« យើង គឺជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ » ដើម្បីកម្លាំងនៃយុវជន ខែឧសភា ឆ្នាំ ២០២២ ។
សម័យប្រជុំព្រឹកថ្ងៃសៅរ៍
យើង គឺជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ
ការដកស្រង់
បន្ទាប់ពីទទួលបានការអញ្ជើញឲ្យ « ចូរតាមខ្ញុំទៅមើលចុះ »[ យ៉ូហាន ១:៤៦ ] ខ្ញុំបានចូលរួមសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយជាលើកដំបូងនៅអាយុ ២៦ ឆ្នាំ ។ ខ្ញុំទើបតែបែកពីស្វាមីដំបូងរបស់ខ្ញុំថ្មីៗ ។ ខ្ញុំមានកូនប្រុសអាយុបីឆ្នាំម្នាក់ ។ ខ្ញុំមានអារម្មណ៍ថាទន់ខ្សោយ និងភ័យខ្លាច ។ នៅពេលខ្ញុំចូលទៅក្នុងអគារ ខ្ញុំមានពេញដោយភាពកក់ក្ដៅពេលខ្ញុំឃើញសេចក្ដីជំនឿ និងអំណររបស់មនុស្សនៅជុំវិញខ្ញុំ ។ …
ឱ សិស្សព្រះគ្រីស្ទអើយ ចូរយើងកុំមើលស្រាលកិច្ចការដ៏អស្ចារ្យរបស់ព្រះអម្ចាស់ដែលកំពុងធ្វើតាមរយៈ យើង ដែលជាសាសនាចក្ររបស់ទ្រង់ឡើយ ទោះបីជាយើងមានភាពទន់ខ្សោយក្ដី ។ ពេលខ្លះ យើងគឺជាអ្នកផ្ដល់ឲ្យ ហើយពេលខ្លះ យើងជាអ្នកទទួលយក ប៉ុន្តែយើងទាំងអស់គ្នាគឺជាគ្រួសារតែមួយក្នុងព្រះគ្រីស្ទ ។ …
… សាសនាចក្រពុំគ្រាន់តែជាអគារ និងរចនាសម្ព័ន្ធសាសនាទេ តែសាសនាចក្រគឺជា យើងទាំងអស់គ្នា ដែលជាសមាជិក ។ យើង គឺជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដោយមានព្រះគ្រីស្ទជាព្រះសិរសា ហើយព្យាការីជាអ្នកថ្លែងព្រះបន្ទូលរបស់ទ្រង់ ។ …
គោលបំណងរបស់យើងនៅក្នុងនគររបស់ទ្រង់ គួរតែជាការនាំគ្នាទៅរកព្រះគ្រីស្ទ ។ …
ពីក្មេងប្រុសម្នាក់ដែលថ្វាយដង្វាយមួយភាគក្នុងដប់ដោយសេចក្ដីជំនឿ ទៅដល់ម្ដាយមេម៉ាយម្នាក់ដែលត្រូវការព្រះគុណដ៏មានអំណាចរបស់ព្រះអម្ចាស់ ទៅដល់ឪពុកដែលតស៊ូដើម្បីផ្គត់ផ្គង់គ្រួសារ ទៅដល់បុព្វការីជនរបស់យើងដែលត្រូវការពិធីបរិសុទ្ធនៃសេចក្ដីសង្គ្រោះ និងភាពតម្កើងឡើង ហើយមកដល់យើងម្នាក់ៗដែលរំឭកសេចក្ដីសញ្ញាជាមួយព្រះជារៀងរាល់សប្ដាហ៍ គឺយើងត្រូវការគ្នាទៅវិញទៅមក ហើយយើងអាចនាំគ្នាទៅរកការព្យាបាលដ៏ប្រោសលោះរបស់ព្រះអង្គសង្គ្រោះបាន ។