Sehluko 19
Bafundzi labalishumi nakubili bafundzisa bantfu baphindze bathandazela kuba naMoya loNgcwele—Bafundzi bayabhajatiswa baphindze batfola Moya loNgcwele kanye nekusetjentelwa tingilosi—Jesu uyathandaza usebentisa emavi langeke abhalwe—Ufakaza ngelukholo lolukhulu lwalamaNefi. Cishe ngemnyaka weNkhosi wa 34.
1 Manje kwenteka kutsi ngesikhatsi Jesu sekenyukele ezulwini, sicuku sahlakateka, futsi nguleyo naleyo ndvodza yatsatsa umfati wayo kanye nebantfwana bayo yabuyela ekhaya layo.
2 Futsi kwabikwa kuto tonkhe tindzawo ngekushesha emkhatsini webantfu, ngaphambi kwekutsi kube mnyama, kutsi sicuku sibone Jesu, nekutsi bekabasebentele, nekutsi bekayawutiveta ngakusasa esicukwini.
3 Yebo, ngisho busuku bonkhe kwabikwa kuto tonkhe tindzawo mayelana naJesu; kangangekutsi batfumela kubantfu kutsi babe baningi, yebo, sibalo lesikhulu kakhulu, sasebenta kakhulu bonkhe lobo busuku, kute ngakusasa babe sendzaweni lapho Jesu bekayawutiveta khona esicukwini.
4 Futsi kwenteka kutsi ngakusasa, ngesikhatsi sicuku sesibutsene ndzawonye, buka, Nefi kanye nemnakabo lobekamvuse ekufeni, libito lakhe lobekunguThimothi, nendvodzana yakhe, libito layo lobekunguJona, kanjalo naMathonayi kanye naMathoniha, umnakabo, naKhumeni, Khumenohayi, kanye naJeremiya, naShemnoni, Jona, Sedekiya, kanye na-Isaya—manje lawa bekungemagama ebafundzi Jesu labekabakhetsile—futsi kwenteka kutsi baya phambili bema ekhatsi kwesicuku.
5 Buka, sicuku besisikhulu kakhulu kangangekutsi benta kutsi sehlukaniswe ngetincumbi letilishumi nakubili.
6 Labalishumi nakubili basifundzisa sicuku; futsi buka, benta kutsi sicuku siguce phansi, sithandaze kuBabe egameni laJesu.
7 Bafundzi nabo bathandaza kuBabe egameni laJesu. Futsi kwenteka kutsi basukuma babasita bantfu.
8 Emvakwekutsi sebawafundzisile lawo mavi Jesu labekawakhulumile—bangaphambuki nakancane emavini aJesu labekawakhulumile—buka, baphindze baguca bathandaza kuBabe egameni laJesu.
9 Bakuthandazela loko labebakufisa kakhulu; futsi bebafisa kutsi baniketwe Moya loNgcwele.
10 Emvakwekutsi sebathandazile ngaleyondlela bahamba behlela entansi elusebeni lwemanti, sicuku sabalandzela.
11 Futsi kwenteka kutsi Nefi wahamba wehlela entansi emantini wabese uyabhajatiswa.
12 Waphuma emantini wabese ucala kubabhabhatisa. Wababhabhatisa bonkhe labo Jesu labekabakhetsile.
13 Futsi kwenteka kutsi ngesikhatsi bonkhe sebabhajatisiwe futsi sebaphumile nasemantini, Moya loNgcwele wehlela etikwabo, bagcwaliswa ngaMoya loNgcwele kanye nangemlilo.
14 Buka, batungeletwa ngulokungatsi ngumlilo; wehla uvela ezulwini, sicuku sakubona loku, saphindze sakufakazela; tingilosi tehlela phansi tiphuma ezulwini futsi tabasita.
15 Futsi kwenteka kutsi ngesikhatsi tingilosi tisabasita bafundzi, buka, Jesu weta wema emkhatsini wabasebentela.
16 Futsi kwenteka kutsi wakhuluma kuso sicuku, wasiyaleta kutsi siphindze siguce phansi, kanjalo nekutsi bafundzi bakhe baguce phansi.
17 Futsi kwenteka kutsi ngesikhatsi bonkhe sebaguce phansi, wayaleta bafundzi bakhe kutsi bathandaze.
18 Buka, bacala kuthandaza; bathandaza kuJesu, bambita ngeNkhosi yabo kanye naNkulunkulu wabo.
19 Futsi kwenteka kutsi wesuka waphuma emkhatsini wabo, wahamba libangana nje wakhwesha kubo waphindze waguca, watsi:
20 Babe, ngiyakubonga kutsi ubanikile Moya loNgcwele laba lengibakhetsile; futsi kungenca yelukholo lwabo kimi kutsi ngibakhetsile emhlabeni.
21 Babe, ngiyakucela kutsi ubanike Moya loNgcwele bonkhe labo labayawukholwa emavini abo.
22 Babe, ubanike Moya loNgcwele ngenca yekutsi bakholwa kimi; futsi uyabona kutsi bayakholwa kimi ngenca yekutsi uyabeva, bathandaza kimi; futsi bathandaza kimi ngoba nginabo.
23 Manje Babe ngiyabathandazela kuwe, futsi kanjalo nabo bonkhe labo labayawukholwa emavini abo, kute nabo bakholwe kimi, kute ngibe kubo njengoba nawe, Babe, ukimi, kute sibe munye.
24 Futsi kwenteka kutsi ngesikhatsi Jesu sekathandaze kanjalo kuBabe, weta kubafundzi bakhe, buka, bebasachubeka, bangayekeli, kuthandaza kuye; abatange baphindzaphindze emagama lamaningi, ngoba bebaniketiwe kutsi bathandazele ini, futsi bebagcwaliswe ngenshisekelo.
25 Futsi kwenteka kutsi Jesu wababusisa ngesikhatsi bathandaza kuye; buso bakhe bamamatseka etikwabo, kukhanya kwebuso bakhe kwakhatimula etikwabo, buka baba mhlophe njengebuso nanjengetingubo taJesu; buka bumhlophe babo bebendlula bonkhe bumhlophe, yebo, bekute lutfo emhlabeni lebeyingaba mhlophe njengebumhlophe babo.
26 Jesu watsi kubo: Chubekani nithandaze: futsi abatange bayekele kuthandaza.
27 Waphindza wafulatsela kubo, wahamba libangana wabese uyaguca; waphindze wathandaza kuBabe, watsi:
28 Babe, ngiyakubonga kutsi sewubahlambululile labo lengibakhetsile, ngenca yelukholo lwabo, ngiyabathandazela, kanjalo nalabo labayawukholwa emavini abo, kutsi nabo bahlanjululwe kimi, ngekukholwa emavini abo, ngisho nanjengoba nabo bahlanjululiwe kimi.
29 Babe, angithandazeli umhlaba, kodvwa labo longinike bona labasemhlabeni, ngenca yelukholo lwabo, kute bahlanjululwe kimi, kute ngibe kubo njengoba nawe, Babe, ukimi, kute sibe munye, kute ngidvunyiswe kubo.
30 Ngesikhatsi Jesu sekawakhulumile lamavi waphindza futsi weta kubafundzi bakhe; buka bathandaza kuye ngalokujulile, ngaphandle kwekuyekela; waphindza wamamatseka kubo; buka baba mhlophe, ngisho njengaJesu.
31 Futsi kwenteka kutsi waphindza wahamba libangana lelidze nje wathandaza kuBabe;
32 Lulwimi ngeke luwakhulume emavi lawakhuluma, noma abhalwe ngumuntfu emagama lawakhuluma.
33 Sicuku samuva saphindze sakufakazela loko; tinhlitiyo tabo tavuleka baphindze bawacondza etinhlitiyweni tabo lamavi lawakhuluma.
34 Noko, bekamakhulu kakhulu aphindze amangalisa emavi lawakhuluma kangangekutsi angeke abhalwe, noma ashiwo ngumuntfu.
35 Futsi kwenteka kutsi ngesikhatsi Jesu sekacedzile kuthandaza waphindze weta kubafundzi bakhe, watsi kubo: Lukholo lolukhulu kangaka angikate ngilubone emkhatsini wawo onkhe emaJuda; ngaloko-ke angikwatanga kuwakhombisa timangaliso letinkhulu kangaka, ngenca yekungakholwa kwawo.
36 Ngicinisile ngitsi kini, kute namunye wabo lowake wabona tintfo letinkhulu kangaka njengoba nine nitibonile; noma beve tintfo letinkhulu kanje njengoba nine nitivile.