Sehluko 22
Ngetinsuku tekugcina, iSiyoni kanye netikhonkhwane tayo kuyawusungulwa, na-Israyeli utawugcogcwa ngesihawu kanye nangebumnene—Batawuncoba—Catsanisa na-Isaya 54. Cishe ngemnyaka weNkhosi wa 34.
1 Futsi ngaleso sikhatsi loko lokubhaliwe kuyawukwenteka: Hlabela, Awu nyumba, wena longatalanga; hlokoma uhlabele, memeta kakhulu, wena longazange sewuhelwe; ngoba baningi bantfwana balolahliwe kunebemfati loshadile, kusho iNkhosi
2 Yandzisa indzawo yelithende lakho, yendlala tindvwangu telithende lakho; ungatibambi, yelula tintsambo takho, ucinise tikhonkhwane takho;
3 Ngoba utawulendlalela esandleni sangesekudla kanye nesangesencele, futsi intalelwane yakho iyawubatfola njengelifa beTive yente emadolobha latindzala abe nalabahlala kuwo.
4 Ungesabi, ngoba angeke ube nemahloni; noma wehliswe, ngoba angeke ubekwe ehlazweni; ngoba utawulikhohlwa lihlazo lebusha bakho, futsi angeke usawakhumbula emahloni ebusha bakho, kanjalo angeke usawakhumbula emahloni ebufelokati bakho nanini.
5 Ngoba umenti wakho, yindvodza yakho, iNkhosi yemaBandla libito lakhe; uMhlengi wakho, loNgcwele waka-Israyeli—Nkulunkulu wemhlaba wonkhe uyawubitwa kanjalo
6 Ngoba iNkhosi ikubite njengewesifazane lolahliwe nalodzabukile emoyeni, kanye nemfati lomncane, ngesikhatsi lapho aliwa, kusho Nkulunkulu wakho.
7 Ngoba kwesikhashana nje ngikushiyile, kodvwa ngesihawu lesikhulu ngiyawukubuyisa.
8 Ngentfukutselo lencane ngakufihlela buso bami kwesikhashana, kodvwa ngemusa waphakadze ngiyawuba nesihawu kuwe, kusho iNkhosi uMhlengi wakho.
9 Ngoba loku, kunjengemanti aNowa kimi, ngoba njengoba ngifungile kutsi emanti a-Nowa angeke aphindze awumbonye umhlaba, ngako-ke sengifungile kutsi angeke ngiphindze ngikutfukutselele.
10 Ngoba tintsaba tingesuswa kanye nemagcuma esuswe, kodvwa umusa wami angeke wesuswe kuwe, noma sivumelwano sami sekuthula sisuswe, kusho iNkhosi lenesihawu kuwe.
11 Awu wena lohlushiwe, loshaywa tivunguvungu, ungadvudvutwa! Buka, ngiyawukwakha ngematje akho lanemibala lemihle, ngakhe tisekelo takho ngemasafire.
12 Ngiyawukwakha emafasitelo akho ngemarubi, kanye nemasango akho ngematje lamanyatelako, kanye nato tonkhe tibondza takho ngematje laligugu.
13 Bonkhe bantfwana bakho bayawufundziswa yiNkhosi; kuyawuba kukhulu kuthula kwebantfwana bakho.
14 Uyawubekwa ekulungeni, uyawuba khashane nekubuswa ngelunya ngoba angeke wesabe, kanye neluvalo angeke lusondzele edvute nawe.
15 Buka, nakanjani bayawuhlangana ndzawonye ngalokumelene nawe, ngekuphikisana nami; loyo loyawuhlangana ndzawonye ngalokumelene nawe uyawuwa ngenca yakho.
16 Buka, ngimi lowadala umbumbi wetinsimbi lovutsela emalahle kutsi abe ngemalangabi, ente sikhali silungele umsebenti waso; futsi ngimi lowadala umbhubhisi kutsi abhubhise.
17 Kute sikhali lesilolelwe kulwa nawe lesiyawuphumelela; futsi lonkhe lulwimi loluyawukwetfuka likwehlulele uyawulibeka licala. Leli lifa letinceku teNkhosi, futsi kulunga kwabo kuvela kimi, kusho iNkhosi.