Kaminda Hustisia, Amor i Mizèrikòrdia ta Topa

Pa Elder Jeffrey R. Holland

Di e Quorum di Diesdos Apòstelnan

Imagen

JesuCristu a sufri, muri i lanta for di morto pa asina E por lanta nos pa e bida eterno.

Sin e kabuyanan di siguridat, material nesesario, òf kualke sorto di ekipo pa subi seru, dos ruman- Jimmy di 14 aña, i John, di 19 aña (maske eseinan no ta nan nòmber real) – a trata di subi e parti vèrtikal di un presipisio den Snow Canyon State Park, na e parti sùit di Utah kaminda m’a lanta. Kasi na e tòp di nan subida difikultoso, nan a diskubrí ku e rant di e baranka tabata sali i stroba nan delaster meternan di nan subida. Nan no por a pasa over di esaki ni tampoko por retirá di unda nan tabata. Nan a keda pegá. Despues di maniobrá kuidadosamente, John a haña sufisiente espasio pa hisa su ruman pone riba e rant dje baranka. Pero no tabatin manera pa e mes por a subi. Mas el a purba di haña un parti ku e por gara ku su man òf kaminda di pone su pia, mas su múskulonan tabata kue kram. Pániko a kuminsá atak’é i el a kuminsá teme pa su bida.

Sin por a wanta pa muchu tempu mas, John a disidí ku su úniko opshon ta pa purba bula vertikal den un esfuerso pa gara e rant di e baranka. Si e logra, e lo por, dor di e forsa konsiderabel di su brasanan, hisa su mes pa seguridat.

Den su mes palabranan, el a bisa:

“Promé ku mi bula, mi a bisa Jimmy pa bai buska un rama di palu, fuerte sufisiente pa e por lag’é baha pa mi, maske mi tabata sa ku no tabatin nada asina den parti ariba di e seru. E tabata solamente un triki pa e por a bai laga mi. Si mi bulmentu faya, por lo ménos mi por a sigurá mi mes ku mi ruman chikí no por a wak mi kai muri.

“Dunando e sufisiente tempu pa ta for di bista, mi a hasi mi delaster orashon—ku mi ta ke pa mi famia sa ku mi stima nan i ku Jimmy lo yega kas sano i salbo riba su mes—i mi a bula bai a riba. Tabatin sufisiente adrenalina den mi ku e bulmentu ku mi mannan a pasa e rant di e baranka kasi na mi èlebog. Pero ora ma trata di gara e superfisie, mi no a sinti nada ku mas ku santu riba e piedra plat. Te ainda mi por kòrda e sensashon di e santu fini ora mi tabata kologá einan ku nada pa tene na dje--- no tabatin rant, no tabatin baranka, nada pa gara òf wanta na dje. Mi a sinti mi dedenan tabata slep pokopoko riba e superfisie. Mi tabata sa ku mi bida ta bai kaba.

“Pero direpente, manera un werlek ku ta dal den un tormenta den verano, dos man a sali di algun lugá riba e rant di e presipisio, garando mi pòlsnan ku un forsa i determinashon ku tabata inkreibel pa su sais. Mi ruman chikí fiel, a tene mi, i a nenga di laga mi kai. E mannan fuerte di mi ruman a salba mi bida e dia ei, ora ku mi tabata kologá sin por hasi nada, ku sigur lo a resultá den un morto sigur.”¹

Mi rumannan stimá, awe ta djadumingu di Pasku di Resurekshon. Maske ku semper nos tin ku kòrda (nos ta primintí tur siman den nos orashonnan sakramental ku nos lo hasié), no opstante esaki ta e dia di mas sagrado di aña pa [riba e dia aki] spesialmente nos rekòrdá mannan fraternal i brasanan determiná ku ta alkansá den e abismo di morto pa salba nos di nos kaidanan i nos frakasonan, di nos tristesanan i nos pikánan. Poniendo den konteksto e historia aki kontá pa e famia di John i Jimmy, mi ta ekspresá mi gratitut pa e Ekspiashon i e Resurekshon di e Señor JesuCristu i eventonan ku ta rekonosé den e plan divino di Dios ku ta resultá den i duna kontenido na e “amor ku Jesus ta ofresé [nos].” ²

Den nos sosiedat kada biaha mas sekular, ta mesun poko komun e impopular pa papia di Adam ku Eva òf di Hardin di Eden òf un kaida fortuná den mortalidat. Sinembargo, e bèrdat simpel ta ku nos no por komprendé kompletamente e Ekspiashon i e Resurekshon di Cristu i nos lo no apresiá adekuadamente e propósito úniko di Su nasementu òf di su morto ---ku otro palabra, no tin niun manera pa selebrá berdaderamente e Pasku [di nasementu] ni Pasku [di Resurekshon] ---- sin komprondé ku realmente tabata tin un Adam i Eva, ku a kai for di Eden real, ku tur e konsekuenshanan ku e kaida tabata bini ku n’e.

Mi no sa e detayenan di loke a pasa riba e planeta promé ku esaki, pero mi sa e dos nan aki a wòrdu kreá bou di e man divino di Dios, [i mi sa] ku pa un tempu nan a biba nan so den e ambiente di paraiso kaminda no tabatin ni morto humano ni posibilidat di famia i ku dor di un sekuensha di desishonnan nan a transgredí un mandamentu di Dios ku tabata rekerí pa nan bandoná nan ambiente di e hardin, pero ku a pèrmití nan pa haña yunan, promé ku nan enfrentá morto físiko.³ Pa añadí mas tristesa i komplehidat na nan sirkunstansha, nan transgreshon tabatin konsekuensha spiritual tambe, isolando nan di e presensha di Dios pa semper. Pasó nos e ora ei lo nase den e mundu ku a kai i pasó nos tambe lo transgredí e leinan di Dios, nos tambe ta sentensiá ku e mesun kastigunan ku Adam i Eva.

Esta un sirkunstansha difísil! Hinter e rasa humano den un kaida liber--tur hòmber, muhé i mucha den dje, físikamente kayendo den morto permanente, spiritualmente hundiendo den un angustia eterno. Esaki ta manera bida tabata intenshoná di ta? Esaki ta e gran final di e eksperensha humano? Nos tur ta kologá na un presipisio friu na un lugá den un universo indiferente, kada un di nos buskando un punto di apoyo, kada un di nos buskando algu pa gara----ku nada pero e sensashon di e slepmentu di e santu bou di nos dedenan, nada pa salba nos, nada pa tene na dje, ménos algu pa sostené nos? Nos úniko propósito di bida ta un ehersisio bashí --simplemente pa bula mas haltu ku nos por, kologá pa wanta pa aproksimadamente tres aña, despues faya i kai i keda kai pa semper?

E kontesta riba e preguntanan aki ta inekibokabel i eterno no! Ku e profetanan antiguo i moderno, mi ta testifiká ”ku tur kos a wòrdu hasí den e sabidoria di E ku sa tur kos.”⁴ Asina, ku for di e momento ku e promé mayornan a sali for di e hardin di Eden, e Dios i Tata di nos tur, antisipando e disishon di Adam ku Eva, a manda angelnan di shelu pa deklará na nan---i pa pasa dor di tempu pa nos---ku hinter e sekuensia aki tabata diseñá pa nos felisidat eterno. Tabata parti di Su plan divino, ku a proveé pa un Salbador, e Yu literal di Dios mes--un otro ”Adam,” e Apòstel Pablo lo yam’É⁵--ku lo bin den e Meridiano di tempu pa ekspiá pa e promé transgreshon di Adam. E Ekspiashon ei lo logra viktoria kompletu riba morto físiko, konsedé resurekshon inkondishonal pa tur hende ku a nase òf ku lo bai nase den e mundu. Ku mizerikòrdia e lo proveé tambe pordon pa e pikanan personal pa tur hende, for di Adam te ku e final di mundu, bou di e kondishon di arepentimentu i obedensia na e mandamentunan divino.

Komo un di Su testigunan ordená, mi ta deklará e Pasku mainta aki ku Jesus di Nazaret tabata e Salbador di e mundu aki, e ”delaster Adam,”⁶ e Outor i Finalisadó di nos fe, e Alfa i Omega di bida eterno ”Pasó meskos ku tur ta muri den Adam, meskos tur den Cristu lo wòrdu rebibá,”, ”⁷ Pablo a deklará. I for di e profeta- patriarka Lehi:”Adam a kai pa hendenan por eksistí. … I e Mesias ta bin den e kumplimentu di tempu, pa e por redimí e yunan di hòmber for di e kaida.”⁸ Mas profundo ku tur, E profeta di e Buki di Mormon Jakob a siña komo parti di su sermon di dos dia di e Ekspiashon di JesuCristu ku ” e resurekshon mester … bin …...dor di e kaida.”⁹

Asina ta ku awe nos ta selebrá e don di e viktoria riba tur kaida ku nos por a eksperenshá, tur tristesa ku nos a konosé, tur desanimashon ku nos tabatin, tur miedu ku nos a enfrentá-- sin papia di nos resurekshon for di morto i pordon di nos pikanan. E viktoria ei ta disponibel pa nos dor di e eventonan ku a sosodé presis meskos den un siman manera esaki kasi dos milenio pasá na Yerusalèm.

Kuminsando ku e angustia spiritual den e Hardin di Getsémani, pasa te na e Krusifikashon na e krus riba [e seru di] Kalvario, i konkluyendo riba un djadumingu mainta den un graf regalá, un hòmber sin piká, puru, sagrado, e Yu real di Dios Mes, a hasi loke niun hòmber ku a muri a yega di hasi ni lo por hasi. Bou di Su mes poder, El a lanta for di morto, pa nunka mas Su kurpa keda separá for di Su spiritu. Di Su mes boluntat, El a kita e pañanan di entiero for di su kurpa den kua e tabata lorá, koutelosamente kitando e lensu ku a wòrdu poné riba su kara ”na un lugá aparte,”¹⁰ skritura ta bisa.

E sekuensha di e Promé Pasku di e Ekspiashon i Resurekshon, ta konstituí e momento di mas importante, e regalo di mas generoso, e doló di mas inkomprendibel, i e, manifestashon mas transedental di amor puro hamas demostrá den e historia di e mundu. JesuCristu a sufri, muri i lanta for di morto pa asina E por, manera werlegt den un tormenta den verano,gara nos ora nos ta kai, tene nos ku Su poder, sostené nos i dor nos obedensia na Su mandamentunan, lanta nos pa bida eterno.

E Pasku aki mi ta gradisí É i e Tata ku a dun’É na nos, ku Jesus ainda ta para triunfante riba morto, maske E ta para riba pianan heridá. E Pasku aki mi gradisí É i e Tata ku a dun’É na nos, ku E ainda ta ekstendé na nos grasia sin fin, maske E ta ekstendé ku su palmanan i pòlsnan heridá. E Pasku aki mi gradisí É i e Tata ku a dun’É na nos pa nos por kanta dilanti un hardin ku e sodo di sanger, e krus ku klabu a traspasá, i e tumba gloriosamente bashí:

Esta grandi, esta glorioso, esta kompletu
Redenshon su diseño grandi,
Kaminda hustisia, amor i mizèrikòrdia ta topa
Den harmonia divino!11

Den e nòmber sagrado di JesuCristu ku a resusitá, amèn