1 Futsi kwenteka kutsi ngesikhatsi bafundzi baJesu bahamba bashumayela tintfo labebativile nalabebatibonile, bebabhabhatisa egameni laJesu, kwenteka kutsi bafundzi babutsana ndzawonye baphindze bahlanganyela emthandazweni kanye nasekuzileni lokukhulu.

2 Jesu waphindze wativeta kubo, ngoba bebathandaza kuBabe egameni lakhe; Jesu weta wema emkhatsini wabo, watsi kubo: Nifuna kutsi ngininikeni na?

3 Batsi kuye: Nkhosi, sifuna kutsi usitjele libito lesitawubita ngalo lelibandla; ngoba kunekuphikisana emkhatsini webantfu mayelana naloludzaba.

4 INkhosi yatsi kubo: Ngicinisile, ngicinisile, ngitsi kini, kuya ngani kutsi bantfu bavungame baphindze baphikisane ngenca yalentfo na?

5 Abayifundzanga yini imibhalo lengcwele, letsi kufanele nibitwe ngelibito laKhristu, lekulibito lami na? Ngoba niyawubitwa ngalelibito ngelusuku lwekugcina;

6 Loyo lobitwa ngelibito lami, aphindze abeketele kute kube sekugcineni, nguye loyo loyawusindziswa ngelusuku lwekugcina.

7 Ngako-ke, noma ngabe yini leniyawuyenta, niyawuyenta egameni lami; ngako-ke niyawulibita libandla ngelibito lami; futsi niyawubita Babe egameni lami kute alibusise libandla ngenca yami.

8 Lingaba libandla lami kanjani ngaphandle kwekutsi libitwe ngelibito lami na? Ngoba uma libandla libitwa ngelibito laMosi uma kunjalo lilibandla laMosi; noma uma libitwa ngelibito lemuntfu uma kunjalo lilibandla lemuntfu; kodvwa uma libitwa ngelibito lami uma kunjalo lilibandla lami, nangabe lakhelwe etikwelivangeli lami.

9 Ngicinisile ngitsi kini, nine nakhelwe etikwelivangeli lami; ngako-ke niyawukwetsa noma ngabe yini leniyetsako, ngelibito lami; ngako-ke uma nibita Babe, kute kuzuze libandla, uma kusegameni lami Babe utawuniva.

10 Nangabe libandla lakhelwe etikwelivangeli lami kanjalo Babe uyawukhombisa imisebenti yakhe kulo.

11 Kodvwa uma lingakakhelwa evangelini lami, lakhelwe emisebentini yebantfu, noma emisebentini yadeveli, ngicinisile ngitsi kini banenjabulo ngemisebenti yabo kwesikhashana, emvakwesikhashana siphetfo siyeta, futsi bagawulelwa phansi baphindze baphonswe emlilweni, lapho sekute kubuya.

12 Ngoba imisebenti yabo iyabalandzela, ngoba kungenca yemisebenti yabo kutsi bagawulelwe phansi; ngako-ke khumbulani tintfo lenginitjele tona.

13 Bukani ngininikile livangeli lami, futsi leli livangeli lengininike lona—kutsi ngeta emhlabeni kutowenta intsandvo yaBabe, ngoba Babe angitfumile.

14 Babe wangitfuma kute ngiphakanyiselwe esiphambanweni; emvakwekutsi sengiphakanyiselwe esiphambanweni, kute ngidvonsele bonkhe bantfu kimi, kutsi njengoba ngaphakanyiselwa etulu bantfu kanjalo nebantfu bayawuphakanyiswa nguBabe, kute beme phambi kwami, kute behlulelwe ngekwemisebenti yabo, noma ngabe mihle noma ngabe mibi—

15 Ngalesizatfu ngiphakanyiselwe etulu; ngako-ke, ngekwemandla aBabe ngitawubadvonsela kimi bonkhe bantfu, kute behlulelwe ngekwemisebenti yabo.

16 Futsi kuyawukwenteka, kutsi noma ngubani lophendvukako aphindze abhajatiswe egameni lami uyawugcwaliswa; uma abeketela kute kube sekugcineni, buka, ngitawumtfola angenacala phambi kwaBabe ngalolo suku lapho ngiyawukuma kute ngehlulele umhlaba.

17 Loyo longabeketeli kute kube sekugcineni, nguye kanye loyo loyawujutjwa aphindze aphonswe emlilweni, lapho angeke asabuya nanini, ngenca yekulunga kwaBabe.

18 Ngilo leli livi laliniketa bantfwana bebantfu. Ngenca yalesi sizatfu uyawagcwalisa emavi lawaniketa, futsi akacambi emanga, kodvwa uwagcwalisa onkhe emavi akhe.

19 Futsi kute intfo lengcolile lengangena embusweni wakhe; ngako-ke kute intfo lengena ekuphumuleni kwakhe ngaphandle kwalabo labahlante tingubo tabo engatini yami, ngenca yelukholo lwabo, kanye nekuphendvuka etonweni tabo tonkhe, kanye nekwetsembeka kwabo kute kube sekugcineni.

20 Manje lona ngumyaleto: Phendvukani, nonkhe mikhawulo yemhlaba, nite kimi niphindze nibhajatiswe egameni lami, kute ningcweliswe ngekwemukelwa nguMoya loNgcwele, kute nime ningenasici ngaphambi kwami ngelusuku lwekugcina.

21 Ngicinisile, ngicinisile, ngitsi kini, livangeli lami leli; futsi niyatati tintfo lekufanele nitente ebandleni lami; ngoba imisebenti lenibone ngiyenta nani ngalokunjalo niyawuyenta; ngoba loko leningibone ngikwenta loko nani niyawukwenta;

22 Ngako-ke, uma nenta letintfo nibusisiwe, ngoba niyawuphakanyiswa ngelusuku lwekugcina.

23 Tibhaleni tintfo lenitibonile naphindze nativa, ngaphandle kwaleto letingakavunyelwa.

24 Yibhaleni imisebenti yalabantfu, leyawukwenteka, njengoba ibhaliwe, ngaloko lokwentekile.

25 Ngoba bukani, kuleto tincwadzi letibhaliwe, kanye naleto letiyawubhalwa, labantfu bayawukwehlulelwa ngato, ngoba imisebenti yabo iyawukwembulwa kubantfu ngato.

26 Bukani, tonkhe tintfo tibhaliwe nguBabe; ngako-ke etincwadzini letiyawubhalwa umhlaba uyawukwehlulelwa ngato.

27 Yatini kutsi niyawuba behluleli balabantfu, ngekwesehlulelo lengiyawuninika sona, lesiyawube silungile. Ngako-ke, kufanele nibe bantfu labanjani na? Ngicinisile ngitsi kini, njengami.

28 Manje sengiyahamba ngiya kuBabe. Futsi ngicinisile ngitsi kini, noma ngabe ngutiphi tintfo leniyawuticela kuBabe egameni lami niyawuniketwa tona.

29 Ngako-ke, celani, niyawuphiwa; nconcotsani, niyawuvulelwa; ngoba loyo locelako, uyaphiwa; naloyo lonconcotsako, uyawuvulelwa.

30 Manje, bukani, intfokoto yami yinkhulu, kangangoba igcwele, ngenca yenu, kanjalo nalesitukulwane; yebo, ngisho naBabe uyatfokota, kanjalo nato tonkhe tingilosi letingcwele, ngenca yenu kanye nalesi situkulwane; ngoba kute namunye wabo lolahlekile.

31 Bukani, ngifuna kutsi nicondze; ngoba ngisho labo labaphilako manje balesi situkulwane; kute namunye wabo lolahlekile; futsi ngenca yabo nginenjabulo legcwele.

32 Kodvwa bukani, ngiyadzabuka ngenca yesitukulwane sesine kusukela kulesi situkulwane, ngoba bona baholelwa khashane ekutfunjweni nguye njengayo indvodzana yekulahlwa; ngoba bayawungitsengisa ngesiliva kanye neligolide, nangaloko lokuyoboliswa ngumvunya kanye naloko emasela langafohla akwebe. Futsi ngalolosuku ngiyawubahambela, ngisho nangekuguculela imisebenti yabo etikwetinhloko tabo.

33 Futsi kwenteka kutsi ngesikhatsi Jesu sekacedzile kusho letinkhulumo watsi kubafundzi bakhe: Ngenani esangweni lelincane; ngoba lincane lisango, futsi ingumntjuntju nendlela leholela ekuphileni, bancane labayitfolako; kodvwa libanti lisango, iphindze ivulekile indlela leholela ekufeni, futsi baningi labahamba ngayo, kute kufike busuku, lapho kungeke kusasebenta muntfu khona.