“Hop long Kraes,” Blong Ol Yut Oli Kam Strong, Mei 2021.
Satedei Aftenun Sesen
Hop long Kraes
Samfala Pat
Ol brata mo sista. Long taem ia blong Ista yumi lukluk nomo long glori taem blong Laef Bakegen long Ded blong Lod mo Sevya blong yumi, Jisas Kraes. Yumi tingbaot invitesen blong Hem blong “kam long mi, yufala evriwan we yufala i stap hadwok tumas, mo yufala i stap karem ol hevi samting, mo bae mi mekem yufala i spel gud.
“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.
“Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi” [Matiu 11:28–30].
Invitesen blong Sevya blong kam long Hem i wan invitesen blong evriwan, blong no kam long Hem nomo, be tu, blong kam memba long Jos blong Hem. …
Jisas i wantem yumi blong save se, God, i wan Papa long Heven we i gat lav.
Taem yumi save se Papa blong yumi long Heven i lavem yumi, bae i helpem yumi blong save huia i yumi, mo we yumi blong bigfala famli blong Hem we i no save finis. …
… I nomata wanem jalenj yumi fesem long laef, olsem fas moning blong Ista, yumi save wekap long wan niufala laef long Kraes wetem ol niufala janis mo ol tru laef we i ril, taem yumi tanem yumi i go long Lod blong gat hop mo filing blong stap pat wetem Hem. …
Mi tokbaot hop long Kraes i no olsem wan drim blong tingting nomo. Be mi tokbaot hop, we i semmak long wan tru tingting we bae i hapen. Hop ia i wan nid blong yumi gat blong winim wok blong Setan, blong mekem spirit laef blong yumi i kam strong moa, mo blong kam blong save se Papa blong yumi we i no save finis i lavem yumi mo we yumi ol pikinini blong Hem we yumi pat long famli blong Hem. …
Neva fogetem se yu yu wan pikinini blong God, Papa blong yumi We I No Save Finis, naoia mo blong oltaem. Hem i lavem yu, mo Jos i wantem mo i nidim yu. !Yes, mifala i nidim yu! Mifala nidim voes, talen, skil, mo stret mo gud fasin blong yu.