“Rum long Hotel,” Blong Ol Yut Oli Kam Strong, Mei 2021.
Satedei Moning Sesen
Rum long Hotel
Samfala Pat
Long Ista taem ia, Jisas Kraes i stap invaetem yumi blong kam, olsem Hem, olsem wan gudfala Man Sameria, blong mekem hotel blong Hem, (Jos blong Hem) i wan ples blong evriwan i save kam haed long ol kil mo strong win blong laef. …
Taem yumi kam wetem Gudfala Man Sameria, long Hotel ia, yumi lanem faef samting abaot Jisas Kraes, mo yumiwan bakegen.
Faswan, yumi kam long Hotel ia olsem we yumi stap, wetem ol smol wiknes mo ol samting we yumi no stret long olgeta. Yet, yumi evriwan i gat wan samting blong givim. Wokbaot blong yumi i go long God, yumi faenem tugeta. …
Nambatu. Hem i askem yumi blong mekem Hotel blong Hem i wan ples blong kasem gladhat mo gat spes, we wanwan i save kam tugeta, mo i gat rum blong evriwan. Olsem ol disaepol blong Jisas Kraes, evriwan i ikwol, i no gat seken klas grup. …
Nambatri, insaed long Hotel ia blong Hem, yumi lanem se fasin we i stret evriwan, i stap long Jisas Kraes nomo, i no long fasin we i stret evriwan blong wol ia. … Hem i stap invaetem wanwan blong stap wan Gudfala Man Sameria, we i no jajem man tumas, mo i fogivim man moa, mo fogivim yumiwan bakegen mo ol narawan. …
Nambafo, … Hem i karem yumi i go long hotel blong Hem mo tu long haos blong Hem—tabu tempol … ples we … Gud Man Sameria i save klinim yumi, priperem yumi blong gobak long ples we God i stap long hem, mo joen wetem famli blong God we i no save finis. …
Laswan, we i nambafaef, yumi stap glad se God i lavem ol pikinini blong Hem wetem evri defren bakgraon mo situesen blong yumi, long evri nesen, famli, mo lanwis, wetem wan rum blong evriwan insaed long Hotel ia blong Hem. …
Gudfala Man Sameria i promes se bae i kambak. Ol merikel oli hapen taem yumi stap kea long wanwan long yumi olsem we Hem bae i mekem.