“Jojomare Jemānāe Eo Ad Kar Im̧weo Ekwojarjar,” N̄an Kōkajoorļo̧k Jodikdik ro, Māe 2021.
M̧wen̄an eo an Ālkin Rālep in Jabōt
Jojomare Jemānāe Eo Ad Kar Im̧weo Ekwojarjar
Jijiddikdik in
Ilo tōre in ekainepata, ikar en̄jake n̄an ekōnono kōn Jemānāe eo eim̧we an United States. Jemānāe in ewōr an aorōk āinjuon n̄an membōr ro ad ilo United States, bōtaab ej barāinwōt juon m̧ōņōkjān eo jemānāe ko laļ ko ipeļaakin laļ in rej ļoore. …
Tōmak eo ad ilo im̧we eo ekwojarjar ej leļo̧k n̄an Armej ro Rekwojarjar ilo Raan Ko Āliktata juon eddo āinjuon n̄an kautiej im bōbrae Jemānāe eo an United States im pedped in katak ko an jemānāe jekdo̧o̧n ia jej mour ie. Jej aikuj lōke ilo Irooj im ļōmņak em̧m̧an kōn ilju im jekļaj eo an laļ in.
Bar ta Armej ro Rekwojarjar ilo Raan Ko Āliktata ren kōm̧m̧ane? Jej aikuj jar n̄an Irooj bwe en tōl im kōjeraam̧m̧an aolep laļ ko im ritōl ro aer. Menin ej m̧ōttan pedped in tōmak ko ad. Tōmak ilo tōl an būreejtōn ro ak ripepe ro aaet jab kōm̧m̧an kabbōjrak n̄an jum̧ae eo ad n̄an kajjojo kien im kakien ko. Ej menin aikuj bwe jen kōjerbal kareel eo ad ilo jekjek eo em̧m̧an im aenōm̧m̧an ilowaan wōt m̧ōņōkjān an jemānāe ko ad im kakien ko rekkar. Ilo unin kōnono ko jej bōk kuņaad ie, jej aikuj jipan̄ ro rejjab errā bwe ren errā.
Ebar wōr jerbal ko me rej m̧ōttan kōjparok Jemānāe eo kar im̧we. Jej aikuj ekaktak im jojomare pedped in katak ko kar im̧we an Jemānāe eo. Jej aikuj kappukōt im rie armej ro rōlo̧ļe im em̧m̧an me renaaj rie pedped in katak ko ilo jerbal ko aer ilo̧bwilej (lale Katak im Bujen Ko 98:10). Jej aikuj rilaļ ro rōkapeel me rej niknik ilo kōm̧m̧an bwe kareel eo ad en en̄jake ilo jerbal ko aer ilo kien.