“Sa Tucake tale ko Karisito; Na Vakabauti Koya ena Tosoya na Ulunivanua,” Me iSakisaki ni iTabagone, Me 2021.
Soqoni ena Mataka ni Sigatabu
Sa Tucaketale na Karisito; Na Vakabauti Koya ena Tosoya na Ulunivanua
Veitikina
Na vakabauti Jisu Karisito sa yavu ni vakabauta kecega ka sala ni kaukauwa vakalou. …
Na veika vinaka kece ni bula—na veimadigi ni kalougata ni veika tawamudu—e tekivu ena vakabauta. Ni da vakatara na Kalou me lewa na noda bula ena tekivu ena vakabauta ni sa lewa me dusimaki keda. …
Kemuni na taciqu kei na ganequ lomani, au kacivi kemuni ena mataka ni Siga ni Mate oqo me tekivu nikua mo tara cake na nomu vakabauta. Ena nomu vakabauta, ena vakalevutaka o Jisu Karisito na nomu kaukauwa mo rawa ni tosoya na veiulunivanua ena nomu bula. …
Na nomu ulunivanua e rawa ni nomu galili, vakatitiqa, tauvimate, se lomaleqa tale eso. Ena duidui na nomu ulunivanua, ia na iwali ni nomu ibolebole yadua me levu cake na nomu vakabauta.
… Meu vakatura mada e lima na ka me vukea na kena tarai cake na vakabauta kei na inuinui o ya.
iMatai, na vuli. …
iKarua, digitaka mo vakabauti Jisu Karisito. …
iKatolu, cakacaka ena vakabauta. …
iKava, votai ena cakacaka vakalotu tabu ni o kilikili tu. …
Ka ikalima, kerea vei Tamada Vakalomalagi, ena yaca i Jisu Karisito, mo vukei. …
Na vakabauti Jisu Karisito sa kaukauwa cecere sa tu me noda ena bula oqo. Sa rawarawa na ka kecega vua sa vakabauta [raica na Marika 9:23].
Ni tubu nomu vakabauti Koya ena tosoya na ulunivanua—sega ni veiuluvatu e sauna na vuravura—ia na ulunivanua ni rarawa ni nomu bula. Na nomu vakabauta bulabula ena vukea mo vukica na ibolebole me ka bula ka madigi tawavakatauvatani rawa.
Ena Siga Tabu ni Mate oqo, ena yaloqu taucoko ni loloma kei na vakavinavinaka, au sa vakadinadinataka ni o Jisu Karisito sa tucake dina tale. Sa tucaketale me liutaka na Nona Lotu. Sa tucaketale me vakalougatataka na nodra bula na luvena kece na Kalou, ena nodra itikotiko cava ga. Ena vakabauti Koya, sa rawa meda tosoya na ulunivanua ena noda bula.