“Ol Hat Oli Joen Tugeta,” Blong Ol Yut Oli Kam Strong, Mei 2021.
Sesen
Ol Hat Oli Joen Tugeta
Samfala Pat
Taem we oli askem Hem: “Tija. ?Wanem loa blong God we i hae moa long ol narafala loa, i winim olgeta evriwan?” Sevya i ansa se : “ ‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu’” mo afta, i ademap “‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu” [Matiu 22:36–39]. Ansa blong Sevya i mekem heven diuti ia blong yumi i kam moa impoten. Wan profet blong bifo oli givim oda se: “[i] no mas gat rao wan wetem narawan, be [yumi] mas lukluk i go long fored … wetem hat blong [yumi] oli joen tugeta blong kam wan mo long lav we wan i gat long narawan” [Mosaea 18:21]. …
Naoia, blong ol yang man mo ol yang woman, taem yu stap gro mo kam bigwan, blong jikim ol narawan i save kam bigwan mo kam denja. Ol filing blong fraet, mo harem nogud, mo mowas long hemia, oltaem oli kompanion blong fasin blong buli o tok wetem fos. …
I klia se, enemi i yusum hemia blong spolem gud jeneresen blong yufala. I no gat ples blong hemia long onlaen spes blong yu, long ol neba ples blong yu, long skul, kworom, mo ol klas blong yu. Plis mekem evri samting we yu save mekem blong mekem ol ples ia oli moa kaen mo moa sef. …
… Taem yu mekem fasin blong stap kaen, givim kea mo soem lav mo sore, iven long intanet, mi promes, se bae yu leftemap ol han we oli hang daon mo bae yu hilim ol hat. …
Bae wanwan long yumi i traehad evriwan, i nomata wanem yia blong yumi.
Taem yu traehad blong gat moa lav, respek, mo kaen fasin, bae i gat taem we yu harem nogud, o yu kros from ol nogud joes blong ol narawan. ?Taem olsem, yumi mekem wanem? Yumi folem strong tok blong Lod blong “lavem ol enemi … mo prea from olgeta we oli no laekem yu” [Luk 6:27–28].
Taem oposisen mo hadtaem i kam long yumi tru long ol aksen we oli poenem fingga, oli nogud mo oli jikim yumi, yumi save jusum blong gat hop long Kraes. Hop ia i kam long invitesen blong Hem mo promes blong “stap glad, from we bae Hem i lidim [yumi] i go” [Doktrin mo Ol Kavenan 78:18] mo se bae Hem i mekem se ol hadtaem blong yu bae oli blong gud blong yu [luk long 2 Nifae 2:2]