Sehluko 28
Bafundzi labayimfica kulabalishumi nakubili bayafisa futsi batsenjiswa lifa embusweni waKhristu uma bafa—EmaNefi lamatsatfu ayafisa aphindze aniketwa emandla etikwekufa kute ahlale emhlabeni Jesu ate aphindze abuye—Ayatsatfwa aphindze abona tintfo letatingakavunyelwa kutsi tikhulunywe, kungumanje ayasita emkhatsini webantfu. Cishe ngemnyaka weNkhosi wa 34 kuya kuwa 35.
1 Futsi kwenteka kutsi ngesikhatsi Jesu sekawashito lamavi, wakhuluma kubafundzi bakhe, ngamunye nangamunye, watsi kubo: Yini leniyifisa kimi, emvakwekube sengihambile ngaya kuBabe?
2 Bonkhe bakhuluma, ngaphandle kwalabatsatfu, batsi: Sifisa kutsi emvakwekutsi sesihleli sate sefika eminyakeni lebhekekile yekukhula kwemuntfu, kutsi bufundisi betfu, losibitele kubo, bufike esiphetfweni, kute site kuwe ngekushesha embusweni wakho.
3 Watsi kubo: Nibusisiwe ngoba nifisa lentfo kimi; ngako-ke, emvakwekutsi senineminyaka lengemashumi lasikhombisa nakubili budzala niyawukuta kimi embusweni wami; niphindze nitfole kuphumula kanye nami.
4 Emvakwekutsi sekakhulumile kubo, wagucukela kulabo labatsatfu, watsi kubo: Nine nifisa kutsi nginenteleni, uma sengihambile ngaya kuBabe na?
5 Badzabuka etinhlitiyweni tabo, ngoba abazange balokotse bayikhulume kuye leyontfo lebebayifisa.
6 Watsi kubo: Bukani, ngiyayati imicabango yenu, nifise leyontfo Johane, lotsandziwe wami, lobekanami ebufundisini bami, ngaphambi kwekutsi ngibetselwe ngemaJuda, layifisa kimi.
7 Ngako-ke, nibusiswe kakhulu nine, ngoba angeke nikuve kufa; kodvwa niyawuphila nite nibone tonkhe tento taBabe kubantfwana bebantfu, kute kugcwaliseke tonkhe tintfo ngekwentsandvo yababe, lapho ngiyawuta ngenkhatimulo yami nemandla asezulwini
8 Futsi angeke nanini nitive tinhlungu tekufa; kodvwa uma sengita ngenkhatimulo yami niyawuguculwa ngekuphatima kweliso nisuke esimeni sekubhubha niye esimeni sekungabhubhi; ngaleso sikhatsi niyawubusiswa embusweni waBabe.
9 Ngetulu kwaloko, angeke nibuve buhlungu nisesenyameni, noma lusizi ngaphandle kwekutsi kube ngenca yetono temhlaba; futsi konkhe loku ngitawukwenta ngenca yalentfo leniyifise kimi, ngoba nifise kutsi niletse imiphefumulo yebantfu kimi, umhlaba usekhona.
10 Ngalesizatfu niyawuba nenjabulo legcwele; niyawuhlala phansi embusweni waBabe; yebo, injabulo yenu iyawugcwala, njengoba nami Babe anginike injabulo legcwele; niyawuba njengami, nami nginjengaBabe; futsi Babe nami simunye.
11 Moya loNgcwele ufakaza ngaBabe kanye nangami, futsi Babe unika bantfwana bebantfu Moya loNgcwele, ngenca yami.
12 Futsi kwenteka kutsi ngesikhatsi Jesu sekawakhulumile lamavi, wabatsintsa bonkhe ngamunye nangamunye ngemunwe wakhe ngaphandle kwalaba labatsatfu labebatawusala, emvakwaloko wase uyahamba.
13 Buka, emazulu avuleka, benyuselwa ezulwini, babona baphindze beva tintfo letingakhulumeki.
14 Balelwa kutsi bakhulume, abanikwanga nemandla kutsi bakhulume letintfo labebatibonile baphindze bativa;
15 Noma bebasemtimbeni noma ngaphandle kwemtimba, abatanga; ngoba kubo bekubonakala kwangatsi kukhona kuguculwa kwesimo sabo, kutsi baguculwe emtimbeni wenyama baya esimeni sekungabhubhi, kute bakwati kubona tintfo takaNkulunkulu.
16 Kodvwa kwenteka kutsi baphindze bafundzisa emhlabeni; noko abatange bafundzise ngetintfo labebativile baphindze batibona, ngenca yemyaleto lobewunikwetwe bona ezulwini.
17 Manje, noma baba ngulababhubhako noma ngulabangabhubhi, kusukela ngelusuku lwekuguculwa kwesimo sabo, angati;
18 Kodvwa nguloku lengikwatiko, ngekwembhalo loniketiwe—bahamba eveni lonkhe, bafundzisa bonkhe bantfu, bahlanganisa ngebuningi ebandleni labo bebakholwa enshumayelweni yabo; bababhabhatisa, futsi ngebuningi balabo lababhajatiswa baniketwa Moya loNgcwele.
19 Futsi baphonswa ejele ngulabo labebangasilo belibandla. Emajele akakwatanga kubavimba, ngoba adzabuka kabili.
20 Baphonswa ngaphansi kwemhlaba; kodvwa bawuhlasela umhlaba ngelivi laNkulunkulu, kangangekutsi ngemandla akhe bakhishelwa ngephandle basuka ekujuleni kwemhlaba; ngako-ke abakhonanga kumba imigodzi leyenele kutsi ibabambe.
21 Futsi kukatsatfu baphonswa esitsandvweni semlilo bangalimali.
22 Futsi kukabili baphonswa emgodzini wetilwane tasendle; buka badlala netilwane kuhle kwemntfwana nelizinyane lemvu lelimunyako, bangalimali.
23 Futsi kwenteka kutsi ngaleyo ndlela bahamba emkhatsini wabo bonkhe bantfu baNefi, balishumayela livangeli laKhristu kubo bonkhe bantfu eveni lonkhe; baphendvukela eNkhosini, futsi bahlanganyela ebandleni laKhrisu, ngaleyondlela bantfu baleso situkulwane babusiswa, njengekwemavi aJesu.
24 Manje mine, Mormon, ngenta siphetfo sekukhuluma mayelana naletintfo kwesikhashana.
25 Buka, besengitawubhala emabito alabo labebangeke bakuve kufa, kodvwa iNkhosi yala; ngako-ke angiwabhali, ngoba afihlelwe bantfu.
26 Kodvwa buka, ngibabonile, bangisitile.
27 Buka batawubasemkhatsini webeTive, betive angeke babati.
28 Ngetulu kwaloko batawubasemkhatsini wemaJuda, nemaJuda angeke abati.
29 Futsi kuyawukwenteka, ngesikhatsi iNkhosi ibona kulungile ngekuhlakanipha kwayo kutsi bayawusita kuto tonkhe tive letihlakatekile taka-Israyeli, kanye nasetiveni tonkhe, imindeni, tilimi, kanye nakubantfu, bayawukhipha kuto bantfu labaningi babaletse kuJesu, kute sifiso sabo sifezeke, kanjalo nangenca yemandla lanelisako aNkulunkulu lakubo.
30 Banjengetingilosi taNkulunkulu, futsi uma bayawuthandaza kuBabe egameni laJesu bangatibonakalisa kunoma ngumuphi umuntfu ngekutsandza kwabo.
31 Ngako-ke, mikhulu futsi iyamangalisa imisebenti leyawukwentiwa ngibo, ngaphambi kwelusuku lolukhulu lolutako lapho bonkhe bantfu kufanele ngempela beme embikwesihlalo sekwehlulela saKhristu;
32 Yebo nasemkhatsini webeTive kuyawubakhona lomkhulu nalomangalisako umsebenti loyawukwentiwa ngubo, ngaphambi kwalolosuku lwekwehlulela.
33 Futsi kube beninayo yonkhe imibhalo lengcwele lelandzisa ngayo yonkhe indzaba yemisebenti lemangalisako yaKhristu, beniyawukwati, ngekwemavi aKhristu, kutsi letintfo kufanele ngempela tenteke.
34 Maye kuloyo longeke awalalele emavi aJesu, kanjalo newalabo labakhetsile wabatfumela emkhatsini wabo; ngoba labo labangeke bawemukele emavi aJesu kanye nemavi alabo labatfumele abamemukeli yena; ngako-ke angeke abemukele ngelusuku lwekugcina.
35 Futsi bekuyawubancono kube abatalwanga. Ngoba nicabanga kutsi ningakugwema yini kulunga kwaNkulunkulu lowoniwe, lonyatselwe ngaphansi kwetinyawo tebantfu, kute ngaloko kute insindziso na?
36 Manje bukani, njengoba ngikhuluma mayelana nalabo iNkhosi lebakhetsile, yebo, ngisho nalabo labatsatfu labenyuselwa emazulwini, lengingati noma bahlantwa besuswa ekubeni ngulababhubhako bayiswa ekungabhubhini—
37 Kodvwa bukani, ngesikhatsi sengibhalile, ngibutile eNkhosini, ingembulele kutsi kudzingekile kutsi kube khona ingucuko leyentekako emitimbeni yabo, kungenjalo kudzingekile kutsi bakuve kufa;
38 Ngako-ke, kute bangakuva kufa kwabakhona ingucuko leyenteka emitimbeni yabo, kute bangabuva buhlungu noma lusizi ngaphandle kwekutsi kube ngekwetono temhlaba.
39 Manje lengucuko yayingalingani naleyo leyawukwenteka ngelusuku lwekugcina; kodvwa kwaba khona ingucuko leyenteka kubo, kangangekutsi Sathane bekangeke akwati kuba nemandla ngetulu kwabo, bekangeke akwati kubalinga; bangcweliswa basenyameni, kute babengcwele, nekutsi emandla emhlaba bekangeke abavimbe.
40 Futsi bekufanele bahlale bakulesi simo kute kube lusuku lwekwehlulela laKhristu; futsi ngalolo suku bebatobe sebatfole kuguculwa lokukhulu, bemukelwe embusweni waBabe bangaphindzi baphume nanini, kodvwa bahlale naNkulunkulu ingunaphakadze emazulwini.