“Mi Lavem blong Luk Tempol,” Blong Ol Yut Oli Kam Strong, Mei 2021.
Satedei Moning Sesen
Mi Lavem blong Luk Tempol
Samfala Pat
Deban Saot Afrika Tempol
Mi save se ol tempol blong Lod oli ol tabu ples. Stamba tingting blong mi tedei, blong tokbaot ol tempol, i blong leftemap filing blong hat blong yu, mo blong mi, blong stap klin inaf, mo stap rere from moa janis we bae i kam blong gat eksperiens long tempol, we oli stap kam long yumi. …
Sapos yu o mi, i go long tempol, we yumi no klin gud inaf, bae yumi no save luk, tru long paoa blong Tabu Spirit, tijing long saed blong spirit abaot Sevya we bae yumi save kasem insaed long tempol.
Taem yumi klin inaf blong kasem kaen tijing ia, long ples ia, bae, tru long eksperiens blong tempol, yumi gat moa hop, glad, mo gud tingting truaot long ol laef blong yumi. Hop, glad mo gud tingting ia, oli stap nomo tru long fasin blong akseptem ol odinens we oli mekem insaed long ol tabu tempol. Hem i insaed long tempol nao we bambae yumi save kasem kwaet save ia se ol famli rilesensip bae oli gogohed afta long ded mo bae oli stap blong taem we i no save finis. …
… Mo yumi save se hapines blong yumi, we i no save finis, i dipen long hamas yumi mekem blong mekem se semfala hapines ia i gohed blong hamas famli we yumi save mekem.
Mi filim semfala tingting long hat blong mekem gud blong invaetem ol memba blong famli blong mi we oli laef, blong wantem kam klin inaf blong kasem, mo blong givim ona long siling odinens ia blong tempol. Hemia i pat blong kam tugeta blong Isrel we God i promesem long ol las dei long tugeta saed blong vel.