“Vakanuinui vei Karisito,” Me iSakisaki ni iTabagone, Me 2021.
Soqoni ena Yakavi ni Vakarauwai
Vakanuinui vei Karisito
Veitikina
Kemuni na taciqu kei na ganequ, ena Siga ni Mate oqo eda sa raimatua ki na Tucaketale lagilagi ni noda Turaga ka iVakabula, o Jisu Karisito. Eda nanuma kina na Nona veisureti yalololoma mo “dou lako mai vei au, koi kemudou vakayadua ga sa oca ka colata na icolacola bibi, ia kau na vakacegui kemudou.
“Vakataqara vei kemudou na noqu ivua, ka vuli vei au; ni’u sa yalomalua ka yalomalumalumu: dou na kunea kina na vakacegu ni yalomudou.
“Ni sa rawarawa na noqu ivua, ka mamada na noqu icolacola” [Maciu 11:28–30].
Na veisureti ni iVakabula meda lako Vua sa dua na veisureti kivei keda kece sega walega ni da gole Vua ia meda sa lewena talega na Nona Lotu. …
Sa gadreva vei keda o Jisu meda kila na Kalou ni sa Tamada Vakalomalagi sa dauloloma.
Ni da kila ni sa lomani keda na Tamada Vakalomalagi ena vukea meda kila o cei o keda ka kila ni da sa lewe ni Nona matavuvale cecere tawamudu. …
… Ia, se cava na ibolebole eda sotava ena bula oqo, eda rawa ni, vaka ena isevu ni mataka ni Siga ni Mate, meda yadra mai ki na dua na bula vou vei Karisito, ena veimadigi vou ka totoka kei na veika vou ni da gole vua na Turaga ena inuinui ka okati kina.
Au tukuna tiko na nuitaki Karisito sega ni vakanananu walega. Ia, au tukuna tiko na vakanuinui ni sa namaki tiko me na kilai. Na vakanuinui vakaoqo sa ka bibi me uabaleti kina na meca, susugi na kaukauwa vakayalo kei na igu, ka me kilai ni sa lomani keda o Tamada Tawamudu ka da sa Luvena eda sa oka ki na Nona matavuvale. …
Kakua ni guilecava ni ko sa luve ni Kalou, na Tamada Tawamudu, nikua ka tawamudu. E lomani iko o Koya, kei na Lotu sa vinakata ka gadrevi iko. Io, keimami gadrevi iko! Keimami gadreva na domomu, taledi, kila-ka, nomu vinaka, kei na ivalavala dodonu.