E Famia Ta di Dios

Pa Carole M. Stephens

Promé Konsehero den e Presidensia General di Sosiedat di Sokoro

Imagen

Nos kada un ta pertenesé e famia di Dios i ta nesesario den dje.

Tin algu mas bunita i profundo ku e berdatnan puru i simpel di e evangelio siñá den un kantika di Primaria? I boso tur muchanan muhé di Primaria presente aki awe nochi konosé e kantika ku mi ta bai papia ariba. Boso a siñ’é pa boso programa di Primaria di aña pasá.

Den e palabranan di “E Famia ta di Dios” ¹—kantá mas promé den e reunion aki—nos ta wòrdu rekordá di doktrina puru. Nos no ta siña solamente ku e famia ta di Dios pero tambe ku kada un di nos ta parti di Dios su famia.

E promé liña di e kantika ta siña: “ “Nos Tata tin un famia. Ta ami! Ta abo, tur otro tambe: nos ta Su yunan.” For di e proklamashon di famia, nos ta siña, “Den e esfera premortal, yunan spiritual tantu hòmber i muhé tabata konosé i adorá Dios manera nan Tata Eterno.” Den e esfera aki, nos a siña tokante di nos identidat femenino. Nos tabata sa ku kada un di nos tabata “un Yu muhé stimá… di mayornan selestial.”²

Nos biahe mortal na tera no a kambia e berdatnan ei. Nos kada un ta pertenesé na e famia di Dios i ta nesesario den dje. Tur famia terenal ta mustra diferente. I miéntras nos ta hasi e mihó ku nos por pa krea tradishonnan familiar fuerte, miembronan den e famia di Dios no ta dependé riba algun tipo di estado—estado matrimonial, estado finansiero, estado sosial,òf hasta e tipo di estado ku nos ta pone riba media sosial.

Nos ta pertenesé. “Nos ta yunan muhé di nos Tata Selestial, ku ta stima nos, i nos ta stim’É.” ³

E di dos liña di e kantika ta amplia esun di promé. “ El a manda kada un di nos na mundu, pa medio di nasementu, pa biba i siña aki den famianan.”

Den e bida premortal, nos a siña ku nos lo tin mester di un periodo di mortalidat. Nos a “aseptá[Tata Selestial su] plan pa kua Su yunan por optené un kurpa físiko i haña eksperensia di mundu pa progresá te na perfekshon i finalmente realisá [nos] destino dibino komo herederonan di bida eterno.” ⁴

Elder Richard G. Scott a splika ku “nos a siña den e bida premortal ku nos propósito pa bini aki ta pa wòrdu di tèst, probá, i krese.. ⁵ E kresementu ei ta bini den mes tantu forma ku tin persona pa eksperensi’é. Nunka mi no mester a pasa dor di divorsio, e doló i inseguridat ku ta bin for di abandono, òf e responsabilidat asosiá di ta un mama soltero. Mi no a eksperensiá e morto di un yu, infertilidat, òf atrakshon pa persona ku mes un sekso. Mi no a eksperensiá pa soportá abuso òf malesa króniko òf adikshon. Esakinan no tabata mi oportunidatnan pa krese.

Asina ku awor aki mes algun di boso ta pensando, “Hermana Stephens, simplemente bo no ta komprondé!” Mi ta kontestá ku kisas boso lo tin rason. Mi no ta komprondé boso desafionan kompletamente. Pero dor di mi tèstnan i pruebanan personal --- esunnan ku a trese mi na mi rudianan mi a bira bon konosí ku Esun ku si ta komprondé—E ku tabata “konosí ku tristesa, ⁶ ku a eksperensiá i ta komprondé tur kos. Ademas, mi a eksperensiá tur e tèstnan mortal ku mi a kaba di menshoná dor di e lèns di yu muhé, mama, wela, ruman muhé,tanta, i amiga.

Nos oportunidat komo yunan muhé di Dios ku ta warda kombenio no ta djis pa siña for di nos propio desafionan; e ta pa uni den empatia i kompashon ora nos ta sostené otro miembronan di e famia di Dios den nan luchanan, manera nos a kombení pa hasi.

Ora nos ta hasi asina, no lo komprondé tambe i konfia ku e Salbador konosé e difikultatnan di e kaminda i por guia nos dor di kualkier tristesa i desepshonnan ku lo bini. E ta e karidat berdadero, i Su amor “ta dura pa semper”⁷— den parti pa medio di nos---- ora nos ta siguié.

Komo yunan muhé di Dios i disípulonan di Hesu Kristu, e ora ei nos ta “aktua di akuerdo ku e kompashon ku Dios a planta den nos [kurason].” ⁸ Nos esfera di influensia no ta limitá na miembronan di nos famia.

Imagen

Photo of Sister Yazzi and Sister Yellowhair

Resientemente mi tabatin e oportunidat pa bishitá Hermana Yazzie di e Staka Chinle Arizona den su hogan [kas di pal’i maishi]. Ora el a yama mi bonbiní den su kas, e promé kos ku mi a ripará tabata e variedat di potrètnan di famia i mishoneronan den leshi riba murayanan i mesanan. Pues mi a puntra:”Hermana Yazzie Kuantu nietu bo tin?”

Sorpresá pa mi pregunta, el a hisa su skouder. Konfuso pa su kontesta, mi a wak su yu muhé, Hermana Yellow hair, ku a kontestá, “E no sa kuantu nietu e tin. Nos no ta konta. Tur mucha ta yam’é ‘Wela’---e ta Wela pa tur hende.”

Hermana Yazzie no ta limitá su amor i influensia na su famia biológiko. E ta komprondé kiko kier men pa ekspandé su esfera di influensia segun e ta bai hasiendo bon, bendishonando, kuida, i defendé e famia di Dios. E ta komprondé ku “ki ora ku un muhé ta fortalesé e fe di un mucha, e ta kontribuí na e forsa di un famia,awor i den futuro.”⁹

E di tres liña di e kantika ta sigui splika e propósito di nos mortalidat: “Dios a duna nos famia pa yuda nos bira lokual E ke pa nos ta.” E Salbador a siña, “Sea un; i si boso no ta un boso no ta di mi.” ¹⁰ E proklamashon di famia ta siña ku komo yunan muhé spiritual stimá di mayornan selestial, nos tin un naturalesa dibino, identidat eterno, i propósito. Dios ke pa nos ta un---yunan muhé ku ta warda kombenio uní den e diversidat di nos bidanan individual, ¹¹ i ku ta deseá pa siña tur esaki ta nesesario pa ta bèk den Su presensia, seyá na Dje komo parti di Su famia eterno.

“Ordenansanan sagrado i kombenionan disponibel den tèmpelnan santu ta hasi posibel pa [nos] por bolbe den e presensia di Dios i pa famianan por ta uní eternamente.” ¹² E ordenansanan ku nos ta risibí i e kombenionan ku nos ta hasi na boutismo i den santu tèmpelnan ta konektá e famia di Dios na tur dos banda di e velo---konektando nos na nos Tata pa medio di e Su Yu, ku a hasi orashon, “Pa nan tur por ta un; meskos ku abo, Tata, ta un den mi, i ami den bo, pa nan tambe por ta un den nos.” ¹³

Ora nos ta usa nos tempu den mortalidat pa studia i apliká e Salbador su enseñansanan, nos ta bira mas meskos ku E. Nos ta yega na komprondé ku E ta e kaminda---e úniko kaminda--- nos por vense desafionan mortal, kura, i bolbe bèk na nos hogar selestial.

E delaster liña di e kantika ta bolbe na e kuminsamentu: “Asina ta manera ku E ta kompartí Su amor, pa e famia di Dios.” E plan di e Tata pa su yunan ta un plan di amor, i e ta un plan pa uni Su yunan---Su famia ----ku n’e. Elder Russell M. Nelson a siña: “Tata Selestial tin dos deseo pa Su yunan … : inmortalidat i bida eterno, ‘ku ta nifiká biba ku n’e bèk na kas.” ¹⁴E deseonan aki por wòrdu realisá solamente si nos tambe ta kompartí e amor ku nos Tata Selestial tin pa Su famia dor di saka man pa kompartí Su plan ku otronan.

Binti aña pasá, e Promé Presidensia i e Quorum di e Diesdos Apòstelnan a yega serka di henter mundu ora a emití un proklamashon na e famia pa. Despues di esei, atakenan riba famia a oumentá.

Si nos ke ta eksitoso den nos responsabilidatnan sagrado komo yunan muhé di Dios, nos mester komprondé e nifikashon eterno di i nos responsabilidat individual pa siña bèrdat tokante di nos Tata Selestial su plan pa Su famia. Presidente Howard W. Hunter a splika:

“Tin nesesidat grandi pa reuní e muhénan di Iglesia pa para huntu ku e hermanonan den stòpmentu di e oumento di maldat ku ta rondoná nos i pa hiba e obra di nos Salbador dilanti .

“ … Asina ku nos ta roga boso pa ministrá ku boso influensia poderoso pa bon den fortalesé nos famianan, nos iglesia, i nos mandamentu nan. ¹⁵

Hermananan, Nos ta stimá; Nos ta nesesario; Nos tin un propósito, un trabou, un lugá, i un ròl dibino den e iglesia i reino di Dios i den Su famia eterno. Boso sa te den profundidat di boso kurason ku boso Tata Selestial ta stima boso i ta deseá boso i tur esunnan ku boso ta stima pa ta ku n’É? Meskos ku Tata Selestial i Su Yu, Hesu Kristu ta perfekto …, Nan speransa pa nos ta perfekto.” ¹⁶ Nan plan pa nos ta perfekto, i Nan promesanan ta sigur. Di e berdatnan aki mi ta testifiká ku gratitut den e nòmber di Hesu Kristu, amèn.