1 Futsi kwenteka kutsi wayaleta sicuku kutsi siyekele kuthandaza, kanjalo nebafundzi bakhe. Wabayaleta kutsi bangayekeli kuthandaza etinhlitiyweni tabo.

2 Waphindze wabayaleta kutsi basukume beme ngetinyawo tabo. Basukuma bema ngetinyawo tabo.

3 Futsi kwenteka kutsi waphindze wahlephula sinkhwa wasibusisa, wase usiniketa bafundzi bakhe kutsi badle.

4 Ngesikhatsi sebadlile wabayaleta kutsi bahlephule sinkhwa, bese basinika sicuku.

5 Ngesikhatsi sebasinikile sicuku waphindze wabanika liwayini kutsi banatse, wabayaleta kutsi banike sicuku.

6 Manje, bekute sinkhwa, noma liwayini, lebekuletfwe bafundzi, noma sicuku;

7 Kodvwa ngempela wabanika sinkhwa kute badle, kanjalo neliwayini kute banatse.

8 Watsi kubo: Loyo lodla lesinkhwa udla umtimba wami emphefumulweni wakhe; kanjalo naloyo lonatsa leliwayini unatsa ingati yami emphefumulweni wakhe; futsi umphefumulo wakhe angeke ulambe noma wome, kodvwa uyawugcwaliswa.

9 Manje, ngesikhatsi sonkhe sicuku sesidlile saphindze sanatsa, buka, sagcwaliswa ngaMoya; sakhala ngelivi linye, saniketa ludvumo kuJesu, labebambona futsi bamuva.

10 Futsi kwenteka kutsi ngesikhatsi bonkhe sebalunikile ludvumo kuJesu, watsi kubo: Bukani manje sengiyawucedzela umyaleto Babe langiyalete ngawo mayelana nalabantfu, labayinsali yendlu yaka-Israyeli.

11 Niyakhumbula kutsi ngikhulumile kini, ngatsi uma emavi a-Isaya sekagcwaliseka—bukani abhaliwe, ninawo phambi kwenu, ngako-ke wahlolisiseni—

12 Futsi ngicinisile, ngicinisile, ngitsi kini, ngesikhatsi sekagcwaliseka ngaleso sikhatsi kuyawube sekukugcwaliseka kwesivumelwano Babe lasenta kubantfu bakhe, Awu, nine bendlu yaka-Israyeli.

13 Futsi ngaleso sikhatsi insali, leyiyawube ihlakatekile ngephandle emhlabeni wonkhe, iyawugcogcwa emphumalanga kanye nasenshonalanga, eningizimu kanye nasenyakatfo; iholelwe ekuyatini iNkhosi Nkulunkulu wabo, lebahlengile.

14 Futsi Babe ungiyalete kutsi ngininike lelive, libe lifa lenu.

15 Ngitsi kini, uma beTive bangaphendvuki emvakwesibusiso labayawusitfola, emvakwekutsi sebahlakate bantfu bami—

16 Ngaleso sikhatsi nine, leniyinsali yendlu yaka-Jakobe, niyawuhamba niye emkhatsini wabo; niyawuba semkhatsini walabo labayawube babaningi; futsi niyawuba semkhatsini wabo njengelibhubesi emkhatsini wetilwane tasehlatsini, nanjengeliwundlu lelibhubesi emkhatsini wemhlambi wetimvu, lokutsi, uma lidzabula emkhatsini wato litinyatsele phansi liphindze litidzabule tibe ticucu, kube kute namunye longatikhulula.

17 Sandla sakho siyawuphakanyiselwa titsa takho, futsi tonkhe titsa takho tiyawubulawa.

18 Ngiyawubutsela ndzawonye bantfu bami njengemuntfu abutsisa titfungo takhe phansi.

19 Ngoba ngiyawukwenta bantfu bami Babe lente sivumelwano nabo, yebo, ngiyawukwenta luphondvo lwenu lube yinsimbi, ngiphindze ngente tinselo tenu tibe litfusi. Futsi niyawucotfula bantfu labaningi; ngiyawunikela inzuzo yabo eNkhosini, kanye nemcebo eNkhosini yemhlaba wonkhe. Bukani nginguye lokwentako loko.

20 Futsi kuyawukwenteka, kusho Babe, kutsi inkemba yekulunga kwami iyawulengela etikwabo ngalolo suku; futsi ngaphandle kwekutsi baphendvuke iyawuwela etikwabo, kusho Babe, yebo, nasetikwato tonkhe tive tebeTive.

21 Futsi kuyawukwenteka kutsi ngiyawubabeka bantfu bami, Awu nine bendlu yaka-Israyeli.

22 Bukani, labantfu ngiyawubabeka kulelive, kugcwalisa sivumelwano lengasenta nababe wakho Jakobe; futsi liyawuba yiJerusalema Lensha. Nemandla asezulwini ayawuba emkhatsini walabantfu; yebo, nami ngiyawuba semkhatsini wabo.

23 Bukani, nginguye loyo Mosi lakhuluma ngaye, atsi: INkhosi Nkulunkulu wenu iyawunivusela umphrofethi kubomnakenu, lonjengami; yena niyawumlalela kuto tonkhe tintfo layawutisho kini. Futsi kuyawukwenteka kutsi wonkhe muntfu longeke amlalele loyo mphrofethi uyawususwa emkhatsini webantfu.

24 Ngicinisile ngitsi kini, yebo, bonkhe baphrofethi kusukela kuSamuweli kanye nalabo labalandzela muva, ngebuningi babo labakhulumile, bafakazile ngami.

25 Bukani, nibantfwana bebaphrofethi; futsi nibendlu yaka-Israyeli; nibesivumelwano Babe lasenta neyihlo, atsi ku-Abrahama: Ngentalelwane yakho yonkhe imindeni yemhlaba iyawubusiswa.

26 Babe ungivusele kini kucala, waphindze wangitfuma kutsi ngitawunibusisa ngekunikhipha loyo naloyo aphume ebubini bakhe; loku kungenca yekutsi nibantfwana besivumelwano—

27 Emvakwekube senibusisiwe Babe uyawusigcwalisa sivumelwano lasenta na-Abrahama, lesitsi: Ngentalelwane yakho yonkhe imindeni yemhlaba iyawubusiswa—ekutfululeleni Moya loNgcwele ngami kubeTive, lokusibusiso kubeTive lesiyawubenta babe nemandla etikwako konkhe, ekuhlakateni bantfu bami, Awu nine bendlu yaka-Israyeli.

28 Futsi bayawuba luhlupho kubantfu balelive. Noko, uma sebalemukele livangeli lami leliphelele, ngaleso sikhatsi uma bayawutenta lukhuni tinhlitiyo tabo ngalokumelene nami ngiyawububuyisela bubi babo etikwabo, kusho Babe.

29 Futsi ngiyawusikhumbula sivumelwano lengisente nebantfu bami; ngente sivumelwano nabo kutsi ngiyawubabutsela ndzawonye ngesikhatsi sami lesifanele, nekutsi ngiyawuphindze ngibanike live laboyise libe lifa labo, lokulive laseJerusalema, lokulive lesetsembiso kubo ingunaphakadze, kusho Babe.

30 Futsi kuyawukwenteka kutsi sikhatsi siyeta, lapho livangeli lami leliphelele liyawushunyayelwa kubo;

31 Futsi bayawukholwa kimi, kutsi nginguJesu Khristu, iNdvodzana yaNkulunkulu, bayawuthandaza kuBabe egameni lami.

32 Ngaleso sikhatsi balindzi babo bayawuphakamisa emavi abo, ngelivi linye bayawuhlabelela; ngoba bayawutibonela ngewabo emehlo.

33 Ngaleso sikhatsi Babe, uyawuphindze ababutsele ndzawonye, abanike iJerusalema kube live lelilifa labo.

34 Ngaleso sikhatsi bayawuhlokoma ngentfokoto batsi—Hlabelelani kanyekanye, nine tindzawo letitindzala taseJerusalema; ngoba Babe ubadvudvutile bantfu bakhe, uyihlengile iJerusalema.

35 Babe uwembulile umkhono wakhe longcwele emehlweni etive tonkhe; yonkhe imikhawulo yemhlaba iyawuyibona insindziso yaBabe; futsi Babe nami simunye.

36 Ngaleso sikhatsi kuyawukwenteka loko lokubhaliwe: Vuka, vuka futsi umbatse emandla, Awu Siyoni; yembatsa tembatfo takho letinhle, Awu Jerusalema, dolobha lelingcwele, ngoba kusukela manje angeke kuphindze kungene kuwe labangakasoki nalabangcolile.

37 Titsintsitse elutfulini; sukuma, hlala phansi, Awu Jerusalema; tikhulule etinketaneni letisentsanyeni yakho, Awu ndvondzakati letfunjiwe yaseSiyoni.

38 Ngoba naku lokushiwo yiNkhosi: Nititsengise ngelite, futsi niyawuhlengwa ngaphandle kwemali.

39 Ngicinisile, ngicinisile, ngitsi kini, bantfu bami bayawulati libito lami; yebo, ngalolo suku bayawukwati kutsi ngimi lowakhuluma..

40 Ngaleso sikhatsi bayawutsi: Tinhle kangakanani etintsabeni tinyawo taloyo loletsa tindzaba letimnandzi kubo, lomemetela kuthula; loletsa tindzaba letimnadzi kubo tekulunga, lomemetela insindziso; lotsi kuyo iSiyoni: Nkulunkulu wakho uyabusa!

41 Ngaleso sikhatsi simemetelo siyawuvakala sitsi: Sukani, sukani, hambani niphume lapha, ningatsintsi lutfo lolungcolile; phumani emkhatsini wakhe; nitihlambulule nine leniphatsa titja teNkhosi.

42 Ngoba angeke niphume ngekushesha noma niphume ngekubaleka; ngoba iNkhosi iyawuhamba embikwenu, Nkulunkulu wema-Israyeli uyawuba ngumvikeli wenu wangasemuva.

43 Bukani, inceku yami iyawuphumelela; iyawuphakanyiswa idvunyiswe futsi ibe setulu kakhulu.

44 Njengoba labaningi bamangala ngawe—buso bayo babuhliphikile kakhulu, kwendlula bonkhe bantfu, nesimo sayo sasonakele kwendlula onkhe emadvodzana ebantfu—

45 Ngako iyawuchela tive letiningi; emakhosi ayawuvala imilomo yawo ngenca yayo, ngoba loko labangazange batjelwe kona bayawukubona; naloko labangazange bakuve bayawukucondza.

46 Ngicinisile, ngicinisile, ngitsi kini, tonkhe letintfo tiyawukwenteka ngempela, nanjengoba Babe angiyaletile. Ngaleso sikhatsi lesivumelwano Babe lavumelene ngaso nebantfu bakhe siyawugcwaliseka; ngaleso sikhatsi iJerusalema iyawuphindze ibe nebantfu bami, futsi iyawuba live lelilifa labo.