“Kwaļo̧k Pedped in Katak ko an Gospel eo Aō,” N̄an Kōkajoorļo̧k Jodrikdrik ro, Māe 2021.
M̧wen̄an eo an Ālkin Rālep in Jabōt
Pedped in Katak ko an Gospel eo Aō (Katak im Bujen Ko 42:12)
Jijdikdik in
Pija ko jān Getty
Juon pedped in katak an gospel ej juon katak eo ej pedped ium̧win unin tōl n̄an kōjerbal ilo jim̧we im erreo anemkwoj in kālet. Pedped in katak ko rej itok jān m̧ool ko an gospel im rej letok tōl im jon̄ak ko ilo ad bun̄ m̧aanļo̧k ilo iaļan bujen eo. …
Ekkatak, meļeļe, im mour kōn pedped in katak ko an gospel eo rej kōkajoorļo̧k tōmak eo ad ilo Rilo̧mo̧o̧r eo, kam̧wūlaļļo̧k ad wūjlepļo̧k n̄an E, im ej bōktok eļap kōjeraam̧m̧an ko im menin letok ko an jetōb ilo mour ko ad. Pedped in katak ko kōn mour jim̧we im erreo rej bar jipan̄ kōj n̄an erreim̧aanļo̧k ilōn̄inļo̧k kōņaan ko ad im ikdeleel ko ad make ilo an letok jeļā in eaorōk kōn m̧ool indeeo ilo ad jelm̧aeiki jekjek ko rokkotaktak, apan̄ ko, im kālet ko, im men ko jej jelm̧aeiki ilo mour in. …
Ke Josep Smith ekar kalbuuj ilo Kalbuuj Liberty, ekar je leta in kōmeļeļe ko n̄an membōr ro im ritōl ro an Kabun̄ in im kakeememej er bwe “juon wa eļap ekanooj jeraam̧m̧an jān juon jila ekanooj dik ilo iien an lan̄ bun̄, jān wōt kajebwābweiki ippān kōto eo im ņo ko” [Katak im Bujen Ko 123:16].
Juon “jila” ej juon jōbwe im kein jerbal ko jet rekillep n̄an kōjerbwābweik juon tima ak juon lo̧o̧n. Im “kōjebwābweik ippān kōto eo im ņo ko” ej kōjebwābweik juon tima bwe en maron̄ dāpij wōt an peļan im jab pedo ilo iien an lan̄ bun̄.
Pedped in katak ko an gospel eo rej n̄an n̄a im kwe ta eo juon jila ej n̄an juon tima. Pedped in katak ko rejim̧we rej kōmaron̄ kōj n̄an kappukot iaļad im n̄an jutak pen im dim, im jab m̧akūtkūt bwe jejjab ellālee im wōtļo̧k ilo ļan̄ ko remarok rekōmetak im tarpok ko ilo raan ko āliktata.