“Na Cava sa Cakava Vei Keda na Noda iVakabula?,” Me iSakisaki ni iTabagone, Me 2021.
Soqoni ni Matabete
Na Cava sa Cakava Vei Keda na Noda iVakabula?
Veitikina
Na cava beka sa cakava vei keda yadua ko Jisu Karisito? Sa cakava oti o Koya na veika kece sara e gadrevi ena noda ilakolako ni bula oqo ki na icavacava sa tuvai tu ena Nona ituvatuva na Tamada Vakalomalagi. Au na vosa me baleta e va na veika taumada ena ituvatuva oya. …
Na Tucaketale sa solia vei keda na ivakarau ni rai kei na igu me da vosota na bolebole ni bula oqo ka dau sotava o keda yadua kei ira eda dau lomana. Sa solia vei keda e dua na ivakarau vou me da raica kina na leqa vakayago, ni vakasama, se na leqa e lomada ka da sucu vata kaya mai se qai mai yaco ena bula oqo. Sa solia vei keda na igu me da vosota na rarawa, na druka, kei na veilecayaki.
Sa solia talega vei keda na Tucaketale e dua na ibili kaukauwa me da muria na ivakaro ni Kalou ena noda gauna ni bula oqo.
A vosota na noda iVakabula ka Dauveivueti na veivakararawataki e sega ni vakasamataki rawa me colata kina na isau ni ivalavala ca ni tamata kecega ena veivutuni. Na isoro oqori e soli kina na ulumatua ni vinaka, na lami savasava sa sega na kena ca, me baleta na levu ni ca, na ivalavala ca ni vuravura taucoko.
E vakavulica vei keda o Jisu na ituvatuva ni veivakabulai. E okati ena ituvatuva oqo na veibuli, na inaki ni bula, na kena gadrevi na veibasai, kei na isolisoli ni galala ni digidigi. Sa vakavulica talega vei keda o Koya na ivunau kei na veiyalayalati e dodonu me da talairawarawa kina kei na cakacaka vakalotu e dodonu me da sotava me na kauti keda lesu vei rau na noda itubutubu vakalomalagi.
Sa kila tiko na noda iVakabula na noda vakatovolei, na noda veika dredre, na mosi ni yaloda, kei na noda vakararawataki, ni sa sotava kece ko Koya ena lomasoli me vaka ni ra tiki ni Nona Veisorovaki. O ira era sotava na ituvaki oqo e dodonu me ra nanuma tiko ni a sotava talega na iVakabula na mataqali mosi vakaoqo ia mai na Nona Veisorovaki, sa solia kina vei keda ko Koya na kaukauwa me da vorata rawa.