Sea Fruktífero, Multipliká i Someté e Tera

Pa Elder Joseph W. Sitati

Di e Setenta

Imagen

Tata Selestial a manda i a bendishoná nos pa ta fruktífero, multipliká, i someté e tera pa nos por bira manera E.

Danki, Koro di Tabernakel, pa e bunita homenahe na e Salbador di mundu.

Den e dia ku Dios e Tata a yama Su Yu Unigénito pa traha hende den Nan imágen i semehansa, El a bendishoná Su yunan, bisando, “Sea fruktífero, i multipliká, i yena e tera, i someté, i tin dominio … riba tur kos bibu ku ta move riba e tera.”¹ Pues, nos biahe mortal a kuminsá ku kargo dibino i un bendishon. Un Tata amoroso a duna nos e mandamentu i e bendishon pa ta fruktífero, i pa multipliká i pa tin dominio p’asina nos por desaroyá i bira hasta meskos ku E ta.

Rumannan, e atardi aki mi ta invitá boso fe i orashon ora mi ta kompartí algun pensamentunan ku boso tokante tres atributo fundamental di nos naturalesa dibino. Mi orashon ta ku nos tur por rekonosé i kumpli kompletamente ku nos responsabilidat sagrado---nos tata su enkargo---pa desaroyá nos naturalesa dibino p’asina nos por hasi nos biahe ku mas éksito i optené nos destino dibino.

Promé, Dios Manda Nos pa Ta Fruktífero

Un parti importante di ser fruktífero ku tin biaha ta wòrdu ignorá ta esun di trese e reino di Dios na tera. E Salbador a siña:

“Ami ta e mata di wendrùif; boso ta e takinan. Esun ku keda den Mi i Ami den dje, lo karga hopi fruta, pasobra boso no por hasi nada sin Mi.

“Si boso keda den Mi i mi palabranan keda den boso, pidi e ora ei loke boso ke i boso ta hañ’é.

Den esaki mi Tata ta glorifiká i pa boso karga hopi fruta, asina boso ta bira mi disípulonan.”²

Nos ta bira fruktífero ora nos ta permanesé den Cristu i ora nos ta hasi kombenio pa tuma riba nos e nòmber di JesuCristu i sirbié te na fin ”³ dor di yuda otronan bini na Dje.

Den nos tempu, profetanan i apòstelnan bibu ta sigui elevá nan stèm pa invitá kada un di nos pa partisipá totalmente den e obra di salbashon segun nos abilidat i oportunidatnan.

E punto di kuminsamentu di un kontesta ku ta produsí hopi fruta ta pa “ta mansu i humilde di kurason.”⁴ E ora ei nos por bini na Cristu mas kompletamente segun nos ta konsedé na e inspirashonnan di e Spiritu Santu i warda tur e kombenionan ku nos a hasi.⁵ Nos por buska i risibí e don di karidat i tin e poder pa invitá nos mes famianan,antepasadonan, i nos bisiñanan miembro i no miembro i amigunan pa risibí e evangelio di JesuCristu.

Obra den e spiritu di karidat no ta un obligashon pero un goso. Desafionan ta bira oportunidatnan pa edifiká fe. Nos ta bira “testigunan di [e bondat di] Dios na tur momento i den tur kos, i na tur lugá ku [nos] por ta den, hasta te na morto.⁶

Nos tur por bira kompletamente komprometé den e obra di salbashon. E Salbador a duna nos e siguiente responsabilidat ku un promesa: “Mi a skohe boso, i ordená boso, pa boso bai i karga hopi fruta, fruta ku ta keda: loke boso pidi e Tata den mi nòmber, e lo duna boso.”⁷

Di dos: Dios a Manda Nos pa Multipliká

Nos kurpa físiko ta un bendishon di Dios. Nos a risibié ku e propósito pa kumpli ku Tata Selestial su obra “pa hasi posibel e inmortalidat di hende.⁸ E kurpa ta e medio pa kua nos por optené nos potensial dibino.

E kurpa ta pèrmití Tata Selestial su yunan obediente pa eksperensiá bida na mundu.⁹ Hañamentu di yu ta duna otro yunan spiritual di Dios e oportunidat pa tambe tin goso na mundu. Tur ku nase den mortalidat tin e oportunidat pa progresá i pa ta eksaltá si nan obedesé Dios su mandamentunan.

Matrimonio entre un hòmber i un muhé ta e institushon ku Dios a ordená pa e kumplimentu di e enkargo pa multipliká. Un relashon entre persona di mes un sekso no ta multipliká.

Un matrimonio legal i seyá den tèmpel i den kua e kombenionan seyadó ta wòrdu honrá ta duna mayornan i nan yunan e oportunidat pa e mihó eksperensianan di amor i preparashon pa un bida fruktífero. E ta ofresé nan e ambiente ideal den kua nan por biba nan kombenionan hasí ku Dios.

Pa motibu di Su amor pa nos, Tata Selestial a sòru pa tur Su yunan fiel ku ta i no por gosa di e bendishonnan di un matrimonio den kombenio i di yunan òf un plenitut di e bendishonnan ei pa motibunan ku no ta nan falta, lo gosa di e bendishonnan aki den e tempu apuntá pa Señor.¹⁰

Profetanan i apòstelnan bibu a konsehá pa tur ku tin e oportunidat pa drenta den e kombenio di matrimonio eterno pa prosedé den sabiduria i fe. Nos no mester posponé e tempu di e dia sagrado aki pa motibu di okupashonnan mundano òf tin espektativa pa un kompañero adekuá na un nivel ku ta deskualifiká tur posibel kandidato.

E promesa na tur ku ta seyá den e kombenio di matrimonio eterno i ku ta fruktífero dor di warda nan kombenionan ta ku e atversario nunka lo tin e poder pa debilitá fundeshi di nan kompañerismo eterno.

Di tres: Dios a Enkargá Nos pa Someté e Tera

Pa someté e tera i tin dominio riba tur kos bibu ta pa kontrolá e kosnan aki p’asina nan por kumpli ku e boluntat di Dios¹¹i sirbi e propósitonan di Su yunan. Someté ta inkluí logra dominio riba nos kurpa. ¹² E no ta nifiká pa ta víktimanan desampará di e kosnan aki òf usa nan kontrario na e boluntat di Dios.¹³

Desaroyá e abilidat pa someté e kosnan di mundu ta kuminsá ku humildat pa rekonosé nos debilidatnan humano i e poder disponibel na nos pa medio di Cristu i Su Ekspiashon. Pasobra Cristu a bisa: “Si bo tin fe den mi lo bo tin poder pa hasi kualke kos ku ta nesesario den mi.” ¹⁴ E poder aki ta disponibel na nos ora nos skohe pa aktua den obedensia na Su mandamentunan. Nos ta oumentá nos abilidat pa buska e don di e Spiritu i dor di desaroyá nos talentonan.

Mi a nase i a lanta den sirkunstansianan humilde típiko di hopi famia na Afrika. Mi a haña e abilidat pa elevá mi mes for di e sirkunstansianan dor di buska i optené, un bon edukashon, ku e yudansa i kuido di mi mayornan. Desaroyá un vishon di kiko mi por a bira tabata esensial pa mi progreso. Despues komo un pareha yòn, mi kasá Gladys, i ami a haña e evangelio restourá, ku ta sigui bendishoná nos bida ku guia spiritual. Meskos ku tur famia, nos tin nos pruebanan i desafionan. Pero ora nos mira na Señor pa yudansa, nos ta haña e kontestanan ku ta trese pas i konsuelo, i nos no ta sinti aplastá pa e kosnan aki.

E desafionan ku sosiedat humano ta enfrentá awendia, inkluyendo inmoralidat, pornografia, konflikto armá, polushon, droga, i pobresa, ta floresé pasobra hopi den e mundu a bira nan mes pa skohensia “na e boluntat di diabel i e karni”¹⁵ mas bien ku na esun di Dios. Nan no ta buska Señor pa establesé su rektitut,pero kada hòmber ta kana den su mes kaminda, i tras di e imágen di su mes dios, kua su imágen ta meskos kua esun di mundu. ¹⁶

Sinembargo, Dios ta invitá turSu yunan pa optené Su yudansa pa vense i soportá e desafionan di e bida aki ku e palabranan aki:

El a krea e mundu, i hende promé ku nan ta eksistí den karni.

El a bisa ku si nos bira na dje, i skucha su stèm, i kere, i arepentí di tur nan transgreshonnan, i boutisá, hasta den awa, den e nòmber di mi Yu Unigénito, nos lo risibí e don di e Spiritu Santu, pidiendo tur kos den Su nòmber, i loke sea ku nos pidi, e lo wòrdu duná na nos.¹⁷

Fiel Santunan di Delaster dia ku ta komprondé e potensial dibino i ta dependé totalmente riba e poder disponibel a traves di e Ekspiashon di Señor JesuCristu ta wòrdu fortalesé den nan debilidatnan natural i “por hasi tur kos.”¹⁸ Nan ta kapasitá pa vense e sugerensianan di e malu ku a pone hopi bou di koutiverio di e atversario. Pablo a siña:

“Dios ta konfiabel,[i] lo e no pèrmití pa boso pasa dor di prueba ku ta surpasá boso forsa; pero e lo sòru pa un salida, di moda ku boso por soportá e prueba.”¹⁹

“Komo E mes a pasa den prueba i a sufri, E por yuda tur esnan ku ta pasa den prueba.”²⁰

Tata Selestial a manda i a bendishoná nos pa nos ta fruktífero, pa multipliká, i someté e tera pa nos por bira meskos ku E ta. El a hasi yudansa alkansabel pa nos kada un por, segun nos skohensia individual, aktualmente krese i bira meskos ku n’e. Mi ta spera ku nos tur por biba nos bida di tal manera ku no por ta guia pa e vishon di nos naturalesa dibino, reklamá tur nos privilegionan, i kumpli ku nos destino dibino.

Mi ta testifiká di e realidat bibu di Dios e Tata i di Su Yu Stimá, nos Salbador JesuCristu; di Su glorioso plan di felisidat; i di e yabinan ku E sòru pa ta otorgá na un profeta bibu na mundu awe, hasta Thomas S. Monson, ken nos ta stima i sostené. Mi pidi ku nos por in poder pa gosa di e plenitut di Su bendishonnan den e nòmber di JesuCristu,amèn.