“Kraes I Girap Finis; Bilif long Hem bae I Muvumaot Ol Bigfala Hil,” Blong Ol Yut Oli Kam Strong, Mei 2021.
Sandei Moning Sesen
Kraes I Girap Finis; Bilif long Hem bae I Muvumaot Ol Bigfala Hil
Samfala Pat
Fet long Jisas Kraes i fandesen blong evri bilif mo i wanem i tekem tabu paoa i kam. …
Evri samting we i gud long laef—evri blesing we oli save kam we oli gat mining long taem we i no save finis—i stat wetem fet. Blong stap letem God i win insaed long laef blong yumi, i stat wetem fet se Hem i glad blong soem rod long yumi. …
Ol dia brata mo sista blong mi. Singaot blong mi long yufala long Ista moning ia i blong stat tedei blong kam antap long bilif blong yu. Tru long fet blong yu, Jisas Kraes bae i mekem yu gat moa paoa blong muvum ol bigfala hil we oli stap insaed long laef blong yu, iven sapos ol jalenj blong yuwan oli bigbigwan olsem Hil Everest.
Ol bigfala hil blong yu, maet oli fasin blong stap yuwan, tu tingting, sik, o ol nara problem blong yu. Ol bigfala hil blong yu bae oli defdefren, be yet, ansa blong wanwan long ol jalenj blong yu i blong kam antap long bilif blong yu. …
… Bae mi givim faef tingting blong helpem yu developem bilif mo tras ia.
Faswan, stadi. …
Nambatu, jusum blong biliv long Jisas Kraes. …
Nambatri, mekem samting wetem fet. …
Nambafo, stap klin inaf blong tek pat long ol tabu odinens . …
Mo nambafaef, askem Papa blong yu long Heven, long nem blong Jisas Kraes, blong kasem help.
Fet long Jisas Kraes i paoa ia we i moa bigwan we yumi save yusum long laef ia. Evri samting i posibol long olgeta we oli stap biliv [luk long Mak 9:23].
Fet blong yu long Hem, we i stap gro, bae i muvumaot ol bigfala hil—i no ol bigfala hil blong ston we oli flasem wol ia—be ol bigfala hil blong harem nogud we oli stap insaed long laef blong yufala. Fet blong yu, we i stap karem flaoa, bae i help blong tanem ol jalenj blong yu blong kam ol taem blong groap mo ol taem blong janis.
Long Ista Sandei ia, wetem ol dip filing blong lav mo tangkyu, mi talem se mi witnes se, i tru, Jisas Kraes i bin girap finis. Hem i girap finis blong Hem i lidim Jos blong Hem. Hem i girap finis blong blesem laef blong evri pikinini blong God, long weaples oli stap laef long hem. Wetem fet long Hem, yumi save muvumaot ol bigfala hil long laef blong yumi.