“!Luk! Mi Mi Wan God blong Ol Merikel,” Blong Ol Yut Oli Kam Strong Mei 2021.
Sandei Aftenun Sesen
“!Luk! Mi Mi Wan God blong Ol Merikel”
Samfala Pat
Ol merikel, ol saen, ol wok blong sapraes oli fulap long medel blong olgeta we oli biaen long Jisas Kraes tedei, long laef blong yufala, mo hemia blong mi. Ol merikel oli ol hae wok, ol tabu wei blong soem samting, mo soem paoa, we i no gat limit, blong God, mo i talem tru se Hem i “semmak yestedei, tedei, mo blong oltaem” [Moronae 10:19]. Jisas Kraes, we i bin krietem ol solwota, i save mekem oli kam kwaet; Hem i we i mekem man i save luk, i save mekem yumi luk i go long heven; Hem we i mekem ol man wetem leprosi oli kam klin, i save stretem ol samting we yumi sot long ol; Hem i we i hilim man we i no save wokbaot, i singaot long yumi blong yumi girap mo i se “Kam, folem mi” [Luk 18:22].
Plante long yufala i witnesem ol merikel, moa bitim we yu save luksave. Maet yu luk se oli smol komperem long Jisas we i mekem dedman i girap bakegen. Be hamas i bigwan, i no talem se hemia nao wan merikel, be i talem nomo se i kam long God. …
I gat olgeta taem we yumi stap hop blong merikel blong hilim wan yumi lavem, blong tanembak wan nogud samting, o blong mekem hat we i konkon o sol we i lusum rod, i kam sofsof bakegen. Taem yumi lukluk ol samting tru long ol ae blong wol ia, yumi wantem Lod i pusum han i kam, blong stretem wanem we i brok. Tru long fet, merikel ia bambae i kam, nomata se i no folem taemtebol ia blong yumi, o wetem paoa ia we yumi wantem. …
Lod i mekem yumi tingbaot se: “fasin blong mi i no olsem fasin blong yufala” [Aesea 55:8]. Jisas i invaetem yumi: “Yufala evriwan we … i stap hadwok tumas, [mo] stap karem ol hevi samting, yufala i kam long mi, nao bambae mi … mekem we yufala i spel gud” [Matiu 11:28]—spel long wari, tingting i no glad, fraet, fasin blong no stap obei, wari long olgeta we yumi lavem olgeta, from ol drim we oli go lus, o oli no save hapen. Pis, long medel blong tingting i konfius o harem nogud, hem i wan merikel.