“Taqomaka na Noda Yavu ni Vakavulewa Vakauqeti Vakalou,” Me iSakisaki ni iTabagone, Me 2021.
Soqoni ena Yakavi ni Sigatabu
Taqomaka na Noda Yavu-ni-Vakavulewa Vakauqeti Vakalou
Veitikina
Ena gauna ni leqa oqo, au vakila me’u vosa me baleta na Yavu-ni-Vakavulewa vakauqeti kei Amerika. Na Yavu-ni-Vakavulewa oqo e bibi vei ira noda lewenilotu e Amerika, ia e sa dua talega na ivuvu matau ni yavu-ni-vakavulewa e vuravura raraba.
Na noda vakabauta na veivakauqeti vakalou e solia vei keda na Yalododonu Edaidai e dua na itavi bibi me da tutaka ka taqomaka na Yavu-ni-Vakavulewa kei Amerika kei na ivakavuvuli ni yavu-ni-vakavulewa ena vanua cava ga eda bula kina. E dodonu me da vakararavi vua na Turaga ka nuidei me baleta na veisiga mai muri ni matanitu oqo.
Na cava tale beka me da cakava na Yalododonu Edaidai? Me da masuta na Turaga me dusimaka ka vakalougatataka na veimatanitu kecega kei ira na nodra iliuliu. Oqo e tiki ni noda yavu ni vakabauta. Na noda vakarorogo ki vei ira na peresitedi se dauveiliutaki e sega ni vakataotaka na noda via saqata na lawa se lawatu yadua. E gadrevi kina me da dau vakayagataka vakavinaka ena yalovakacegu na noda veivakayarayarataki, ena loma ni ituvatuva ni noda yavu-ni-vakavulewa kei na lawa eso e vauca. Ena veitikina eso dau veiqatitaki, e dodonu me da tovolea me da taura vakamalua ka duavata.
E tiko eso tale na itavi ka tiki ni kena dau tutaki na Yavu-ni-Vakavulewa vakauqeti. E dodonu me da vulica ka tutaka na ivakavuvuli vakauqeti ni Yavu-ni-Vakavulewa. E dodonu me da vakasaqara ka tokoni ira na tamata vuku ka vinaka era na tokona na ivakavuvuli eso oya ena nodra veiqaravi raraba (raica na Vunau kei na Veiyalayalati 98:10). E dodonu me da lewenivanua kilaka ka dau sasaga me da cakava me vakilai na noda yaga ena veika vaka bula raraba.