E Generashon mas Grandioso di Hóbennan Adulto

Pa Elder M. Russell Ballard

Di e Quorum di Djesdos Apòstelnan

Loke nos mester awor ta e mihó generashon di hóbennan adulto den historia di e Iglesia. Nos mester boso henter kurason i alma.

Un di e plasernan grandi ku mi ta gosa ora ku mi ta biaha rònt mundu ta e oportunidat pa konosé i kuminda nos mishoneronan. E gran eldernan i e hermanas ta reflehá e Lus di Cristu, i semper mi ta wòrdu inspirá pa nan amor pa e Señor JesuCristu i pa nan servisio ku deboshon na Dje. Kada bia ku mi ta tuma nan man pa kuminda i sinti nan spiritu i fe, mi ta bisa na mi mes, “E yunan hòmber i muhé aki di nos ta berdaderamente un milager!”

Durante e reunion general di saserdosio di Òktober 2002, mi a desafiá e obispunan, mayornan, mishoneronan futuro pa “hisa e norma” pa servisio di mishonero di tempu kompletu.

Mi a bisa e tempu ei “loke nos mester… ta e mihó generashon di mishoneronan den historia di e Iglesia. Nos mester mishoneronan digno, kalifiká, spiritualmente yená ku energia. …

“…Nos mester di boso henter kurason i alma. Nos mester mishoneronan vibrante, ku pensamentu i pashon ku sa kon pa tende i kontestá na e susuronan di e Spiritu Santu.”¹

Di hopi manera e mundu di awe tin mas desafio ku e tabata 13 aña pasa. Nos Hombres y Mujeres Jovenes tin hopi mas distraishon pa desviá nan den nan preparashon pa tantu un mishon komo un bida futuro felis. Teknologia a ekspandé, i kasi tur hende tin akseso na dispositivo elektróniko ku por kaptura e atenshon di e famia humano di Dios pa tantu [kosnan] bon komo pa maldat grandi.

Awe nochi, mi ta papia ku mishoneronan ku awor ta sirbiendo, futuro mishoneronan, mishonero ku a regresá, i tur adulto hóben di e Iglesia. Mi ta hasi orashon pa boso komprendé i konsiderá loke mi tin ku bisa boso miéntras ku boso ta biaha pa medio di e añanan aki di animo i demanda di boso bida.

Den e promé dianan di e Iglesia, mishoneronan tabata wòrdu entrevista pa un Outoridat General promé ku nan a bai nan mishon. E dianan aki boso ta wòrdu entrevistá pa sirbi komo mishonero dor di boso obispu i presidente di staka, i kasi boso tur lo bai den bida sin wòrdu entrevistá pa un Outoridat General. Esei ta djis un reflekshon di e realidat den un iglesia mundial di mas ku 15 mion miembro. Mi sa ku mi ta papia na nòmber di mi rumannan ora mi ta bisa boso ku nos ke pa e ta posibel pa nos konosé boso tur personalmente i por bisa boso ku nos ta stima boso i ku nos ta apoyá boso.

Afortunadamente e Señor a duna maneranan pa nos yega na boso. Por ehèmpel, un miembro di e Quorum di e Diesdos Apòstelnan ta asigná kada mishonero na su mishon. Ounke esaki ta wòrdu hasí sin e entrevista tradishonal kara a kara, teknologia i revelashon ta kombiná pa un duna un eksperiensha remarkabel íntimo i personal. Laga mi bisa boso kon esaki ta pasa.

Boso potrèt ta aparesé riba e pantaya di e kòmpiuter, huntu ku e informashon klave ku a wòrdu duná pa medio di e obispu i presidente di staka. Ora boso potrèt aparesé, nos ta mira den boso wowo i revisá boso kontestanan riba e preguntanan di rekomendashon misional. Pa e momentu kòrtiku ei, e ta parse manera si boso ta presente i ta kontestá nos direktamente.

Miéntras ku nos ta mira boso potrèt, nos ta konfia ku boso a kumpli den tur manera pa “hisa e norma” rekerí awe pa ta un mishonero fiel i eksitoso. Anto, pa e poder di e Spiritu di Señor i bou di e direkshon di Presidente Thomas S. Monson, nos ta asigná boso na un di e 406 mishonnan rònt mundu.

No, e no ta e mesun entrevista personal kara a kara. Pero e ta hopi serka.

Konferensiá via video ta otro manera ku ta yuda nos pa yega na e lidernan di Iglesia i miembronan ku ta biba hopi leu for di e sede prinsipal di Iglesia.

Ku esaki den mente, mi ke pa esnan di boso ku ta prepará pa sirbi [un] mishon, esnan ku a kaba, i boso hóbennan adulto pa pasa algun minüt ku mi komo si nos tabatin un chat via video personal awor aki. Por fabor mirami pa algun minüt manera abo ku mi tabata e úniko hende den e kamber unda ku bo por ta awenochi.

Di mi parti, mi lo imaginá mi ku mi ta mirando den boso wowo i mi ta tende kuidadosamente boso kontesta riba algun pregunta ku mi ta kere lo bisa mi hopi tokante di e profundidat di boso testimonio i boso deboshon na Dios. Si mi por aksentuá loke mi a bisa e mishoneronan 13 aña pasá, loke nos mester awor ta e mihó generashon di hóbennan adulto den historia di e Iglesia. Nos mester boso henter kurason i alma. Nos mester hóbennan adulto vibrante, ku pensamentu i pashon ku sa kon pa tende i sigui na e susuronan di e Spiritu Santu ora ku boso ta traha boso kaminda den bidai dor di e pruebanan diario i tentashonnan pasó bo ta un hóben Santu di Delaster Dianan kontemporáneo.

Ku otro palabra, e ta tempu pa hisa e norma, no solamente pa mishonero pero tambe pa mishoneronan ku a regresá i pa henter boso generashon. P’esei, por fabor meditá den boso kurason boso kontestanan riba e preguntanan aki:

Boso ta studia e skrituranan regularmente?
Boso ta hinka rudia pa papia ku boso Tata Selestial kada mainta i kada anochi?
Boso ta yuna i duna un ofrenda di ayuno kada luna—aunke si boso ta pober, of estudiante ku no por duna hopi?
Boso ta pensa profundamente riba e Salbador i Su sakrifisio Ekspiatorio pa boso ora boso ta wòrdu pidí pa prepará, bendishoná, pasa, of partisipá di e santa sena?
Boso ta asistí [na] boso reunionnan i esforsá pa warda e Djadumingu santu?
Boso ta honesto na kas, skol, iglesia, i trabou?
Boso ta limpi mental i spiritualmente? Boso ta evitá di mira pornografia òf di mira na websites, revistanan, pelíkulanan, òf apps, inkluyendo Tinder i potretá Snapchat, ku lo duna bèrgwensa na boso, si boso mayornan, lidernan di Iglesia, òf e Salbador Mes lo mira boso?
Boso ta kuidadoso ku boso tempu—evitando teknologia inapropiá i media sosial, inkluyendo weganan di video, kua por redusí boso sensibilidat spiritual?
Tin algu den boso bida ku boso tin mester di kambia i drecha, kuminsando awe nochi?

Masha danki pa boso bishita personal kòrtiku. Mi ta spera ku boso a kontesta kada un di e preguntanan aki honestamente i despues di a pensá bon. Si boso ta haña ku boso ta falta den kualke di e prinsipionan simpel aki, e ora ei mi ta supliká boso pa arepentí ku kurashi i trese boso bida bèk segun e normanan di hustu disimulando

Awor rumannan, laga mi ofresé konseho adishonal ku lo yuda boso haña boso testimonio di e evangelio profundo den boso kurason i alma?

Mi ta kòrda boso mishoneronan ku a regresá ku boso preparashon pa bida i pa un famia mester ta kontinuo. “MR” no kermen “Mormon retirá!” Komo un mishonero ku a regresá, boso “mester traha masha duru den un bon kousa, i hasi hopi kos di boso mes boluntat, i trese hopi rektitut.”²

Por fabor usa e atributonan ku boso a siña den boso mishon pa bendishoná e bidanan di hende rònt di boso kada dia. No ahustá boso enfoke for di sirbi otronan pa enfoká eksklusivamente riba skol, trabou, òf aktividatnan soshal. Na lugá di esaki, balansá boso bida ku eksperienshanan spiritual ku ta kòrda i prepará boso pa ministrá kontinuamente otronan kada dia.

Durante boso mishon boso a siña e importansia di bishita hende den nan kas. Mi ta spera ku boso tur hóben adulto, sea ku boso a sirbi un mishon di tempu kompletu òf no, ta komprondé e importansia di bishita e hende ku ta sinti nan so, malu, òf desanimá—no djis komo un asignashon pero tambe dor di e amor genuino ku boso tin pa Tata Selestial i Su yunan.

Boso ku ta na skol sekundario preparando pa mishonnan, mi ta enkurashá boso pa partisipá na i graduá di seminario. Boso hóben adulto mester registrá den un instituto di religion. ³ Si boso ta asistí un skol di Iglesia, konvinsentemente inkluí un klas kada semèster di edukashon religioso. Durante e tempu importante aki di preparashon pa un mishon i matrimonio eterno i bida komo un adulto, boso mester sigui buska maneranan pa siña i krese i risibí inspirashon i guia pa medio di e Spiritu Santu. Un estudio kuidadoso i ku orashon di e evangelio pa medio di seminario, instituto, of lès di edukashon religioso por yuda boso den e meta ei.

Sea ku boso ta asistí un skol di Iglesia òf no, òf ku boso ta bai universidat òf no, no pensa ku boso ta hopi okupá pa studia e evangelio. Seminario, instituto, òf lès di religion lo duna boso un balanse den boso bida i añadí na boso edukashon sekular dor di duna boso otro oportunidat pa pasa tempu studiando e skrituranan i e siñansanan di e profetanan i apòstelnan. Tin kuater kurso nobo ekselente ku mi ta animá pa kada hóben adulto pa wak i asistí.⁴

I no lubidá ku e lèsnan i aktividatnan ofresé den boso instituto lokal òf pa medio di boso bario òf estaka di adulto soltero tambe lo ta un lugá unda boso por ta ku otro Hombres i Mujeres Jovenes pa hisa i inspirá otro ora ku boso ta siña i krese spiritualmente i sosialisá huntu. Rumannan si boso buta boso selular un banda i di bèrdat mira un tiki rònt di boso, boso por haña boso futuro kompañero na instituto.

Ku ta hiba mi na otro konseho chikí ku mi tin sigur ku boso tabata sa ku mi lo tabata bai papia. Boso adulto soltero mester sali i kasa. Por fabor stòp di posponé! Mi sa ku algun di boso tin miedu di formashon di famia. Tὸg, si boso kasa ku e persona korekto den e tempu korekto i den e kaminda korekto, boso no mester tin miedu. En realidat, hopi problema ku boso ta topa por wòrdu evitá si boso lo ta “traha hopi duru” den salimentu hustu, kortehá, i matrimonio. No manda teksto p’e! Usa bo mes stèm pa introdusí bo mes na e yunan muhé hustu di Dios ku tin tur rònt di bo. Pa tende di bèrdat un stèm humano por ta lo shòk e—kisas pa bisa si.

Awor, mi rumannan, mi ta testifiká na boso ku e Señor JesuCristu por yuda nos drecha kualke kos ku mester wòrdu drechá den nos bida pa medio di Su sakrifisio ekspiatorio.

Awe nochi, ora ku nos ta prepará pa selebrá mayan e Pasku di Resurekshon, por fabor laga nos kòrda riba e don di e Ekspiashon di Cristu. Kòrda ku nos Tata Selestial i nos Salbador, JesuCristu, ta konosé boso mihó i ta stima boso mas.

Pa medio di e Ekspiashon, e Redentor a tuma riba Su mes nos problemanan, dolónan, i pikanan. E Salbador di e mundu a bini pa komprendé kada un di nos individualmente pa medio di eksperimentá nos speransanan sin logro, desafionan, i tragedianan pa medio di Su sufrimentu den Getsemane i na e krus. .⁵ El a muri komo un akto final di amor pa nos i a wòrdu derá den un graf nobo e nochi históriko ei.

Riba Djadumingu mainta, Jesus a lanta for di e morto—primintiendo bida nobo pa kada un di nos. E Señor resusitá despues a outorisá Su disípulonan pa siña kada un pa tin fe den Cristu, arepentí di pika, wòrdu boutisá, risibí e don di Spiritu Santu, i perseverá te na final. Rumannan, nos sa ku Dios nos Tata i Su Yu Stimá a aparesé e Profeta Joseph Smith i restourá pa medio di dje e plenitut di e evangelio eterno di JesuCristu.

Sea fuerte, rumannan. Warda e mandamentunan di Dios. E Señor JesuCristu ta primintí ku tur kosnan ku nos ta deseá pa wòrdu hasí den rektitut lo ta di nos. Lidernan di Iglesia ta konta ku boso. Nos mester kada un di boso hóbennan adulto pa prepará pa kasa, pa sirbi, i pa guia den e dianan ku ta bini, pa esei mi ta hasi orashon humildemente den e nòmber di e Señor JesuCristu, amèn.