Sehluko 8
Tiphepho, kutamatama kwemhlaba, imililo, tivunguvungu, kanye nekubhedvuka kwemvelo kufakazela kubetselwa kwaKhristu—Bantfu labaningi bayafa—Bumnyama bumbonya live tinsuku letintsatfu—Labo labasele balilela simo sabo. Cishe ngemnyaka weNkhosi wa 33 kuya kuwa 34.
1 Manje kwenteka kutsi ngekwembhalo wetfu, futsi siyati kutsi umbhalo wetfu uliciniso, ngoba buka, bekuyindvodza lelungile lebeyigcina umbhalo—ngoba ngempela yenta timangaliso letiningi egameni laJesu; futsi bekute namunye umuntfu lobekangenta simangaliso ngelibito laJesu ngaphandle kwekutsi ahlantwe ngisho nalobuncane bubi bakhe—
2 Manje kwenteka, uma bekungatange kube khona liphutsa lelentiwa ngulendvodza ekubaleni sikhatsi setfu, umnyaka wemashumi lamatsatfu nakutsatfu besewendlulile;
3 Bantfu bacala kulindza ngenshisekelo lenkhulu leso sibonakaliso lebesiniketwe ngumphrofethi Samuweli, umLamani, yebo, sikhatsi lapho bekutawuba khona bumnyama sikhatsi lesitinsuku letintsatfu eveni lonkhe.
4 Kwacala kwaba khona kungabata lokukhulu kanye netimphikiswano emkhatsini webantfu, nanoma kwakunetibonakaliso letiningi kangaka lebese tiniketiwe.
5 Futsi kwenteka kutsi ngemnyaka wemashumi lamatsatfu nakune, enyangeni yekucala, ngelusuku lwesine enyangeni, kwabakhona siphepho lesikhulu, lebesingakate satiwe kulo lonkhe live.
6 Ngetulu kwaloko kwaba khona siphepho lesikhulu nalesesabekako; kwaphindze kwaba khona nekudvuma lokwesabekako, kangangekutsi kwanyakatisa live lonkhe kwaba ngatsi litawuhlukana kabili.
7 Kwaba khona nemibane leneludlame ngalokumangalisako, lebeyingakate yatiwe nanini eveni lonkhe.
8 Futsi lidolobha laseZarahemla lacala lavutsa umlilo.
9 Lidolobha laseMoroni lacwila ekujuleni kwelwandle, nalabebahlala kulo bamita.
10 Umhlabatsi watfwalwa kutamatama kwemhlaba wabekwa etikwelidolobha laseMoroniha, kangangekutsi esikhundleni selidolobha kwaba khona intsaba lenkhulu.
11 Kwaba khona kubhujiswa lokukhulu nalokwesabekako eveni lelalingaseningizimu.
12 Kodvwa buka, kwaba khona kubhujiswa lokukhulu nalokwesabekako eveni lelingasenyakatfo; ngoba buka, live lonkhe lagucuka, ngenca yesiphepho nesivunguvungu, nekudvuma nemibane, kanye nekutamatama kwelive lonkhe lokukhulu kakhulu;
13 Imigwaco lemikhulu yabhidlika, kanye nemigwaco lecondzile yonakala, kwatsi tindzawo letiningi letibusheleleti tagucuka tama magebhugebhu.
14 Emadolobha lamaningi lamakhulu nalabalulekile acwila, lamaningi ashiswa, lamanye lamaningi anyakatiswa taze takhiwo tawo tawela phansi, labahlala kuwo babulawa, tindzawo tasala tite banfu.
15 Kwaba khona lamanye emadolobha lasala; kodvwa umonakalo wawo bewumkhulu kakhulu, futsi bababaningi kuwo lababulawa.
16 Kwaba khona labanye labatsatfwa bahamba nesivunguvungu; futsi kute umuntfu lowatiko kutsi baya ngakuphi, ngaphandle kwekutsi bona bayati kutsi batsatfwa bayiswa khashane.
17 Ngaleyondlela umhlaba wonkhe wagucuka, ngenca yetiphepho, nekudvuma, nemibane, kanye nekutamatama kwemhlaba.
18 Buka, emadvwala achekeka kabili; acetuka etikwemhlaba wonkhe, kangangekutsi atfolakala atincetu leticetukile, futsi ayimifantu kanye netimfa, etikwelive lonkhe.
19 Futsi kwenteka kutsi ngesikhatsi kudvuma, nemibane, nesiphepho, nesihhushuhhushu lesikhulu, kanye nekutamatama kwemhlaba kuphela—ngoba buka, kwatsatsa sikhatsi lesingemahora lamatsatfu; futsi labanye batsi lesikhatsi saba ngetulu kwaloko; noma kunjalo, tonkhe letintfo letinkhulu kanye naletesabekako tenteka cishe ngesikhatsi lesingangemahora lamatsatfu—emvakwaloko buka, kwaba khona bumnyama eveni lonkhe.
20 Futsi kwenteka kutsi kwaba khona bumnyama lobukhulu eveni lonkhe, kangangekutsi labebahlala kulo labebangakafi bebayiva inkhungu yebumnyama.
21 Bekungeke kube khona kukhanya, ngenca yebumnyama, noma sibane, noma emathoshi; noma kube khona umlilo lowokhelekako ngetinkhuni tabo letinhle naletome kakhulu, kangangoba akubanga khona sanhlobo kukhanya.
22 Akutange kube khona ngisho kukhanya lobekubonakala, noma umlilo, noma kulotita, noma lilanga, noma inyanga, noma inkhanyeti, ngoba betitinkhulu kakhulu tinkhungu tebumnyama lebetiseveni lonkhe.
23 Futsi kwenteka kutsi kwatsatsa sikhatsi lesingangetinsuku letintsantfu kutsi kungabi khona kukhanya lokubonwako; kwabakhona kukhala lokukhulu nekuhhewula kanye nekulila emkhatsini wabo bonkhe bantfu njalo, yebo, besisikhulu sililo kubantfu, ngenca yebumnyama kanye nekubhujiswa lokukhulu lobekwehlele etikwabo.
24 Kulenye indzawo bebavakala bakhala, batsi: Awu kube saphendvuka ngaphambi kwalolusuku lolukhulu nalolwesabekako, kube bekunjalo bomnaketfu bebayawusindza, bebangeke bashiswe kulelo dolobha lelikhulu laseZarahemla.
25 Kulenye indzawo bebavakala bakhala baphindze balila, batsi: Awu kube saphendvuka ngaphambi kwalolusuku lolukhulu nalolwesabekako, sangababulali futsi sangabagcobi ngematje baphrofethi, sangabacoshi; kube bekunjalo bomake betfu kanye nemadvodzakati etfu lamahle, kanye nebantfwana betfu bebayawusindza, futsi ngabe abangcwatjwanga kulelo dolobha lelikhulu laseMoroniha. Kwabakukhulu kanjalo-ke kwaphindze kwesabeka kuhhewula kwebantfu baNkulunkulu.