1 Manje kwenteka kutsi umnyaka wemashumi layimfica nakunye wasewendlulile futsi kwasekuyiminyaka lengemakhulu lasitfupha kusukela ngesikhatsi Lehi ashiya eJerusalema; Kwakungumnyaka lapho Lakhoniyasi abengumehluleli lomkhulu kanye nembusi welive.

2 Futsi Nefi, indvodzana yaHilamani, besekesukile eveni laseZarahemla, anike indvodzana yakhe Nefi umyalo, lobekayindvodzana yakhe lendzala, mayelana nabongcwengcwe belitfusi, kanye nayo yonkhe imibhalo lebeyigciniwe, nato tonkhe leto tintfo letatigcinwe tingcwele kusukela ekusukeni kwaLehi eJerusalema.

3 Emvakwaloko wesuka eveni, kutsi waya kuphi, kute umuntfu lowatiko; futsi indvodzana yakhe Nefi yayigcina imibhalo esikhundleni sakhe, yebo, umbhalo walabantfu.

4 Futsi kwenteka kutsi ekucaleni kwemnyaka wemashumi layimfica nakubili, buka, tiphrofetho tebaphrofethi tacala kugcwaliseka ngalokugcwele; ngoba kwacala kwaba khona tibonakaliso letinkhulu kanye netimangaliso letentekako emkhatsini webantfu.

5 Kodvwa bekukhona labanye labacala batsi sikhatsi sesendlulile sekutsi emavi agcwaliseke, labekakhulunywe nguSamuweli, umLamani.

6 Bacala kutfokota ngalokuphatselene nabomnakabo, batsi: Bukani sikhatsi sesendlulile, futsi nemavi aSamuweli akagcwaliseki; ngako-ke, kujabula kwenu kanye nelukholo lwenu mayelana nalentfo bekulite.

7 Futsi kwenteka kutsi benta siphitsiphitsi lesikhulu kulo lonkhe live; nebantfu labebakholwa bacala baba nelusizi lolukhulu, hleze ngandlela tsite leto tintfo letatikhulunyiwe tingenteki.

8 Kodvwa buka, balugadzisisa lolo suku nalobo busuku kanye nalolo suku lolwaluyawuba njengelusuku lunye kube shengatsi kute busuku, kute bati kutsi lukholo lwabo belungakabi lite.

9 Manje kwenteka kutsi bekunelusuku lolwabekwa eceleni ngulabangakholwa, kutsi bonkhe labo labakholelwa kulawo masiko kumele babulawe ngaphandle kwekutsi lesibonakaliso senteke, lesasinikwe nguSamuweli umphrofethi.

10 Manje kwenteka kutsi ngesikhatsi Nefi, indvodzana yaNefi, abubona lobubi bebantfu bakhe, inhlitiyo yakhe yaba nelusizi lolukhulu.

11 Futsi kwenteka kutsi wahamba waphumela ngaphandle waguca phansi, wakhala kakhulu kuNkulunkulu wakhe akhalela bantfu bakhe, yebo, labo labesebatawubulawa ngenca yelukholo lwabo emasikweni aboyise.

12 Futsi kwenteka kutsi wakhala kakhulu eNkhosini lonkhe lolo suku; futsi buka, livi leNkhosi lefika kuye, latsi;

13 Phakamisa inhloko yakho ume sibindzi, ngoba buka, sikhatsi sesifikile, futsi kulobu busuku sibonakaliso sitawuniketwa, kusasa ngiyeta emhlabeni, kutawukhombisa umhlaba kutsi ngitakugcwalisa konkhe loko lengente kutsi kukhulunywe ngemlomo webaphrofethi bami labangcwele.

14 Buka, ngita kubami, kutawugcwalisa tonkhe tintfo lengitembule kubantfwana bebantfu kusukela ekusekelweni kwemhlaba, nekutawukwenta intsandvo, yaBabe neyeNdvodzana—yaBabe ngenca yami, neyeNdvodzana ngenca yenyama yami. Futsi buka, sikhatsi sesifikile, futsi ngalobu busuku sibonakaliso sitawuniketwa.

15 Futsi kwenteka kutsi lawo mavi lefika kuNefi agcwaliseka, njengoba bekakhulunyiwe, ngoba buka, ngekushona kwelilanga abutange bube khona bumnyama; nebantfu bacala kumangala ngoba abutange bube khona bumnyama ngesikhatsi kufika busuku.

16 Futsi kwabakhona labaningi, labebangatange bawakholwe emavi ebaphrofethi, labawela phansi kwaba shengatsi bafile, ngoba bati kutsi lisu lelikhulu lembubhiso lebebalakhele labo labebakholelwa emavini ebaphrofethi laselivinjelwe; ngoba sibonakaliso lesasimenyetelwe sase sifikile.

17 Futsi bacala kwati kutsi iNdvodzana yaNkulunkulu besekufanele ivele masinyane; yebo; kwephetsa, bonkhe bantfu emhlabeni wonkhe kusukela enshonalanga kuya emphumalanga, eveni lelisenyakatfo kanye naseveni leliseningizimu, bamangala kakhulu kangangekutsi bawela phansi.

18 Ngoba bebati kutsi baphrofethi bebafakazile ngaletintfo iminyaka leminingi, nekutsi lesibonakaliso lesasiniketiwe sasesifikile; bacala kwesaba ngenca yebubi babo kanye nekungakholwa kwabo.

19 Futsi kwenteka kutsi abutange bube khona bumnyama kubo bonkhe lobo busuku, kodvwa kwakukhanya shengatsi kusemini, Futsi kwenteka kutsi lilanga laphindze laphuma ekuseni, njengalokwetayelekile; futsi bati kutsi bekulusuku lolo iNkhosi lebeyitawutalwa ngalo, ngenca yalesibonakaliso lesasiniketiwe.

20 Futsi tasetentekile, yebo, tonkhe tintfo, ngako konkhe, njengekwemavi ebaphrofethi.

21 Futsi kwaphindze kwenteka kutsi inkhanyeti lensha yavela, njengekwelivi.

22 Futsi kwenteka kutsi kusukela ngalesi sikhatsi kuya phambili kwacala kwaba khona emanga labekakhulunywa emkhatsini webantfu, nguSathane, kute atente lukhuni tinhlitiyo tabo, ngemetamo yekutsi bangakholelwa kuleto tibonakaliso kanye netimangaliso labebatibonile; kodvwa nanoma kwakungalawamanga kanye nenkhohliso incenye lenkhulu yebantfu yakholwa, yaphindze yaphendvukela eNkhosini.

23 Futsi kwenteka kutsi Nefi abehamba emkhatsini walabantfu, nalabanye labaningi, babhabhatisela ekuphendvukeni, lokwenta kutsi kube nekutsetselelwa kwetono. Ngalesi sizatfu bantfu bacala futsi baba nekuthula eveni.

24 Kwababete imibango, ngaphandle nje kwalabambalwa labacala kushumayela, betama kubonisa ngemibhalo lengcwele kutsi sasingekho sidzingo sekutsi bagcine umtsetfo waMosi. Manje kuloku bebaphambuka, ngoba bebangayicondzi imibhalo lengcwele.

25 Kodvwa kwenteka kutsi ngekushesha baphendvuka, futsi banetiseka ngeliphutsa lebebakulo, ngoba batiswa kutsi lomtsetfo wawusengakagcwaliseki, nekutsi bekufanele ugcwaliseke ngako konkhe; yebo, livi lefika kubo kutsi kufanele ugcwaliseke; yebo, kutsi kwakungeke kwendlule ngisho liganyana linye noma lichashatana linye kute konkhe kugcwaliseke; ngako-ke ngawo kanye lowo mnyaka baletfwa ekulatini liphutsa labo futsi bawavuma emaphutsa abo.

26 Wendlula kanjalo-ke umnyaka wemashumi layimfica nakubili, uletsa tindzaba letimnandzi kubantfu ngenca yaleto tibonakaliso lebesetentekile, njengekwemavi esiphrofetho sabo bonkhe baphrofethi labangcwele.

27 Futsi kwenteka kutsi umnyaka wemashumi layimfica nakutsatfu nawo ngalokunjalo wendlula ngekuthula, ngaphandle nje kwetigebengu taGadiyanthoni, letatihlala etintsabeni, letatigcwele live; ngoba taticinile tincaba tato kanye netindzawo tato letifihlekile kangangekutsi bantfu bebangakhoni kutincoba; ngako-ke tabulala kakhulu, tenta kusontsana lokuningi emkhatsini webantfu.

28 Futsi kwenteka kutsi ngemnyaka wemashumi layimfica nakune tacala tandza kakhulu, ngenca yekutsi bekukhona emahlubuka lamaningi emaNefi labekabalekela kuto, lokwabanga lusizi lolukhulu kulawo maNefi labekasele eveni.

29 Ngetulu kwaloko kwaba khona sizatfu selusizi lolukhulu emkhatsini wemaLamani; ngoba buka, bekanebantfwana labaningi labakhula baba nemandla eminyakeni, bacala kutimela, baholelwa ngulabanye labebangemaZoramu, ngemanga abo kanye nangemavi abo ekuyengana, bahlanganyela naleto tigebengu taGadiyanthoni.

30 Ngaleyondlela emaLamani nawo ahlushwa, acala kwehla elukholweni lwawo kanye nasekulungeni, ngenca yebubi besitukulwane lesasisakhula.