« ការបម្រើជាអ្នកផ្សព្វផ្សាយសាសនាបានផ្ដល់ពរដល់ជីវិតខ្ញុំជារៀងរហូត » ដើម្បីកម្លាំងនៃយុវជន ខែ ឧសភា ឆ្នាំ ២០២២ ។
សម័យប្រជុំព្រឹកថ្ងៃសៅរ៍
ការបម្រើជាអ្នកផ្សព្វផ្សាយសាសនាបានផ្ដល់ពរដល់ជីវិតខ្ញុំជារៀងរហូត
ការដកស្រង់
ពេលខ្ញុំក្រឡេកមើលទៅអតីតកាលរបស់ខ្ញុំ ខ្ញុំបានឃើញបទពិសោធន៍ជាក់លាក់ដែលបានធ្វើឲ្យមានភាពខុសគ្នាយ៉ាងខ្លាំងមួយ ។ បទពិសោធន៍មួយនោះ គឺជារបៀបដែលការបម្រើជាអ្នកផ្សព្វផ្សាយសាសនាពេញម៉ោងរបស់ខ្ញុំនៅប្រទេសអង់គ្លេសបានប្រទានពរដល់ជីវិតខ្ញុំ ហើយបង្កើតរូបរាងជោគវាសនាខាងវិញ្ញាណខ្ញុំ ។ …
ការបម្រើជាអ្នកផ្សព្វផ្សាយសាសនារបស់ខ្ញុំបានរៀបចំខ្ញុំឲ្យធ្វើជាស្វាមី និងឪពុកកាន់តែល្អ ព្រមទាំងជោគជ័យនៅក្នុងអាជីវកម្មផងដែរ ។ វាក៏បានរៀបចំខ្ញុំសម្រាប់ការបម្រើព្រះអម្ចាស់ និងសាសនាចក្ររបស់ទ្រង់ពេញមួយជីវិតផងដែរ ។ …
ព្រះអម្ចាស់ស្គាល់បងប្អូន ។ ពេលបងប្អូនកំពុងបម្រើបេសកកម្ម នោះបងប្អូននឹងមានបទពិសោធន៍ដែលនឹងជួយបងប្អូនឲ្យស្គាល់ទ្រង់កាន់តែល្អប្រសើរ ។ …
ក្នុងនាមជាសាវកមួយរូបរបស់ព្រះអម្ចាស់ព្រះយេស៊ូវគ្រីស្ទ ឥឡូវនេះខ្ញុំសូមអំពាវនាវដល់យុវជន—និងយុវនារីដែលមានបំណងចង់បម្រើបេសកកម្ម—ឲ្យចាប់ផ្ដើមឥឡូវនេះ ពិភាក្សាជាមួយនឹងឪពុកម្ដាយរបស់ក្មួយៗអំពីការបម្រើបេសកកម្ម ។ ខ្ញុំក៏សូមអញ្ជើញក្មួយឲ្យពិភាក្សានឹងមិត្តរបស់ក្មួយអំពីការបម្រើបេសកកម្មផងដែរ ហើយបើមិត្តរបស់ក្មួយៗណាម្នាក់មិនប្រាកដក្នុងចិត្តអំពីការបម្រើបេសកកម្ម សូមលើកទឹកចិត្តពួកគេឲ្យពិភាក្សានឹងប៊ីស្សពរបស់ពួកគេ ។
សូមតាំងចិត្តខ្លួនឯង និងចំពោះព្រះវរបិតាសួគ៌របស់ក្មួយៗថា ក្មួយៗនឹងបម្រើបេសកកម្ម ហើយចាប់ពីពេលនេះទៅ ក្មួយៗនឹងខិតខំរក្សាដួងចិត្ត ដៃ និងគំនិតរបស់ក្មួយៗឲ្យស្អាតស្អំ និងស័ក្ដិសម ។ ខ្ញុំសូមអញ្ជើញក្មួយៗឲ្យទទួលបានទីបន្ទាល់ដ៏រឹងមាំអំពីដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញ ។ …
ខ្ញុំសូមអធិស្ឋានឲ្យក្មួយៗដែលជាយុវជន និងយុវនារី ព្រមទាំងឪពុកម្ដាយនឹងមើលឃើញ ហើយស្គាល់ថាការបម្រើជាអ្នកផ្សព្វផ្សាយសាសនា នឹងផ្ដល់ពរដល់ជីវិតរបស់ក្មួយៗជារៀងរហូតរបៀបណា ។