Si, Nos Por i nos Lo Gana!

Pa Elder Ulisses Soares

Di e Presidensia di e Setentanan

Nos mester tene duru mas ku nunka na nos testimonio di e evangelio di JesuCristu. E ora ei nos lo gana e bataya diario kontra maldat.

Rumannan stimá, mi ta honrá pa e privilegio ku mi tin di papia na boso, e poseedornan di e saserdosio di Dios a traves di e Iglesia awe.

Presidente Thomas S. Monson a bisa un biaha:

“E mundu tin biaha por ta un lugá ku ta duna miedu pa biba den dje. E tela moral di sosiedat ta parse di ta kibra ku un velosidat alarmante. Niun—no ta importá si nan ta hóben òf bieu òf meimei— ta librá di eksposishon na e kosnan ku tin e potensial pa hiba nos abou i destruí nos...

“… Pero nos no mester desesperá… Nos ta bringando un guera kontra pika… E ta un guera ku nos por i nos lo gana. Nos Tata den Shelu a duna nos e hèrmènt ku nos mester pa hasi esei.”¹

Nos tur, hóben i bieu, ta wòrdu enfrentá tur dia ku e guera menshoná pa Presidente Monson. E enemigu i su angelnan ta purba di distraé nos. Nan propósito ta pa enkurashá nos pa bai leu for di nos kombenionan ku nos a hasi ku e Señor, ku ta hasi nos pèrdè e bista di nos herensia eterno. Nan konosé e plan di nos Tata Selestial pa Su yunan, pasobra nan tabata presente ku nos den e gran Konsilio di Shelu ora tur esaki a wòrdu presentá. Nan a purba pa tuma bentaha di nos debilidatnan i nos flakesa, gañando nos ku e “nubia di skuridat… ku ta siega e wowonan, i enduresé e kurasonnan di e yunan di hòmber, i ta hiba nan den e kamindanan grandi, pa nan muri i kai pèrdí.”²

Apesar di e oposishon ku nos ta topa, manera Presidente Monson a siña nos, esaki ta un guera ku nos por i nos lo gana. E Señor ta konfia den nos kapasidat i determinashon pa hasi esei.

E skrituranan ta kontené hopi ehèmpel di esnan ku a gana nan guera asta meimei di situashon hopi hostil. Un di e ehèmpelnan aki ta Kapitan Moroni den e Buki di Mormon. E hòmber hóben remarkabel aki tabatin e kurashi pa defendé e bèrdat den un tempu ora tabatin hopi oposishon i guera ku a pone na riesgo e sobrebibensia mes di e nashon Nefita. Maske e tabata briante ehersiendo su responsabilidatnan. Moroni a keda humilde. Esaki i otro atributonan a hasié un hèrmènt ekstraordinario den e mannan di Dios den e tempu ei. E profeta Alma a deklará ku si tur hòmber tabata manera Moroni, “e podernan mes di fièrnu lo a wòrdu sakudí pa semper; i e diabel nunka lo tin poder riba e kurason di e yunan di hòmber.”³ Tur e atributonan di Moroni a bin for di su fe grandi den Dios i den e Señor JesuCristu ⁴ i su firme determinashon pa sigui e stèm di Dios i Su profetanan.⁵

Figurativamente, nos tur mester transformá nos mes den un Kapitan Moroni moderno pa gana e guera kontra maldat. Mi konosé un diákono hopi fiel ku a transformá su mes den un Kapitan Moroni moderno. A medida ku el a esforsá pa sigui e konseho di su mayornan i lidernan di Iglesia, su fe i determinashon a wòrdu proba kada dia, ounke e ta hóben. El a bisa mi ku un dia e tabata sorprendí pa un situashon difisil i inkómodo—su amigunan tabata wak imágen pornográfiko riba nan selular. Na e mesun momento ei, e hóben mester a disidí kiko tabata mas importante—su popularidat òf su rektitut. Den e poko sekòndenan ku a sigui, e tabata yen ku kurashi i bisa su amigunan ku loke nan tabata hasi no tabata korekto. Ademas, el a bisa nan ku nan mester stòp loke nan tabata hasi òf nan lo bira esklabo di dje. Kasi tur su amigunan a redikulisá su konseho, bisando ku e tabata parti di bida i ku no tabatin nada malu den esei. Tòg, tabatin unu entre nan ku a tende e konseho i e hóben aki i a disidí di stòp loke e tabata hasi.

E ehèmpel di e diákono aki tabatin un influensia positivo riba por lo ménos un kompañero di skol. Sin duda e i su amigu a sufri di persekushon i hasimentu di bofon dor di e desishon ei. Den e otro banda, nan a sigui e atvertensia di Alma na su pueblo ora el a bisa, “Sali for di e [kosnan] malu, i boso kita for di dje, i no mishi ku nan kosnan sushi.”⁶

E foyeto La Fortalesa de la Juventud ta kontené e siguiente konseho aprobá dor di e Promé Presidensia pa e hubentut di Iglesia: “Boso ta responsabel pa e desishonnan ku boso ta tuma. Dios ta kòrda riba boso i lo yuda boso tuma bon desishonnan, asta ora boso famia i amigunan ta usa nan albedrio di manera ku no ta korekto. Tin e kurashi moral pa lanta para firme den obediensia na e boluntat di Dios, ounke si boso tin ku keda so. Ora ku boso ta hasi esaki, boso lo ta un ehèmpel pa otronan sigui.”⁷

E guera di bon kontra malu lo sigui durante nos bida dor ku e propósito di e atversario ta pa hasi tur hende miserabel meskos ku e ta. Satanas i su angelnan lo purba di konfundí nos pensamentu i tuma kontròl dor di tenta nos pa [kometé] piká. Si nan por, nan lo korumpí tur loke ta bon. Sinembargo, e ta esensial pa komprendé ku nan lo tin poder únikamente si nos laga nan.

E skrituranan tambe ta kontené hopi ehèmpel di esnan ku a duna e pèrmit na e atversario i ku a kaba konfundí i asta destrosá, manera Nehor, Korihor, i Sherem. Nos mester ta alerta pa e peliger aki. Nos no por laga nos mes wòrdu konfundí pa mensahenan popular ku ta fásilmente aseptá pa e mundu i ku ta kontradesí e doktrina i prinsipionan berdadero di e evangelio di JesuCristu. Hopi di e mensahenan di mundu ta representá nada mas ku un intento di nos sosiedat pa hustifiká pika. Nos mester kòrda ku, den final, [nos] tur lo para dilanti Cristu pa wòrdu huzgá di nos obranan, si nan tabata bon òf si nan tabata maldat.⁸ Ora ku nos topa ku e mensahenan di mundu, kurashi grandi I konosementu grandi di e plan di nos Tata Selestial lo wòrdu rekerí pa skohe lo korekto.

Nos tur por risibí e forsa pa skohe loke ta korekto si nos buska e Señor i pone tur nos konfiansa i fe den Dje. Pero, komo skrituranan ta siña, nos mester tin “un kurason sinsero” i “berdadero intenshon.” E ora ei e Señor, den Su mizerikòrdia infinito, “lo manifestá e bèrdat na nos, pa medio di e poder di e Spiritu Santu. I pa e poder di e Spiritu Santu boso por sa e bèrdat di tur kos.”⁹

E konosementu aki wòrdu hañá pa medio di e Spiritu Santu ta nada mas ku nos testimonio, ku ta impulsá nos fe I determinashon pa sigui e siñansanan di e evangelio restourá den e delaster dianan, sin importá e mensahenan popular ku nos ta tende for di e mundu. Nos testimonio mester ta un escudo pa protehé kontra e atake fuerte di e atversario den su intentá pa ataka nos. .¹⁰ E lo guia nos ku seguridat pa medio di e skuridat I konfushon ku ta eksistí den e mundu awe.¹¹

Mi a siña e prinsipio aki ora mi tabata sirbi komo un mishonero hóben. Mi kompañero I ami tabata sirbi den un rama chikí i leu di e Iglesia. Nos a purba di papia ku kada hende den e siudat. Nan a risibí nos hopi bon, pero nan tabata gusta di diskutí riba e skritura i punta nos pa evidensia konkreto tokante di e bèrdat di loke nos tabata siña.

Mi ta kòrda ku kada bia ku mi kompañero i ami tabata purba di mustra kualke kos, e Spiritu di Dios a laga nos i nos a sinti totalmente pèrdí i konfundí. Nos a sinti ku nos mester a hustá nos testimonio ku e bèrdatnan di e evangelio ku nos tabata siña. For di e momento ei, Mi ta kòrda ku ora ku nos a duna un testimonio ku tur nos kurason, un poder ketu di konfirmashon a bini for di e Spiritu Santu ku a yena e kamber, i no tabatin lugá pa konfushon òf diskushon. Mi a siñá ku no tin forsanan di maldat ku ta kapas pa konfundí, gaña òf dominá e poder di un testimonio sinsero i un berdadero disípulo di JesuCristu.

Manera e Salbador Mes a siña, e atversario ta desea pa zefta nos manera tribu, I hasi nos pèrdè nos abilidat pa influensia e mundu pa bon.¹²

Mi rumannan stima, dor di e ola di konfushon i dudanan sparsí rònt mundu awe, nos mester tene duru mas ku nunka na nos testimonio di e evangelio di JesuCristu. E ora ei nos abilidat pa defendé bèrdat i hustisia lo oumentá masha hopi. Nos lo gana e bataya diario kontra maldat, i na lugá di kai den kampo di bida, nos lo animá otronan den a normanan di e Maestro.

Mi ta invitá tur pa haña seguridat den e siñansanan ku ta wòrdu kontené den skrituranan. Kapitan Moroni a hunta su fe i su testimonio di e bèrdat na e konosementu i sabiduria hañá den skrituranan. Den e manera aki, el a konfia ku e lo risibí e bendishonnan di Señor i lo logra hopi viktorianan, ku ta loke en realidat a sosedé.

Mi ta invitá tur pa haña seguridat den palabranan di sabiduria di nos profetanan aktual. Presidente Thomas S. Monson a bisa: “Nos ku ta ordená den e saserdosio di Dios por hasi un diferensia. Ora nos ta mantené nos puresa i honra nos saserdosio, nos ta bira ehèmpelnan hustu pa otronan sigui… [I nos ta] yuda iluminá un mundu ku ta oumentá den skuridat.”¹³

Mi ta invitá tur pa konfia den e méritonan i den e poder di e Ekspiashon di JesuCristu. Pa medio di Su sakrifisio ekspiatorio, nos por gana e kurashi pa gana tur e gueranan di nos tempu, asta meimei di nos difikultat, desafionan i tentashonnan. Laga nos konfia den Su amor I poder pa salba nos. Cristu Mes a bisa:

“Mi ta e kaminda, e bèrdat i e bida, niun hòmber ta bini na e Tata sino pa medio di mi.”¹⁴

Mi ta e lus di e mundu: esun ku ta sigui mi lo no kana den skuridat, pero e lo tin e lus di bida.”¹⁵

“E kosnan aki mi a papia na boso, pa boso lo tin pas den mi. Den e mundu boso lo tin tribulashon: pero sea di bon animo; mi a vense e mundu.”¹⁶

Mi ta kompartí mi testimonio di e bèrdatnan aki den e nòmber di JesuCristu, amèn.