E Parábola di e Sembradó

Pa Elder Dallin H. Oaks

Di e Quorum di e Diesdos Apòstelnan

Imagen

Ta dependé di kada un di nos pa pone prioridatnan i pa hasi kosnan ku ta sòru pa e tera ta bon i pa nos kosecha ta abundante.

Tópikonan pa diskursonan di konferensha general no ta asigná pa outoridat mortal pero pa e impreshonnan di e Spiritu. Hopi tópiko ta trata e prekupashonnan mortal ku nos tur ta kompartí. Pero meskos ku Jesus no a siña kon pa vense e desafionan mortal òf opreshon polítiko di Su tempu, usualmente e ta inspirá Su sirbientenan moderno pa papia tokante kiko nos por hasi pa reformá nos bida personal pa prepará nos pa regresá na nos hogar selestial. Riba e wikènt di Pasku aki mi a sinti e impreshon pa papia tokante e enseñansanan presioso i sin fin den un di e parábolanan di Jesus.

E parábola di e sembradó ta un di e poko parábolanan relatá den tur e tres Evangelionan sinóptiko. E ta tambe hasta un di e gruponan mas chikitu di e parábolanan ku Jesus a splika na Su disípulonan. E simia ku a wòrdu sembrá tabata “e palabra di e reino” (Mateo 13:19), “e palabra” (Marko 4:14–15), òf “ e palabra di Dios” (Lukas 8:11)—e enseñansanan di e Maestro na Su sirbientenan.

E diferente teranan den kua e simia a kai ta representá diferente manera den kua mortalnan ta risibí i sigui e enseñansanan aki. Pues, e simianan ku a “kai na banda di kaminda” (Marko 4:4) no a alkansá tera mortal kaminda posiblemente nan por krese. Nan ta manera enseñansanan ku a kai den un kurason duru òf sin preparashon. Lo mi no bisa nada mas di esakinan. Mi mensahe ta konserní esunnan di nos ku a primintí pa ta siguidonan di Kristu. Kiko nos ta hasi ku e Salbador su enseñansanan segun nos ta biba nos bida?

E parábola di e sembradó ta atvertí nos di e sirkunstansianan i aktitutnan ku por stroba kada un di nos ku a risibí e simia di e mensahe di e evangelio pa logra un bon kosecha.

I. Tera ku Piedra, Sin Rais

Algun simia “a kai mei mei di piedra, kaminda e no tabatin muchu tera; i el a sali umbe, pasobra e e tera no tabata hundu: pero ora e solo a sali, el a kim’é; i pasobra e no tabatin rais, el a seka” (Marko 4:5–6).

Hesus a splika ku esaki ta deskribí esunnan ku “ora nan tende e palabra, mesora ta risibié ku alegria, “pero pa motibu ku nan “no tin rais den nan mes, … ora aflikshon òf persekushon lanta pa kousa di e palabra, mesora nan ta ofendí” (Marko 4:16–17).

Kiko ta okashoná ku esunnan ku a skuché “no tin rais den nan mes”? Esaki ta e sirkunstansia di miembronan nobo ku a kombertí meramente pa e mishoneronan òf na e hopi karakterístikanan atraktivo di e Iglesia òf na e hopi bendishonnan di miembresia di Iglesia. Sin tin rais den e palabra, nan por wòrdu kimá i ta kai afó ora oposishon lanta. Pero hasta esunnan ku a lanta den Iglesia---miembronan di hopi aña---por kai den un kondishon unda nan no tin rais den nan mes. Mi a konosé algun di esakinan---miembronan sin kombershon firme i duradero na e evangelio di JesuCristu. Si nos no tin rais fuerte den e enseñansanan di e evangelio i ta konstante den su práktikanan, kada un di nos por desaroyá un kurason di piedra, kua ta kaminda di piedra pa simianan spiritual.

Kuminda spiritual ta nesesario pa sobrebibensia spiritual, spesialmente den un mundu ku ta kitando for di e kerensia den Dios i den e kosnan apsoluto di bon i malu. Den un era dominá pa Internet ku ta magnifiká mensahenan ku ta menasá fe, nos mester oumentá nos eksposishon na berdatnan spiritual pa fortalesé nos fe pa keda firme den e evangelio.

Hóbennan, si e enseñansa aki ta parse muchu general, aki tin un ehèmpel spesífiko. Si e emblemanan di e santa sena ta wòrdu pasá i boso ta mandando mensahe òf ta susurá òf ta hungando wega di video òf hasiendo kualke otro kos pa ninga boso mes e kuminda spiritual esensial, boso ta separando boso raisnan spiritual i ta debilitá boso testimonio i ta bira mas difísil pa boso sinti e spiritu. Boso ta hasiendo boso mes vulnerabel na bira debil ora di eksperensiá tribulashon manera isolashon, intimidashon, òf ridikulisamentu. I esei ta konta pa adultonan tambe.

Un otro destruktor potensial di raisnan spiritual---aselerá pa teknologia aktual pero no úniko pe---ta e bista di evangelio òf Iglesia mirá dor di buraku di yabi. E bista limitá aki ta enfoká riba un doktrina partikular òf un defisiensia pèrsibí den un lider i ta ignorá e panorama grandi di e plan di evangelio i e frutanan personal i komun di su kosecha . Presidente Gordon B. Hinckley a duna un deskripshon bibu di un aspekto di e bista dor di buraku di yabi aki. El a bisa un oudiensia di BYU tokante komentaristanan polítiko “flama ku indignashon” na un resiente evento di prensa e tempu ei.”Ku habilidat nan ta papia rabiá i ku insulto. … Seguramente, ’’el a konkluí, “ ta masha aseptabel i popular pa papia den forma insultante den e tempu i lugá aki.” ¹ Al kontrario, pa tin rais fuerte den e evangelio nos mester ta moderá i ménos kritiko i semper ta buska pa e bista amplio di e obra mahestuoso di Dios.

II. Sumpiña: E Prekupashonnan di E Mundu aki i e Engaño di Rikesanan

Hesus a siña ku “algun a kai mei mei di sumpiña, i e sumpiñanan a krese, i a stek e, i e no a duna fruta” (Marko 4:7). El a splika ku esakinan ta “skucha e palabra, i e prekupashonnan di e mundu aki, i e rikesa ta blèndu nan i nan tin muchu gana di kos, tur e kosnan aki ta stek e palabra, i e ta bira infértil”(Marko 4:18–19). Esaki sigur ta un atvertensia pa nos tur hasi kaso na dje.

Promé lo mi papia di e rikesa ku ta blèndu. Unda ku nos ta den nos biahe spiritual---kualke sea nos estado di kombershon---nos tur ta wòrdu tentá pa esaki. Ora aktitutnan òf prioridatnan ta fihá riba e atkisishon, uso, òf poseshon di propiedatnan, nos ta yama esei materialismo. Asina tantu a wòrdu bisá i skibí tokante materialismo ku ta poko tin ku ta wòrdu añadí aki.² Esunnan ku ta kere den loke a wòrdu yamá e teologia di prosperidat ta sufriendo di e “rikesa ku ta blèndu.” E poseshon di rikesa òf entrada signifikante no ta un señal di fabor selestial, i nan ousensia no ta evidensia di falta di mizèrikòrdia selestial. Ora Jesus a bisa un siguidó fiel ku e lo heredá bida eterno si solamente e lo duna tur lokual e tabatin na e pober, (wak Marko 10:17–24), E no a identifiká maldat den e poseshonnan di rikesa pero un maldat den e aktitut di e siguidó pa ku n’e. Manera nos tur sa, Jesus a elogiá e bon Samaritano ku a usa e mesun tipo di plaka pa sirbi su próhimo ku Hudas a usa pa traishoná Su Salbador. E rais di tur maldat no ta plaka pero e amor pa plaka (wak 1 Timoteo 6:10).

E Buki di Mormon ta konta di un tempu ora ku e Iglesia di Dios “a kuminsá ta pega den su progreso” (Alma 4:10)} pasobra “e hendenan di e iglesia a kuminsá ta … pone nan kurason riba rikesanan i riba e kosnan vanidoso di mundu” (Alma 4:8).Ken ku tin un abundansia na kosnan material ta den peliger pa bira spiritualmente “turdí” pa e rikesanan i otro kosnan di e mundu. ³ Esei ta un introdukshon adekuá pa e siguiente enseñansanan di e Salbador.

E sumpiñanan di mas sutil pa stek e efekto di e palabra di evangelio den nos bida ta e forsanan mundano ku Jesus ta yama e “prekupashonnan i rikesanan i plasernan di e bida aki” (Lukas 8:14). Esakinan ta demasiado pa nombra. Algun ehèmpel ta sufisiente.

Na un okashon Jesus a kastigá Su Apòstel mayó, bisando na Pedro, “Bo ta un estorbo pa mi: bo no ta pensa manera Dios pero manera hende” (Mateo 16:23; wak tambe D&C 3:6–7; 58:39). Balorá e kosnan di hende ta nifiká pone e asuntunan di e mundu dilanti di e kosnan di Dios den nos akshonnan, nos prioridatnan, i nos pensamentu.

Nos ta entregá na e “plasernan di e bida aki” (1) ora nos ta bira adikto, kual ta stroba Dios su presioso don di albedrio; (2) ora nos ta tentá pa distraishonnan trivial, ku ta alehá nos for di kosnan di importansia eterno; i (3) ora nos tin un mentalidat di derechi, ku ta perhudiká e kresementu personal nesesario pa kualifiká nos destino eterno.

Nos ta vensé pa e prekupashonnan di e bida aki ora nos ta paralisá pa miedu di e futuro, ku ta stroba nos di bai dilanti den fe, konfiando den Dios i Su promesanan. Bintisinku aña pasá mi maestro apresiá di BYU, Hugh W. Nibley, a papia di e peligernan di entregá na e prekupashonnan di mundu. A wòrdu puntrá na dje den un entrevista ku e kondishonnan di mundu i nos deber pa kompartí e evangelio ta hasi deseabel pa buska algun manera pa “ta komplasiente ku e mundu den e lokual nos ta hasi den Iglesia.”⁴

Su kontesta: “Esei tabata tur e historia di e Iglesia, no ta asina? Bo mester ta dispuesto pa ofendé aki, bo mester ta dispuesto pa tuma e rísiko. Esei ta unda fe ta bin aden… . Nos kompromiso ta suponé di ta un tèst, e ta suponé di ta duru, e ta suponé di ta impráktiko den e tèrminonan di e mundu aki.” ⁵

E prioridat di e evangelio aki tabata afirmá na campus di BYU djis algun luna pasá pa un lider Katóliko apresiá, Charles J. Chaput, e arsobispu di Philadelphia. Papiando di “prekupashonnan ku e komunidatnan SUD i Katóliko ta kompartí,” manera “tokante matrimonio i famia, e naturalesa di nos seksualidat, e santidat di bida humano, i e urgensia di libertat religioso,” el a bisa esaki:

“Mi ke enfatisá atrobe e importansia di biba realmente lokual nos ta pretendé di ta kere. Esei mester ta un prioridat---no simplemente den nos bida personal i familiar pero den nos iglesianan, skohensianan polítiko, nos akuerdonan komersial, nos trato ku pobernan; ku otro palabra, den tur kos ku nos ta hasi.”

“Ata aki di kon esei ta importante,” [el a sigui]. “Siña for di e eksperensia Katóliko. Nos Katóliko ta kere ku nos vokashon ta pa ta un zürdeg den sosiedat. Pero tin un liña fini entre di ta un zürdeg den sosiedat, i wòrdu digerípa sosiedat.” ⁶

E Salbador su atvertensia kontra di e prekupashonnan di e mundu aki ku ta hoga e palabranan di Dios den nos bida sigur ta desafiá nos pa enfoká nos prioridatnan i nos kurason riba e mandamentunan di Dios i e liderazgo di Su Iglesia.

E ehèmpelnan di e Salbador por pone nos pensa di e parábola aki komo e parábola di e teranan. E disponibilidat di e era aki ta dependé riba e kurason di kada un di nos ku ta eksponé na e simia di evangelio. Den suseptibilidat na enseñansanan spiritual, algun kurason ta duru i sin preparashon, algun kurason ta di piedra pa falta di uso, i algun kurason ta poné riba kosnan di e mundu.

III. A kai den Bon Tera i a Duna Fruta

E parábola di e sembradó ta finalisá ku Jesus su deskripshon di e simia ku “a kai den bon tera, i a duna fruta” di vários manera(Mateo 13:8). Kon nos por prepará nos mes pa ta e bon tera i pa tin un bon kosecha?

Hesus a splika “ku den e bon tera ta esunnan, ku den un kurason honesto i bon, despues di a skucha e palabra, a ward’é, i a duna fruta ku pasenshi” (Lukas 8:15). Nos tin e simia di palabra di evangelio. Ta na kada un di nos pa pone e prioridatnan i e hasi e kosnan ku ta hasi nos tera bon i nos kosecha abundante. Nos mester buska pa ta ankrá i kombertí profundamente na e evangelio di JesuCristu (wak Kolosensenan 2:6–7). Nos ta logra e kombershon aki dor di hasi orashon, dor di lesamentu di skrituranan, dor di sirbi, i dor di partisipá regularmente di e santa sena pa semper tin Su Spiritu huntu ku nos. Nos mester buska tambe e kambio poderoso di kurason ( wak Alma 5:12–14) ku ta remplasá deseonan malbado i prekupashonnan egoista ku e amor di Dios i e deseo pa sirbi E i Su yunan.

Mi ta testifiká di e bèrdat di e kosnan aki, i mi ta testifiká di nos Salbador, JesuCristu, ken su enseñansanan ta mustra e kaminda i ken su Ekspiashon ta hasi tur kos posibel, den e nòmber di Hesu Kristu, amèn.