1 И се случи кога Исус ги беше кажал овие зборови, Тој им зборува на Неговите ученици, еден по еден, кажувајќи им: Што посакувате од Мене, откако Јас ќе отидам кај Отецот?

2 И сите зборуваа, освен тројца, велејќи: Ние посакуваме откако ќе го живееме човечкиот век, нашата служба, каде и да нѐ повикаш Ти, да има крај, за брзо да дојдеме при Тебе во Твоето царство.

3 И Тој им кажа: Благословени сте вие бидејќи го посакувате ова нешто од Мене; затоа, откако ќе наполните седумдесет и две години ќе дојдете кај Мене во Моето царство; и со Мене ќе најдете одмор.

4 И кога Тој им зборуваше, Тој им се заврте Самиот на тројцата, и им кажа: Што сакате Јас да направам за вас, кога Јас ќе отидам кај Отецот?

5 И тие жалеа во своите срца, бидејќи не се осмелија да Му го кажат на Него нештото што го посакуваа.

6 И Тој им кажа: Ете, Јас ги знам вашите мисли, и го посакувате тоа што Јован, Мојот возљубен, кој беше со Мене во Мојата служба, пред Јас да бидам кренат од Евреите, го посакуваше од Мене.

7 Затоа, вие сте поблагословени, бидејќи никогаш нема да вкусите смрт; туку ќе живеете за да ги видите сите дела на Отецот на човечките деца, дури и кога сите нешта ќе бидат исполнети според волјата на Отецот, кога ќе дојдам во Мојата слава со небесните моќи.

8 И никогаш нема да ги почувствувате болките на смртта; туку кога Јас ќе дојдам во Мојата слава ќе бидете променети во трепкање на окото од смртност во бесмртност; и тогаш ќе бидете благословени во царството на Мојот Отец.

9 И повторно, нема да имате болка додека сте во телото, ниту тага освен за гревовите на светот; и сето ова Јас ќе го направам поради тоа што го посакавте од Мене, бидејќи посакавте да ги доведете душите на луѓето кај Мене, додека светот ќе застане.

10 И поради оваа причина ќе имате целосна радост; и ќе седите во царството на Мојот Отец; да, вашата радост ќе биде целосна, и тоа како што Отецот Ми даде Мене целосна радост; и ќе бидете како што сум Јас, и Јас сум како Отецот; и Отецот и Јас сме едно;

11 И Светиот Дух сведочува за Отецот и за Мене; а Отецот им го даде Светиот Дух на човечките деца, поради Мене.

12 И се случи кога Исус ги кажа овие зборови, Тој ги допре сите нив со Неговиот прст освен тројцата кои сакаа да останат, и тогаш Тој си замина.

13 И ете, небесата беше отворена, и тие беа фатени во небото, и видоа и слушнаа неискажливи нешта.

14 И им беше забрането да ги изговараат; ниту им беше дадена моќ да ги изговорат нештата кои ги видоа и слушнаа;

15 И не можеа да кажат дали беа во телото или надвор од телото; бидејќи им се чинеше како нивно преобразување, така што беа променети од ова тело од месо во бесмртна состојба, за да можат да ги видат Божјите нешта.

16 Но се случи тие повторно да служат на лицето на земјата; сепак не служеа за нештата кои ги беа слушнале и виделе, поради заповедта која им беше дадена на небесата.

17 И сега, дали беа смртни или бесмртни, од денот на нивното преобразување, јас не знам;

18 Но волку знам, според записот кој беше даден—тие тргнаа врз лицето на земјата, и му служеа на сиот народ, обединувајќи ги во црквата сите оние кои веруваа во нивното проповедање; крштавајќи ги, и сите кои беа крстени го примија Светиот Дух.

19 И беа фрлени во затвор од оние кои не припаѓаа на црквата. А затворите не можеа да ги задржат, бидејќи беа распукани на два дела.

20 И беа фрлени на земјата; но ја удрија земјата со Божјото слово, толку што со Неговата моќ беа избавени од длабочините на земјата; и затоа не можеа да копаат доволно големи дупки за да ги задржат.

21 И трипати беа фрлени во печка и не добија никава повреда.

22 И двапати беа фрлени во јама со диви ѕверови; и ете си играа со ѕверовите како дете со јагне што цица, и не довија никаква повреда.

23 И се случи така да одат помеѓу целиот Нефитски народ, и го проповедаа Христовото евангелие на целиот народ врз лицето на земјата; и беа преобратени во Господ, и беа обединети во црквата на Христос, и така народот на тоа поколение беа благословени, според словото на Исус.

24 И сега јас, Мормон, ставам крај на зборувањето за овие нешта за некое време.

25 Ете, за малку ќе ги напишев имињата на оние кои никогаш не би ја вкусиле смртта, но Господ забрани; затоа не ги пишувам, бидејќи се скриени од светот.

26 Но ете, ги видов, и тие ми служеа.

27 И ете ќе бидат помеѓу Неевреите, а Неевреите нема да ги знаат.

28 Тие исто така ќе бидат помеѓу Евреите, а Евреите нема да ги знаат.

29 И ќе се случи, кога Господ смета дека е соодветно според Неговата мудрост, дека тие ќе им служат на сите распрскани племиња на Израел, и на сите нации, колена, јазици и народи, и ќе доведат кај Исус многу души, за нивната желба да биде исполнета, и исто поради уверувачката моќ на Бог која е во нив.

30 И тие се како Божји ангели, и ако Му се молат на Отецот во името на Христос, тие можат да му се покажат на било кој човек што им се чини дека е добро.

31 Затоа, големи и зачудувачки дела ќе бидат извршени од нив, пред големиот и претстоен ден кога сите луѓе мора сигурно да стојат пред судиската столица на Христос;

32 Да дури и помеѓу Неевреите ќе има големо и зачудувачко дело направено од нив, пред тој суден ден.

33 И ако ги имате сите свети писма кои даваат извештај за сите зачудувачки дела на Христос, вие би знаеле, според зборовите на Христос, дека овие нешта мора сигурно да дојдат.

34 И тешко на оној кој нема да ги слуша зборовите на Христос, и исто на оние кои Тој ги одбра и испрати помеѓу нив; бидејќи сите што нема да ги примат словото на Исус и словата на оние кои Тој ги испрати, нема да Го примат Него; и затоа Тој нема да ги прими на последниот ден;

35 И би било подобро за нив да не беа родени. Бидејќи дали мислите дека можете да се ослободите од правдата на навредениот Бог, Кој беше газен под човечките стапала, за да може да дојде спасение?

36 И сега ете, како што зборував за оние кои ги одбра Господ, да, дури тројца кои беа фатени во небесата, дека не знаев дали беа прочистени од смртност во бесмртност—

37 Но ете, откако јас напишав, Го прашав Господ, и Тој ми покажа дека мора да има промена направена на нивните тела, инаку потребно е тие да морат да ја вкусат смртта;

38 Затоа, за да не ја вкусат смртта беше направена промена на нивните тела, за да не претрпат болка ниту тага освен за гревовите на светот.

39 Сега оваа промена не е еднаква како таа која ќе се случи на последниот ден; но имаше промена која им беше направена, толку што Сатаната немаше моќ врз нив, за да не ги искушува; и беа осветени во телото, така што беа свети и моќите на земјата не можеа да ги задржат.

40 И во оваа состојба требаше да останат до судниот ден на Христос; а на тој ден требаше да добијат поголема промена, и да бидат примени во царството на Отецот за повеќе да не излегуваат, туку да живеат со Бог вечно на небесата.