Preservando Albedrio, Protehando Libertat Religioso

Pa Elder Robert D. Hales

Di e Quorum di e Diesdos Apòstelnan

Imagen

E uso fiel di nos albedrio ta dependé riba si nos tin libertat religioso.

E ta Djadumingu di Pasku Grandi: un dia di gratitut i memoria honrando nos Salbador JesuCristu su Ekspiashon i Resurekshon pa tur ser humano. Nos ta alab’É, gradisí pa nos libertat di religion, libertat di asamblea, libertat di ekspreshon, i nos derecho duná di Dios di albedrio.

Manera profetanan a profetisá tokante e delaster dianan aki den kua nos ta biba, tin hopi ku ta konfundí tokante kin nos ta i kiko nos ta kere. Algun ta akusadornan falsu i ta despresiá esnan ku ta bon.¹ Otronan “ta yama bon loke ta malu i malu loke ta bon, [i] ta tuma pretu hasi blanku, i blanku hasi pretu.²

Miéntras esnan rònt di nos ta tuma desishonnan tokante kon pa reakshoná na nos kreenshanan, nos no mester lubidá ku albedrio moral ta un parti esensial di e plan di Dios pa tur Su yunan. E plan eterno ei, presentá na nos den e Konseho di Shelu premortal, a inkluí e regalu di albedrio.³

Den e Gran Konsilio ei, Lusifèr, konosí komo Satanas, a usa su albedrio pa oponé e plan di Dios. Dios a bisa: “Pasobra Satanas a rebeldiá kontra mi, i a buska pa destruí e albedrio di hòmber, ku Ami, Señor Dios, a dun’é, Mi a kousa ku e mester wòrdu tira abou.”⁴

El a kontinuá: “I tambe un di tres parti di e multitut di shelu el a apartá for di mi pa motibu di nan albedrio.”⁵

Komo resultado, e yunan spiritual di Tata Selestial ku a skohe pa rechasá Su plan i sigui Lusifèr a pèrdè nan destino divino.

JesuCristu, usando Su albedrio, a bisa:

“At’ami ta, manda ami.”⁶

“Bo boluntat lo wòrdu hasí, i e gloria lo ta di Bo pa semper.”⁷

Jesus, ku a usa Su albedrio pa sostené e plan di Tata Selestial, a wòrdu identifiká i apuntá pa e Tata komo nos Salbador, pre- ordená pa hasi e sakrifisio ekspiatorio pa tur. Di mesun manera, nos uso di albedrio pa warda e mandamentunan ta kapasitá nos pa komprondé kompletamente ken nos ta i risibí tur e bendishonnan nos Tata Selestial tin—inkluso e oportunidat pa tin un kurpa, pa progresá, pa eksperensha goso, pa tin un famia, i pa heredá bida eterno.

Pa warda e mandamentunan, nos mester sa e doktrina ofishal di Iglesia pa asina nos no ta distraí for di e liderazgo di Cristu dor di e antohonan di individualnan ku semper ta kambia.

E bendishonnan ku nos ta disfrutá awor ta pasobra nos a tuma e desishon pa sigui e Salbador promé ku e bida aki. Pa tur hende ku ta skucha òf lesa e palabranan aki, ken bo ta i kiko ku ta tabata bo pasado, kòrda esaki: e no ta demasiado laat pa tuma e mesun desishon atrobe i siguiE.

Dor di nos fe den JesuCristu, keriendo den Su Ekspiashon, arepentiendo di nos pikánan, i a wòrdu boutisá, nos por e ora ei risibí e don mayó di e Spiritu Santu. E don aki ta proveé e sabiduria i komprenshon, guiá i forsa pa siña i risibí un testimonio, poder, purifikashon pa vense piká, i konsuelo i animo pa ta fiel den tribulashon. E bendishonnan inkomparabel aki di e Spiritu ta oumentá nos libertat i poder pa hasi loke ta korekto, pasobra na unda e Spiritu di Señor ta, einan tin libertat. ⁸

Miéntras ku nos ta kana e kaminda di libertat spiritual den e delaster dianan aki, nos mester komprondé ku e uso fiel di nos albedrio ta dependé riba nos libertat religioso. Nos sa kaba ku Satanas no kier pa e libertat aki ta di nos. El a trata di destruí nos albedrio moral den shelu, i awor riba tera e ta minando ku tur su forsa, oponiendo, i plamando konfushon tokante libertat religioso—kiko e ta i pakiko e ta esensial pa nos bida spiritual i nos mesun salbashon.

Tin kuater piedranan prinsipal di libertat religioso ku nos komo Santunan di e Delaster Dianan mester dependé ariba i protehé.

E promé ta libertat pa kere. Niun hende mester wòrdu krítika, persiguí, òf ataka pa individualnan, ni pa gobièrnunan tampoko, pa loke nan ta kere tokante Dios. E ta hopi personal i hopi importante. Un deklarashon trempan di nos kreenshanan tokante libertat religioso ta bisa:

“Niun gobièrnu por eksistí den pas, eksepto e leinan asina ta wòrdu hinka den i no wòrdu violá ku ta garantisá kada individuo e liber uso di konsenshi.

“E magistrado sivil mester restringí krímen, pero nunka kontrolá konsenshi òf suprimí e libertat di e alma.”⁹

E libertat fundamental aki di kreenshanan a wòrdu rekonosé pa e Nashonnan Uní den su Deklarashon Universal di Derechonan Humano i pa otro dokumentonan di derechonan humano nashonal i internashonal.¹⁰

E di dos piedra prinsipal di libertat religioso ta e libertat pa kompartí nos fe i nos kreenshanan ku otronan. Señor a manda nos, “Siña boso yunan [e evangelio] … ora boso ta na kas….”¹¹ E tambe a bisa na Su disipelnan, “Pasa rònt mundu i prediká e bon notisia na henter humanidat.”¹² Komo mayornan, misioneronan di tempu kompleto, i miembronan misionero, nos ta dependé di nos libertat religioso pa asina nos por siña e doktrina di Señor den nos famianan i rònt mundu.

E di tres piedra prinsipal di libertat religioso ta e libertat di forma un organisashon religioso, un iglesia, pa alabá na pas ku otronan. E di diesun artíkulo di fe ta deklará, “Nos ta afirmá e privilegio di alabá Dios Todopoderoso segun e dikta di nos mesun konsenshi, i nos ta permití tur hòmber e mesun privilegio, laga nan alabá kon, unda, i kiko nan kier.” Dokumentonan di derechonan humano internashonal i hopi konstitushonnan nashonal ta sostené e prinsipio aki.

E di kuater piedra prinsipal di libertat religioso ta libertat pa biba nos fe—uso liber di fe no djis na kas i kapia pero tambe den lugánan públiko. Señor a manda nos no solamente pa hasi orashon den privá¹³ pero tambe pa bai dilanti i “laga [nos] lampi bria pa otro hende, pa nan mira [nos] bon obranan i alabá [nos] Tata den shelu.”¹⁴

Algun ta ofendí ora nos ta trese nos religion den e esfera públiko, tòg e mesun hende ku ta insistí ku nan puntonan di bista i akshonnan lo wòrdu tolerá den sosiedat hopi biaha ta hopi slou pa duna e mesun toleransha na kreyentenan religioso ku tambe ta deseá ku nan puntonan di bista i akshonnan ta wòrdu tolerá. E falta di rèspèt general pa puntonan di bista religioso ta transformando lihé den intoleransha soshal i polítiko pa hende i institushonnan religioso.

Miéntras ku nos ta enfrentá mas i mas preshon pa baha e normanan sekular, nenga nos libertatnan religioso, i komprometé nos albedrio, konsiderá kiko e Buki di Mormon ta siña tokante nos responsabilidatnan. Den e buki di Alma nos ta lesa di Amliki, un hòmber hopi ingenioso i malbado, ku a buska pa bira rei riba e hendenan i a priva nan di nan derechonan i privilegionan, lokual a alarmá e hendenan di e iglesia.¹⁵ Nan a wòrdu siña pa Rei Mosiah pa lanta nan bosnan pa loke nan a sinti ku ta korekto.¹⁶ P’esei nan a reuní nan mes huntu den hinter e pais, kada hòmber segun su mente, si e tabata na fabor di òf kontra Amliki, den gruponan separá, teniendo hopi diskushon un ku otro.”¹⁷

Den e diskushonnan aki, miembronan di Iglesia i otronan tabatin e oportunidat pa bini huntu, eksperensha e spiritu di unidat, i wòrdu influensha pa e Spiritu Santu. i el a pasa ku e bos di e pueblo a bini kontra Amliki, ku e no a bira rei.¹⁸

Komo disipelnan di JesuCristu nos tin e responsabilidat pa traha huntu ku kreyentenan ku ta pensa meskos ku nos, pa lanta nos stèmnan pa loke ta korekto. Aunke miembronan nunka mester afirmá òf asta impliká ku nan ta papia na nòmber di Iglesia, nos tur ta invitá, den nos kapasidat komo suidadanonan, pa kompartí nos testimonio personal ku konvikshon i amor—“kada hòmber [i muhé] segun su [mesun] mente.”¹⁹

Profeta Joseph Smith a bisa:

“Mi ta firme pa deklará dilanti Shelu ku mi ta mesun kla pa muri defendiendo e derecho di un Presbiteriano, un Baptista, òf un bon hòmber di kualkier otro denominashon [komo un Mormon]; pasobra e mesun prinsipio ku lo trapa riba e derechonan di e Santunan di e Delaster Dianan lo trapa riba e derechonan di e Katólikonan, òf di kualkier otro denominashon ku por ta impopular i demasiado debil pa defendé nan mes.

“E ta un amor pa libertat ku ta inspirá mi alma—libertat sivil i religioso pa henter e rasa humano.”²⁰

Rumannan nos ta responsabel pa mantené sigur e sagrado libertatnan i derechonan aki pa nos mes i nos posteridat. Kiko abo i ami por hasi?

Promé, laga nos wòrdu informá. Sea konsiente di asuntunan den boso komunidat ku por tin un impakto riba libertat religioso.

Dos, den boso kapasidat individual, hunta ku otronan ku ta kompartí nos kompromiso na libertat religioso. Traha na nan banda pa protehé libertat religioso.

Di tres, biba boso bida pa ta un bon ehèmpel di loke boso ta kere—den palabra i akshon. Kon nos ta biba nos religion ta hopi mas importante ku kiko nos por bisa tokante nos religion.

Nos Salbador su Segunda Binida ta yegando lihé. Laga nos no tarda e gran kousa aki. Kòrda Kapitan Moroni, ku a hisa e titulo di libertat inskribí ku e palabranan “Den memoria di nos Dios, nos religion, i libertat, i nos pas, nos kasánan, i nos yunan.”²¹ Laga nos kòrda e kontesta di e hende: usando nan albedrio, nan a bini koriendo huntu ku un kombenio pa aktua.²²

Mi rumannan stimá, no kana! Kore! Kore pa risibí e bendishonnan di albedrio dor di sigui e Spiritu Santu i usando e libertatnan [ku] Dios a duna nos pa hasi Su boluntat.

Mi ta duna mi testimonio speshal riba e dia speshal aki di Pasku di Resurekshon ku JesuCristu a usa Su albedrio pa hasi nos Tata Su boluntat.

Di nos Salbador, nos ta kanta, “Su sanger presioso el a drama libramente; Su bida el a duna libramente.”²³ I pasobra El a hasi esei, nos tin e oportunidat inbalorabel pa skohe libertat i bida eterno dor di e poder i bendishon di Su Ekspiashon.²⁴ Ku nos libramente skohe pa siguiE awe i semper, ta mi orashon den Su santu nòmber, asta JesuCristu, amèn.