“Ta eo Ad Rilo̧mo̧o̧r Ekar Kōm̧m̧ane n̄an Kōj?,” N̄an Kōkajoorļo̧k Jodikdik ro, Māe 2021.
M̧wen̄an eo an Priesthood
Ta eo Ad Rilo̧mo̧o̧r Ekar Kōm̧m̧ane n̄an Kōj?
Jijdikdik in
Ta eo Jisōs Kraist ekar kōm̧m̧ane n̄an kōj kajjojo? Ekar kōm̧m̧ani aolep men ko remenin aikuj n̄an iaļ in ad ilo mour in n̄an mejān kajjik eo me kar kōlaajrake ilo karōk eo an Jemedwōj Ilan̄. … Inaaj kōnono kōn emen pedped in katak ko kōn karōk in. …
Jerkakpeje eo ej letok n̄an kōj ļōmņak im kajoor n̄an niknik im anjo̧ ioon apan̄ ko an mour in me kōj kajjojo im ro rejitōnbōro ippād jej jelm̧ae. Ej letok n̄an kōj juon wāween ekāāl n̄an kalimjōk ak ļōmņak kōn wōtam̧we ko ilo ānbwin, kōļmenļo̧kjen, ak en̄jake ko jej bōki ilo iien ļōtak ak ilo mour in. Ej letok n̄an kōj kajoor n̄an anjo̧ ioon burom̧ōj, likjab, im inepata ko.
Jerkakpeje ej barāinwōt letok n̄an kōj juon kōketak ekajoor n̄an kōjparok kien ko an Anij ilo mour in. …
Ad Rilo̧mo̧o̧r im Ripinmuur ekar anjo̧ ioon en̄taan eo me jejjab maron̄ kōmeļeļeiki kōn jerawiwi ko an aolep armej ro rej ukweļo̧k. Katok in pinmuur in kar letok men eo eļap ļaam eo ejjeļo̧k libijinjin ippān n̄an jon̄an nana eo eļap jerawiwi ko an aolepān laļ in. …
… Jisōs ekar katakin kōj kōn karōk in lo̧mo̧o̧r. Karōk in ekoba Kōm̧anm̧an eo, jibadbad eo an mour in, jum̧ae ko remenin aikuj, im menin letok eo an anemkwoj in kāālet. Ekar barāinwōt katakin kōj kien ko im bujen ko me jej aikuj pokake im kain̄i ko jej aikuj en̄jaki n̄an bar kōjepļaakļo̧k kōj n̄an ippān jined im jemedwōj ilan̄. …
Rilo̧mo̧o̧r ej en̄jake im jeļā mellijon̄ ko ad, apan̄ ko ad, ad burom̧ōj, im en̄taan ko ad, bwe Ekar kōņaan en̄jaki aolepeer āinwōt m̧ōttan Pinmuur eo An. … Aolep ro rej en̄taan kōn jabdewōt nan̄inmej ko an mour in rej aikuj keememej bwe ad Rilo̧mo̧o̧r rekar en̄jake kain bar metak rot in, im bwe kōn Pinmuur eo An, Ekar letok n̄an kōj kajjojo kajoor n̄an jelm̧aeiki.