“Jisu Karisito: Na Dauveiqaravi ni Yaloda,” Me iSakisaki ni iTabagone, Me 2021.
Soqoni ena Mataka ni Sigatabu
Jisu Karisito: Na Dauveiqaravi ni Yaloda
Veitikina
Na lomaqu e marau niu vakananuma na cakacaka e rui veivakurabutaki, lagilagi ka sega ni vakamacalataki rawa sa mai yaco ena ivolatukutuku ni bula vakatamata—na veisorovaki ni solibula ni noda Turaga ko Jisu Karisito.
E a mai vakayacora ena yalololoma o Karisito na loma i Tamada ena Nona isoro ni loloma cecere tawavakaiyalayala. E a rawa na batigaga ni mate vakayago kei na mate vakayalo, ka vakacurumi ki na vuravura ena Lutu, me rawa vei keda na vakabulai tawamudu. …
Dina ga ni a mai vakatikitikitaka vakai Koya na iVakabula na revurevu ni mate vakayago ena Nona solibula, a sega ni kauta tani o Koya na noda itavi vaka tamata yadua me da veivutunitaka na ivalavala ca eda vakayacora. …
Kemuni noqui tokani lomani, au vakadinadinataka vei kemuni ni da veivutunitaka vakaidina na noda ivalavala ca, eda vakatara na veisorovaki ni solibula i Karisito me yaco me yaga vakalevu sara ena noda bula. …
Me ikuri ni isolisoli cecere ni veivakabulai, sa vakarautaka talega vei keda na iVakabula na veivakadeitaki kei na veivakacegui nida sotava na veika rarawa, veitemaki, kei na malumalumu ni bula oqo, ka oka kina na ituvaki eso eda lako curuma ena mate dewa ka takavi keda tiko oqo.
Nida toro voleka ki vei Koya, soli keda vakayalo ki na nona veikaroni, ena rawa kina vei keda meda vakataqara vei keda na Nona ivua, ni sa rawarawa, kei na Nona i colacola, ni sa mamada, ka kunea kina na veivakacegui kei na vakacegu e yalataka. Me ikuri, eda na ciqoma na kaukauwa eda gadreva kece meda ra-wa na vei dredre, malumalumu, kei na rarawa ni bula, ka na dredre sara vakalevu meda vosota ke sega na kaukauwa ni Nona veivukei kei na veivakabulai.