“From Wanem Kavenan Rod,” Blong Ol Yut Oli Kam Strong Mei 2021.
Sesen
Stap long Kavenan Rod
Samfala Pat
?Wanem i kavenan rod ia? Hem i wan rod ia nomo long laef we i lidim yumi i go long selestial kingdom blong God. Yumi statem rod ia long get blong baptaes. …
Sam bae oli save talem: “Baptaes o no baptaes, mi save mekem ol gud joes nomo; mi no nidim ol kavenan blong stap olsem wan gud man mo gat sakses.”… ?Nao, wanem nao hem i defren wetem kavenan rod ia?
Yes, wanem i defren i spesel mo i gat mining long taem we i no save finis. …
Faswan, hem i fasin we yumi stap obei long God. Yumi no gat ol simpol gud tingting long hat nomo, be yumi givim ful tingting mo fasin blong laef folem evri toktok we oli kamaot long maot blong God. Olsem, yumi folem eksampol blong Jisas Kraes. …
Wan nambatu saed blong kavenan rod ia, we i no gat wan moa i semmak long hemia, i rilesensip blong yumi wetem Hae God. Ol kavenan we God i givim long ol pikinini blong Hem, oli mekem moa bitim blong soem rod. Oli fasem yumi wetem Hem. …
Hemia i lidim yumi long wan nambatri spesel blesing blong kavenan rod ia. God i givim wan presen we man i no andastanem blong helpem ol man we oli mekem kavenan blong stap kipim kavenan: presen we i Tabu Spirit. …
Nambafo, olgeta we oli stap folem kavenan rod ia, oli faenem tu ol blesing we i spesel long ol defdefren ples blong kam tugeta long hem [ol ples olsem ol miting blong sakramen mo tempol wosip]. …
Long en, taem yumi stap gohed nomo long kavenan rod ia, bae yumi kasem ol blesing blong Ebraham, Aesak, mo Jekob, ol bigfala blesing blong fasin blong sevem man mo kam olsem god, we God nomo i save givim. …
Bae yumi mekem folem singaot blong profet blong stap long kavenan rod ia.