1 Kedekedeo mwurin Mosaia eh wiahierdahme seme padahkiengo, oh lohkiseli nan sahpwo pwon, aramas akan ahpw pokonpenehr sang nan sahpwo pwon, pwe irail en kak kohdahla ni tehnpas sarawio oh rong mahsen kan me nanmwarki Pensamin pahn mahsanih ong irail.

2 Oh mie pokon kalaimwun ehu, iei uwen arail tohto irail sohte wadekedi; pwe irail kaparaparala mehlel oh kehlailla nan sahpwo.

3 Oh irail pil wahdo mesenih en neirail mahn akan, pwe irail en kak meirongki arail mehn meirong isihs kan oh soahngen meirong teikan nin duwen kosonned en Moses;

4 Oh pwe irail en pil kak wia arail kalahngan ong Kauno arail Koht, me ketin kahreiraildo sang nan sahpw en Serusalem, oh me kin ketin doareirail sang pahn manamana en arail imwintihti kan, oh koasonehdier ohl pwung kan en wia arail sounpadahk, oh pil ohl pwung men en wiahla arail nanmwarki, me ketin wiadahr meleilei nan sahpw en Saraemla, oh me padahkihong irail en kapwaiada sapwellimen Koht kosonned akan, pwe irail en kak perenda oh direkihla limpoak ong Koht oh aramas koaros.

5 Kedekedeo mwurin arail kodahdo ni tehnpas sarawio, irail ahpw kauwada imwarail impwal akan kapilpene wasao, emen emen ohl nin duwen eh peneinei, me iei eh pwoud, oh nah pwutak kan, oh nah serepein kan, oh neirail pwutak kan, oh neirail serepein kan, sang me keieu laud kohdi lel me keieu tikitik, ehu ehu peneinei tohrohr sang meteikan.

6 Oh re kauwada imwarail impwal akan kapilpene tehnpas sarawio, ohl koaros kin kasohpeilahng arail wenihmw kan ni tehnpas sarawio, pwe irail en kak mihte nan imwarail impwal akan oh rong mahsen akan me nanmwarki Pensamin pahn mahsanihong irail;

7 Pwehki uwen kalaimwun en pokono, nanmwarki Pensamin sohte kak padahk ong koaros sang ni masloalen kelen tehnpas sarawio, eri e ahpw kupwurehda re en kauwada wasahn doulik ehu, pwe sapwellime aramas akan en kak rong mahsen akan me e pahn mahsanihong irail.

8 Kedekedeo e ahpw tepida mahseniong sapwellime aramas akan sang pohn douliko; oh ekei sohte kak rong sapwellime mahsen kan pwehki uwen pokono laud; eri e ketin kupwurehda pwe irail en ntingihedi mahsen akan me e pahn mahsanih oh kadarohng irail akan me sohte kak rong kapitieo, pwe irail en pil kak alehdi sapwellime mahsen akan.

9 Oh iet akan me e mahsanih oh kupwurehda en ntingdi, me ketihtihki: Riei ko, kumwail koaros me pokonpenehier met, kumwail me kak rong ei pato kan me I pahn patohwanohng kumwail rahnwet; pwe I sohte patohwan ong kumwail en patohdahdo met pwe kumwail en soukautihong dahme I pahn patohwanohng kumwail, ahpw kumwail en rong ie mwahu, oh rongki salengamwail kan pwe kumwail en kak rong mwahu, oh langahda mohngiongamwail kan pwe kumwail en kak wehwehki, oh ritingada amwail madamadau kan pwe sapwellimen Koht me rir kan en kak sansalda ong kumwail.

10 I sohte patohwanohng kumwail en patohdahdo pwe kumwail en masak ie, de kumwail en wiahkinie me I lapalapasang aramas en sampah.

11 Ahpw I duwehte kumwail, me kak soumwahuki soangen soumwahu kan koaros en paliwar oh madamadau; ahpw I pilipildahr rehn aramas pwukat, oh semeio kasarawiehlahr, oh I mweimweidahr pahn kupwur en Kauno pwe I en kak wia amwail kaun oh nanmwarki; oh E ketin sinsile ie oh nekinekid ie sang ni sapwellime manaman kowahlap, pwe I en kak papah kumwail sang ni kehl unsek, lamalam unsek oh roson unsek me Kauno ketikihong ie.

12 I ndaiong kumwail me I mweidala ei mour pwe I en kin papah kumwail, lao lel ahnsou wet, oh I sohte kin song en adihasang kumwail noumwail kohl de silper de amwail pai kan;

13 I pil sohte mweidohng kumwail en selidi nan kalapwus, de kumwail en kaliduwih emen, de kumwail en kamaramas, de widenge aramas, de pirap, de kamwahl; I pil sohte mweidohng kumwail en wiahda soahng suwed teikan, ahpw I kin padahkihong kumwail en kapwaiada kosonned akan en Kauno, ni mehkoaros me e ketin mahsanihong kumwail—

14 Oh pein ngehi, kin doadoahngki pehi kat pwe I en kak papah kumwail, oh pwe kumwail en dehr toutouki pwain daksis, oh sohte wisik toutou me pahn kohieng kumwail—oh soahng pwukat koaros me I ndaiong kumwail, pein kumwail kadehdehier rahnwet.

15 Ahpw, riei ko, I sohte wia soahng pwukat pwe I en aksuweiki, de I pil sohte patohwan mepwukat pwe I en kedipeikumwailda; ahpw I patohwanohng kumwail soahng pwukat pwe kumwail en ese me I kak pato ni kapehd oh lamalam mwakelekel mwohn silangihn Koht rahnwet.

16 Kilang, I men kumwail en ese me pwehki I ndaiong kumwailehr me I papahier kumwail erein ei mour, I sohte ndahki pwe ien aksuweiki, pwe I wie papah Koht.

17 Oh kilang, I ndaiong kumwail soahng pwukat pwe kumwail en esehla erpit; pwe kumwail en esehla me ahnsou me kumwail kin papah meteikan kumwail kin wie papah amwail Koht.

18 Kilang, kumwail kin wiahkinieamwail nanmwarki; oh ma ngehi, me kumwail kin wiahki amwail nanmwarki, kin doadoahk pwe ien papah kumwail, e sou pahn konehng kumwail en kin doadoahk pwehn uhpahpene nanpwungamwail?

19 Oh pil kilang, ma ngehi, me kumwail kin wiahki amwail nanmarki, me papahkin kumwail erein ei mour, oh pil wie papahte Koht, ma I warohng ale kaping sang rehmwail, Ia uwen amwail anahne kapingkalahngan ong Nanmwarki en nanleng!

20 I ndaiong kumwail, riei ko, ma kumwail pahn wia amwail kaping kalahngan oh kepinga sang ni palingenemwail unsek, Kohto me ketin wieikumwailda, oh kin sinsile oh nekinekid kumwail, oh ketin kupwurehda pwe kumwail en perenda, oh ketikihong kumwail en mourpene ni meleilei—

21 I ndaiong kumwail ma kumwail pahn kin papah ih me ketin wieikumwailda sangete nin tapio, oh me kin ketin nekinekid kumwail rahn koaros, sang ni eh ketin sewesehkin kumwail angin amwail esingek, pwe kumwail en kak momour oh mwokid oh wia mehkan nin duwen pein nsenamwail, oh pil kin utung kumwail ahnsou koaros—I nda, mehnda ma kumwail pahn papah ih sang ngehnomwail unsek, kumwail pahn pil wiewiahte sounpapah soh katepe kei.

22 Oh kilang, ihte me e ketin kupwurki sang rehmwail iei kumwail en kapwaiada sapwellime kosonned akan; oh e ketin inoukihong kumwail ma kumwail pahn kapwaiada sapwellime kosonned akan kumwail pahn pweida nan sahpwo; oh dahme e ketin mahsaniher sohte kin wekidekla; eri, ma kumwail pahn kapwaiada sapwellime kosonned akan e pahn ketin kupwuramwahwih kumwail oh pahn kapaiada kumwail.

23 Oh kilang, keieu, e ketin wiaikumwailda, oh ketikihong kumwail mour, me kumwail pweipwandkihong.

24 Oh keriau, e ketin kupwurki kumwail en kin kapwaiada dahme e ketin mahsanihong kumwail; apw ni amwail kin wia, e kin mwadangete kapaiada kumwail; eri e pil pwainkumwaildahr. Oh kumwail pweipwandohngete, oh pahn wie pweipwandte ereinkohkohlahte; eri, dahme kumwail pahn aksuweiki?

25 Oh met I pahn kalelapak mahs rehmwail mie mehkot me kumwail kak koasoia duwen pein kumwail? I sapengkin kumwail, sohte. Kumwail sohte kak ndahte me kumwail pahrekiong pwehl; ahpw kumwail wiawihda sang pwehl; pwe kilang, Ih me sapwellimaniki pwehl me ketin wieikumwailda.

26 Oh ngehiet, me kumwail kin wiahkin ie amwail nanmwarki, sohte weksang kumwail; pwe I pil wiawidahsang pwehl. Oh kumwail dehdehkier me I mahlahr, oh kereniongehr paliwareiet pahn kommoaldi oh pwurehng wiepwella.

27 Eri, I ndaiong kumwailehr me ni ei kin papah kumwail, I kin weweidki madamadau mwakelekel mwohn Koht, ih kahrepe wet me I kapokoneikumwailpene, pwe en dehr pwukoahki (amwail sapung kan), oh ntahmwail sohte pahn kohdo pohi, ni ahnsou me I pahn kesihnen mwohn Koht pwe I en pakadeingkihda soahng kan me e ketin mahsanihong ie duwen kumwail.

28 I ndaiong kumwail me I kapokoneikumwailpene pwe I en kak kamwakelehsang ntahmwail pohn ei likou, ahnsou wet me I nektehn kohdihla nan ei sousou, pwe I en kak mehla ni popohl, oh ngeniet me poatopoat en kak patehng pwihn en koul powe wie kokoulki koul en kapikapinga Koht pwung men.

29 OhI pil ndaiong kumwail me Ikapokoneikumwailpene pwe I en kak pakairkihong kumwail me I solahr pahn wia amwail sounpadahk, de amwail nanmwarki;

30 Pwe ahnsou wet, paliwereiet pwon kin wie rerrer mehlel ni ei songosong en koasoi ong kumwail; ahpw Kauno Koht ketin utung ie, oh mweidohng ie I en koasoi ong kumwail, oh mahsanihong ie I en pakairkihong kumwail rahn wet, me nei pwutak Mosaia iei amwail nanmwarki oh amwail kaun.

31 Oh met, riei ko, I men kumwail en peusehla wiewiahte dahme kumwail kin wia. Nin duwen amwail kin kapwaiada ei kosonned akan, oh pil ehn ei pahpao kosonned akan, oh kumwail pweidahr, oh sohte lohdi pahn manaman en amwail imwintihti kan, oh e pahn pil duwehte ma kumwail pahn kapwaiada ehn nei pwutako kosonned akan, de sapwellimen Koht kosonned akan me e pahn ketikihong kumwail sang ih, kumwail pahn pweida nan sahpwo, oh amwail imwintihti kan sohte pahn ahneki manaman pohmwail.

32 Ahpw kumwail, nei aramas akan, kumwail kalekeikumwailsang akamai kan nanpwungamwail, oh kalekeikumwailsang pilada peikiong ngehn suwedo, me ei pahpao Mosaia koasoaiadahro.

33 Pwe kilang, mie keriah ehu ong mehmen me pahn pilada peikiong ngehno; pwe ma e pahn peikiong ih, oh kin wiewiahte dihp lao mehla nan dipe kan, e duwehte e nimala kadeik en lekideklahn palingene; pwe e alehdier pweine me iei lokolok soutuk, sang ni kasapwungehla kosonned en Koht me e marainikier.

34 I ndaiong kumwail, me sohte emen nanpwungamwail me sohte padahngki duwen soahng pwukat, ihte me soh, noumwail seri tikitik kan, ahpw dahme kumwail ese me kumwail pweipwandkiong Samamwail nanleng kohkohlahte, kumwail en meirongkihong ih mehkoaros me amwail oh pein kumwail; oh pil amwail padahngkier duwen poadopoad kan me audaudki kokohp kan me soukohp sarawi kan mahsaniher sang mahs kohdo lel ahnsou me atail pahpa, Lihai, mweselsang Serusalem;

35 Oh pil, mehkoaros me atail pahpa kahlap ako koasoiadahr lao lel ahnsou wet. Oh kilang, irail pil koasoia dahme Kauno ketin poahngokihong irail; eri, re pwung oh mehlel.

36 Oh met, I ndaiong kumwail, riei ko, mwurin amwail esehier oh padangkiher soahng pwukat, ma kumwail pahn kasapwungehla oh uhwongada dahme koasoiadahr, ma kumwail pahn sohpeisang Ngehn en Kauno, me pahn kahrehda sohte dowe rehmwail pwe en kaweidkin kumwail ahl en erpit kan pwe en kak kupwuramwahwih kumwail, kapaiakumwailda, oh nekinekid kumwail—

37 I ndaiong kumwail, mehmen me pahn wia met, kin kahngohdiong Koht; eri e piladahr en peikiong ngehn suwedo, oh wiahla imwintihti en pwung koaros; eri, Kauno sohte kak ketiket reh, pwe e sohte kin ketiket nan tehnpas me sohte sarawi kan.

38 Eri ma aramas menet sohte pahn koluhla, oh wiewiahte dihp oh mehla ni eh wialahr imwintihti ong Koht, pwunglahn kopwung en Koht pahn kapirada palingene me poatopoato pwe en kehn ni sansal pein eh sapwung kan, me pahn kahrehda eh pahn rungkipene mwohn silangin Kauno, oh nan mwarmware pahn toutoukihla soansuwed, oh medek, oh pwunod, me pahn rasehng kisiniei sekehkun, me kin lulluldahla kohkohlahte.

39 Oh met I ndaiong kumwail, me mahk sohte kak sewese aramaso; eri imwilahn eh lokolok e pahn lokolongki kalokolok kohkohlahte.

40 Kumwail, koaros ohl mah kan, oh pil me pwulopwul kan, oh kumwail seri kan me kak wehwehki ei koasoi kan, pwe I koasoiong kumwail ni sansal pwe kumwail en kak wehwehki, I kapakapki pwe kumwail en tamanda kahpwal kamasepwehk en irail akan me pahn pwupwudiong nan dihp.

41 Oh I pil men kumwail en medemedewe uwen pai oh peren en irail akan me kin kapwaiada sapwellimen Koht kosonned akan. Pwe kilang, re inenen paiamwahu ni mehkoaros, ni paliwar oh palingehn; oh ma irail pahn loalopwoate lel ni imwio irail pahn kasamwolong nanleng, pwe irail en kak kousoanla rehn Koht nan mour peren kohkohlahte. Kumwail tamataman, tamataman me soahng pwukat me mehlel; pwe Kauno Koht me mahmahsen.