Defensornan di e Proklamashon di Famia
Pa Bonnie L. Oscarson
Presidente General di Mujeres Jovenes
Laga nos yuda edifiká e reino di Dios dor di para firme i ta defensornan di matrimonio, ta un mayor, i e hogar.
Ki privilegio i goso pa ta un parti di e maravioso asamblea aki di mucha muhé i hende muhé. Kon bendishoná nos ta komo hende muhé pa ta huntu awe nochi den unidat i den amor.
Resientemente mi a lesa e historia di Marie Madeleine Cardon, ken, ku su famia, a risibí e mensahe di e evangelio restourá di JesuCristu for di e promé misioneronan yamá pa sirbi na Italia na 1850. E tabata un muhé hóben di 17 òf 18 aña ora el a boutisá. Un djadumingu, durante ku e famia tabatin un servisio di adorashon den nan hogar den e Alpen di e parti nort di Italia, un grupo di hòmber rabiá, inkluyendo algun ministronan lokal, a reuní rònt dje kas i a kuminsá grita i manda pa e misioneronan sali pafó. Mi no ta kere ku nan tabata ansioso pa siña e evangelio—nan intenshon tabata pa kousa daño korporal. Tabata e hóben Marie ku a sali pafó di e kas pa enfrentá e grupo.
Nan a kontinuá nan gritunan i demandanan visioso pa e misioneronan wòrdu saká afó. Marie a lanta su man ku su den Beibel aden i a manda nan pa bai for di ’einan. El a bisa nan ku e èldernan tabata bou di su protekshon i ku nan no por a daña ni un kabei riba nan kabes. Skucha na su mes palabranan: “Tur a para morto spantá. … Dios tabata ku mi. El a pone e palabranan ei den mi boka, òf lo mi no por a bisa nan. Tur kos tabata ketu, instantáneamente. E grupo feroso i fuerte di hòmber a para desertá dilanti un mucha muhé debil, temblando, pero tòg sin miedu.” E ministronan a pidí e grupo pa bai for di einan, lokual nan a hasi silensiosamente yen di bèrgwensa, miedo, i remordimentu. E grupo chikitu a sigui ku nan reunion na pas.1
Boso por imaginá e muhé hóben balente ei, di e mesun edat ku hopi di boso, pará dilanti un grupo i defendiendo su fe nobo ku kurashi i konvikshon?
Hermananan, poko di nos lo enfrentá un grupo rabiá, pero tin un guera ku ta pasando den e mundu aki den kua nos doktrinanan básiko i mas kerí ta bou di atake. Mi ta papiando spesífikamente di e doktrina di e famia. E santidat di e hogar i e propósito esensial di e famia ta wòrdu dudá, kritiká, i ataká di tur banda.
Ora Presidente Gordon B. Hinckley a lesa pa promé biaha “E Famia: Un Proklamashon na e Mundu” 20 aña pasa e aña ki, nos tabata gradisí p’e i a balorá e klaridat, simplisidat, i bèrdat di e dokumentu reveladó aki. Nos no tabata sa e ora ei kon desesperadamente nos lo bai tin mester di e deklarashon básiko den e mundu di awendia komo un norma pa lokual nos por a husga kada bientu nobo di dògma mundial biniendo na nos di e media, e Internet, e sientífikonan, televishon i pelíkulanan, i asta legisladónan. E proklamashon tokante e famia a bira nos kriterio pa husga e filosofianan di e mundu, i mi ta testifiká ku e prinsipionan spliká den e deklarashon aki ta mesun bèrdat awe ku nan tabata ora nan a wòrdu duná na nos pa un profeta di Dios kasi 20 aña pasa.
Mi por señalá algu opvio? Bida tiki biaha ta bai segun nos a plania, i nos sa masha bon ku no tur hende muhé ta eksperenshá loke e proklamashon ta deskribí. Tòg e ta importante pa komprondé i siña e patronchi di Señor i trata pa realisá e patronchi ei e mihó manera ku nos por.
Kada un di nos tin un parti pa hunga den e plan, i kada un di nos ta wòrdu balorá igual den e wowonan di Señor. Nos mester kòrda ku un Tata Selestial amoroso sa di nos deseonan rekto i lo honra Su promesanan ku nada lo wòrdu nengá na esnan ku fielmente a warda nan kombenionan. Tata Selestial tin un mishon i un plan pa kada un di nos, pero tambe E tin Su mes orario pa kumpli ku n’e. Un di e desafionan mas difísil den e bida aki ta pa tin fe den e orario di Señor. Ta un bon idea pa tin un plan alternativo den mente, kua ta yuda nos pa ta muhénan ku ta warda kombenionan, ku tin karidat, i ku ta rekto, edifikando e reino di Dios sin importá ki direkshon nos bida ta bai. Nos mester siña nos yunan muhé pa bai pa e ideal pero plania pa kos inesperá.
Durante e di 20 aña di aniversario di e proklamashon di e famia, mi kier duna tur e hende muhé di Iglesia e reto pa ta defensornan di “E Famia: Un Proklamashon pa e Mundu.” Meskos ku Marie Madeleine Cardon a defendé yen kurashi e misioneronan i su kreenshanan nobo, nos mester defendé yen kurashi Señor su doktrina revelá ku ta splika matrimonio, famianan, e ròlnan divino di hende hòmber i di hende muhé, i e importansha di hogarnan komo lugánan sagrado—asta ora e mundu ta gritando den nos oreanan ku e prinsipionan aki ta for di moda, ta limitá, òf no ta mas importante. Tur hende, sin importá nan sirkunstansha matrimonial òf e number di yu ku nan tin, por defendé e plan di Señor deskribí den e proklamashon di e famia. E ta e plan di Señor, e mester ta nos plan tambe!
Tin tres prinsipio ku ta wòrdu siñá den e proklamashon ku mi ta pensa tin espesífikamente mester di defensornan firme. E promé ta matrimonio entre un hòmber i un muhé. Nos ta siña den e skrituranan, “Sinembargo den nos relashon ku Señor, ni muhé ni hòmber no por sin otro.”2 Pa kualkier persona por logra e plenitut di bendishonnan di saserdosio, mester tin un esposo i un esposa seyá den e kas di Señor, trahando huntu den rektitut i kedando fiel na nan kombenionan. Esaki ta e plan di Señor pa Su yunan, i niun kantidat di diskurso of kritikamentu públiko lo kambia lokual Señor a deklará. Nos mester kontinuá pa modelá matrimonionan rekto, buska pa e bendishon ei den nos bidanan, i tin fe si e ta tarda di yega. Laga nos ta defensornan di matrimonio manera Señor a manda miéntras ku nos ta kontinuá pa mustra amor i kompashon na esnan ku tin diferente puntonan di bista.
E siguiente prinsipio ku ta yama pa nos stèm defensor ta elevando e ròlnan divino di mamanan i tatanan. Nos ta siña nos yunan yen di entusiasmo pa pone metanan grandi den bida. Nos kier sigurá ku nos yunan muhé sa ku nan tin e potensial pa alkansá i pa ta kiko ku nan por imaginá. Nos ta spera pa nan lo gusta siña, ta eduká, talentoso, i por ta asta bira e siguiente Marie Curie òf Eliza R. Snow.
Nos ta siña nos yunan hòmber i muhé tambe ku no tin un honor mas grandi, títulonan no mas elevá, i niun otro ròl mas importante den bida ku esun di ta mama òf tata? Mi ta spera ku miéntras ku nos ta animá nos yunan pa alkansá lo mehor den e bida aki ku nos ta siña nan tambe pa honra i eksaltá e ròlnan ku mamanan i tatanan ta hunga den e plan di Tata Selestial.
Nos yu muhé mas yòn, Abby, a mira un oportunidat úniko pa para komo un defensor di e ròl di mama. Un dia el a risibí un nota di skol di su yunan ku nan tabata bai tin presentashonnan di diferente karera na skol. Mayornan tabata invitá pa manda un aplikashon si nan tabata kier a bini na skol pa siña e muchanan tokante nan trabou. Abby a sinti e impreshon pa apliká pa bini i papia tokante maternidat. E no a skucha tende atrobe di e skol, i ora Dia di Karera tabata serka di yega, el a yama e skol, pensando ku por ta nan a pèrdè su aplikashon. E organisadónan a buska i a haña dos dosente ku a bai di akuerdo di laga Abby bini pa papia na nan klas na final di Dia di Karera.
Den su presentashon masha prèt mes na e muchanan, Abby a siñá nan, entre otro kosnan, ku komo mama e tin mester konosementu den medisina, sikologia, religion, enseñansa, músika, literatura, arte, finansa, dekorashon, estilista di kabei, ta un shofùr, deporte, kushiná, i hopi mas. E muchanan tabata impreshoná. Na final di su presentashon el a pone e muchanan kòrda riba nan mamanan dor di pone nan skirbi notanan ekspresando gratitut pa tur e hopi aktonan amoroso di servisio ku nan ta risibí kada dia. Abby a sinti ku e muchanan a kuminsá wak nan mamanan den un bista nobo i ku di ta un mama òf un tata tabata algu di hopi balor. El a apliká pa presentá atrobe e aña aki na Dia di Karera i a wòrdu invitá pa presentá na seis klas.
Abby a bisa lo siguiente tokante su eksperensha: “Mi ta sinti ku e ta fasil den e mundu aki pa un mucha haña e idea ku pa ta un mayor ta un trabao sekundario òf asta tin biaha un inkonveniensia nesesario. Mi kier pa kada mucha sinti manera nan ta e prioridat mas importante pa nan mayor, i por ta kontando nan kon importante ta un mayor ta pa mi lo yuda nan realisa tur loke nan mayornan ta hasi pa nan i pakiko.”
Nos profeta stimá, Presidente Thomas S. Monson, ta un ehèmpel maravioso di loke kier men pa honrá hende muhé i maternidat, spesialmente su mes mama. Papiando di nos mamanan riba tera, el a bisa: “Ku kada un di nos tesorá e bèrdat aki; un hende no por lubidá mama i kòrda riba Dios. Un hende no por kòrda riba mama i lubidá Dios. Di kon? Pasobra e dos personanan sagrado aki, Dios i [nos] mama [riba tera], ta sosionan den kreashon, den amor, den sakrifisio, den servisio, ta manera unu.”3
E último prinsipio nos mester para i defendé ta e santidat di e hogar. Nos mester tuma un ekspreshon ku tin biaha ta wòrdu papia di dje ku bofon i elev’é. E ta e ekspreshon ama di kas. Nos tur —hende muhé, hende hòmber, hóbennan, i muchanan, soltero òf kasá—por traha di ta un ama di kas. Nos mester “hasi nos hogarnan” lugánan di òrdu, refugio, santidat, i siguridat. Nos hogarnan mester ta lugánan kaminda e Spiritu di Señor ta wòrdu sintí den abundansia riku i unda e skrituranan i e evangelio ta wòrdu studiá, siñá, i bibá. Ki diferensha e lo hasi den e mundu si tur hende lo wak nan mes komo trahadónan di hogarnan rekto. Laga nos defendé e hogar manera un lugá ku ta santu manera e tèmpelnan ta santu.
Hermananan, mi ta gradesido pa ta un muhé den e delaster dianan aki. Nos tin oportunidatnan i posibilidatnan ku niun otro generashon di hende muhé tabatin den e mundu. Laga nos yuda edifiká e reino di Dios dor di para firme i ta defensornan di matrimonio, di ta un mayor, i e hogar. Señor tin mester pa nos ta sòldatnan yen di kurashi, ku ta firme i inmovibel ken lo defendé Su plan i siña e generashon futuro Su bèrdatnan.
Mi ta duna testimonio ku Tata Selestial ta biba i ta stima kada un di nos. Su Yu, JesuCristu, ta nos Salbador i Redentor. Mi ta laga e testimonio aki ku boso den e nòmber di JesuCristu, amèn.