca yenu.
36 Futsi kwenteka kutsi ngesikhatsi Jesu sekente siphetfo salamavi, watsintsa ngesandla sakhe bafundzi labekabakhetsile, ngamunye nangamunye, wate wabatsintsa bonkhe, akhuluma nabo ngesikhatsi abatsintsa.
37 Sicuku asiwevanga emavi labekawakhuluma, ngako-ke asizange sikufakazele loko; kodvwa bafundzi bakufakazela kutsi wabanika emandla ekunika Moya loNgcwele. Futsi ngitawunikhombisa emvakwaloku kutsi lombhalo uliciniso.
38 Futsi kwenteka kutsi ngesikhatsi Jesu sekabatsintsile bonkhe, kweta lifu lambonya sicuku kangangekutsi asizange sisambona Jesu.
39 Ngesikhatsi sisembonyiwe wesuka kubo, wenyukela ezulwini. Bafundzi bambona baphindze bakufakazela kutsi waphindze wenyukela ezulwini.