1 Manje bukani, ngitsi kini ngesikhatsi iNkhosi seyibona kufanele, ngekuhlakanipha kwayo, kutsi lemibhalo ite kubeTive njengekwelivi layo, ngaleso sikhatsi nitawukwati kutsi sivumelwano Babe lasenta nebantfwana baka-Israyeli, mayelana nekubuyiselwa kwabo emaveni langemafa abo, siyawube sesicalile kugcwaliseka.

2 Futsi nitawukwati kutsi emavi eNkhosi, lakhulunywe baphrofethi labangcwele, onkhe ayawufezeka; futsi akukafaneli nitsi iNkhosi ibambelela kuta kwayo kubantfwana baka-Israyeli.

3 Futsi akukafaneli nicabange etinhlityweni tenu kutsi emavi lakhulunyiwe alite, ngoba bukani, iNkhosi iyawusikhumbula sivumelwano sayo leyisente kubantfu bayo bendlu yaka-Israyeli.

4 Futsi ngesikhatsi senitibona letintfo sententeka emkhatsini wenu, ngaleso sikhatsi ningabe nisatidzelela nani tento teNkhosi, ngoba inkemba yekulunga kwayo isesandleni sayo sangesekudla; bukani, ngalolo suku, uma niyawutedzelela tento tayo iyawukwenta kutsi ite kini ngekushesha.

5 Maye kuloyo lodzelela tento teNkhosi; yebo, maye kuloyo loyawumphika Khristu kanye nemisebenti yakhe!

6 Yebo, maye kuloyawutiphika tembulo teNkhosi, naloyo loyawutsi iNkhosi ayisasebenti ngetembulo, ngetiphrofetho, ngetipho, ngetilimi, ngekuphilisa, noma ngemandla aMoya loNgcwele!

7 Yebo, maye kuloyo loyotsi ngalolo suku, kute atfole inzuzo, ngeke kusaba khona simangaliso lesingentiwa nguJesu Khristu; ngoba loyo lowenta loku uyawuba njengendvodzana yekulahlwa, lengatange yentelwe umusa, ngekwelivi laKhristu!

8 Yebo, futsi akusafaneli kutsi nincife, nidzelele, noma nidlale ngemaJuda, nanganoma nguyiphi insali yendlu yaka-Israyeli; ngoba bukani, iNkhosi iyasikhumbula sivumelwano sayo kubo, futsi iyawukwenta kubo ngekwaloko lebeyikufungile.

9 Ngako-ke akukafaneli nicabange kutsi ningasigucula sandla sangesekudla seNkhosi nisente sangesencele, kute ingakwati kwenta sehlulelo ekugcwaliseni sivumelwano leyasenta kuyo indlu yaka-Israyeli.