“Fasin blong Mekem I No Stret long Man we I Mekem Man I Kros,” Blong Ol Yut Oli Kam Strong, Mei 2021.
Satedei Aftenun Sesen
Fasin blong Mekem I No Stret long Man we I Mekem Man I Kros
Samfala Pat
Long man ia—mo plante long yumi—blong stap safa mo fesem fasin we i no stret, i no go nomo wetem tingting ia se, i rili gat wan Papa long Heven we i kaen mo gat lav. Yet, Hem i ril i stap; Hem i kaen, mo Hem i lavem wanwan long ol pikinini blong Hem i stret nomo. …
Sam samting we i no stret, yumi no save eksplenem; samting we i no stret we yumi no save eksplenem, i save mekem man i kros. … Laef long wol ia, fulap samting i no stret long hem. …
… Hat blong mi i soa from olgeta ia we oli stap fesem samting i no stret, be mi mi talemaot wetem hat blong mi we i soa, se Jisas Kraes i andastanem tugeta, samting we i no stret i stap, mo Hem i gat paoa blong givim wan rod blong stretem. … Hem i bin andastanem stret evriwan wanem we yumi stap gotru long hem naoia. …
Long ol taem we oli no save finis, Papa long Heven mo Jisas Kraes, bae Tufala i stretem evri samting we i no stret. I stret blong wantem save se, hao mo wetaem ?Olsem wanem bae Tufala i mekem hemia? ?Wetaem bae Tufala i mekem hemia? Long save blong mi, Tufala i no talemaot yet olsem wanem o wetaem. Wanem mi save, se bae i hapen. …
Yumi save traem blong holembak kwestin blong yumi abaot olsem wanem, mo wetaem, from long taem bae i kam bae yumi lukluk nomo blong stap developem fet long Jisas Kraes. …
Taem yumi stap developem fet long Jisas Kraes, yumi mas traehad tu blong kam olsem Hem. Nao, bae yumi go kolosap long ol narawan wetem lav mo sore, mo yumi traem blong stretem samting we i no stret, taem yumi faenem. …
No letem samting we oli mekem i no stret long man, o yu, i mekem yu kam stronghed, i mekem yu kam konkon, o i spolem fet we yu gat long God. Be, askem help long God. Kam antap moa blong talem tangkyu from Sevya mo blong save dipen long Hem. …
… Fet blong yu long Papa long Heven mo Jisas Kraes bae i kasem moa praes bitim we yu stap tingting long hem. Evri samting we i no stret long man—speseli samting we i no stret we i mekem man i kros—bae Hem i konsekretem i kam gud blong yu.