Realmente Bon i sin Engaño
Pa Elder Michael T. Ringwood
Di e Setenta
E bon notisia di e evangelio di JesuCristu ta ku e deseonan di nos kurason por wòrdu transformá i nos motibunan por wòrdu eduká i refiná
Desafortunadamente, tabatin un tempu den mi bida ku mi tabata motivá pa títulonan i outoridat. En realidat el a kuminsá inosentemente. Miéntras mi tabata preparando pa sirbi mishon di tempu kompletu, mi ruman hòmber mas grandi a wòrdu yamá komo lider di zona den su mishon. Mi a tende asina tantu kos positivo bisá di djes ku mi no por a hasi nada mas ku deseá pa e kosnan ei wòrdu bisá di mi tambe. Mi a spera i a hasta hasi orashon pa un posishon similar.
Afortunadamente, miéntras mi tabata sirbi na mishon, mi a siña un lès poderoso. Último konferensha mi a rekordá e lès ei.
Den òktober, Presidente Dieter F. Uchtdorf a bisa: Den e kurso di mi bida, mi tabatin e oportunidat di yega na konosé algun di e hòmber i muhénan mas kompetente i inteligente ku e mundu aki por ofresé. Tempu mi tabata mas yòn, mi tabata impreshoná di esnan ku tabata eduká, ku a logra, eksitoso i aploudí pa e mundu. Pero segun e añanan a pasa, mi a bin realisá ku mi ta mas impreshoná di e almanan maravioso i bendishoná ei, ku ta realmente bon i sin engaño. .”1
Mi héroe di Buki di Mormon ta un ehèmpel perfekto di un alma maravioso i bendishoná ku di bèrdat tabata bon i sin engaño. Shiblon tabata un di e yunan hòmber di e Alma mas Yòn. Nos ta mas konosí ku su rumannan Helaman, ku lo sigui su tata komo wardadó di e registronan i e profeta di Dios, i Korianton, ku a haña sierto fama komo mishonero ku tabatin mester di algun konseho di su tata. Na Helaman Alma a skibi setentishete verso(wak Alma 36–37). Na Korianton Alma a dediká nobentiun verso(wak (wakAlma 39–42). Na Shiblon, su yu di mei mei, el a skibi apénas diesinku verso(wakAlma 38). Sinembargo su palabranan den e diesinku versonan ei ta poderoso i instruktivo.
“I awor, mi yu, mi ta konfia ku lo mi bai tin gran goso den bo, pa motibu di bo firmesa i fidelidat pa ku Dios; pasobra meskos ku bo a kuminsá den bo hubentut pa konfia den Señor Dios, asina mi ta spera ku lo bo sigui obedesé su mandamentunan; pasobra benditu ta esun ku ta perseverá te fin.
“Mi ta bisa bo mi yu, ku ya mi tabatin gran goso den bo pa motibu di bo fidelidat i diligensia, bo pasenshi i bo pasenshi den sufrimentu entre e pueblo” (Alma 38:2–3).
Ademas di papia ku Shiblon, Alma a papia tambe tokante di dje ku Korianton. Alma a bisa: “Bo no a opservá e firmesa di bo ruman, su fieldat, i su diligensia den warda e mandamentunan di Dios? Ata, e no a pone un bon ehèmpel pa bo?” (Alma 39:1).2
Ta parse ku Shiblon tabata un yu ku tabata ke komplasé su tata i a bai pa hasi bon pasobra ta korekto pa hasi bon i no pa elogio, posishon, poder, honor,òf outoridat. Helaman mester tabata sa i tabata respetá esaki tokante su ruman, pasobra el a duna Shiblon kustodia di e registronan sagrado ku el a haña for di su tata. Sigur Helaman tabata konfia Shiblon pasobra “e tabata djis un hòmber, i el a kana rektamente dilanti Dios; i el a perkurá pa hasi e bon kontinuamente, pa warda e mandamentunan di E Señor su Dios” (Alma 63:2). Manera ta parse realmente karakterístiko di Shiblon, no tin mashá registrá tokante di dje for di e tempu ku el a tuma posishon di e registronan sagrado te ora ku el a duna nan na Helaman su yu Helaman(wakAlma 63:11).
Shiblon tabata realmente bon i sin engaño. E tabata un persona ku a sakrifiká su tempu, talentonan, i esfuerso pa yuda i elevá otronan pa motibu di su amor pa Dios i su próhimo(wak Alma 48:17–19; 49:30). E ta wòrdu deskribí perfektamente pa e palabranan di Presidente Spencer W. Kimball: “Hòmber i muhernan grandioso ta mas ansioso pa sirbi ku pa tin dominio.” 3
Den un mundu unda ta buska alabansa, posishon, poder, honor, i outoridat na tur banda, mi ta honra e almanan bendishoná i maravioso ku ta berdaderamente bon i sin engaño, esunnan ku ta motivá pa un amor di Dios i nan bisiñanan, e muhernan i hòmbernan grandioso ku ta “mas ansioso pa sirbi ku pa tin dominio.”
Awendia lo tin algun ku lo ke pa nos pensa ku nos búskeda pa relevansia por wòrdu solamente satisfasé dor di optené posishon i poder. Sinembargo, afortunadamente, tin hopi ku ta influensiá pa e perspektiva aki. Nan ta haña relevansia den buskamentu pa ta realmente bon i sin engaño. Mi a haña nan den tur kanamentu den bida i den hopi tradishonnan di fe. I mi a haña nan den gran kantidat entre siguidornan realmente kombèrtí di Kristu. 4
Mi ta honra esunnan ku desinteresadamente ta sirbi kada siman den barionan i ramanan rònt mundu pa medio di bai mas leu den kumplimentu di nan yamamentunan. Pero yamamentunan ta bini i bai. Mas impreshonante ainda pa mi ta e hopinan ku sin yamamentu formal ta haña maneranan pa sirbi i elevá otronan konsekuentemente. Tin un hermano ku ta yega iglesia tempran pa pone stulnan i ta keda ora kaba pa limpia e kapiya. Un hermana a selektá èksprès un asiento banda di un hermana siegu den su bario no solamente pa e por salud’é pero tambe pa asina e por kanta e kantikanan sufisiente duru pa e hermana siegu por skucha e palabranan i kanta huntu. Si boso mira di serka den boso bario òf rama, boso lo haña ehèmpelnan manera esakinan. Semper tin miembronan ku ta parse di sa ken mester di yudansa i ki ora pa yuda.
Kisas mi promé lès tokante Santunan realmente bon sin engaño tabata tempu mi tabata un mishonero yòn. Mi a muda pa un área ku un elder ku mi no tabata konosé. Mi tende otro mishoneronan papia tokante kon nunka e no a risibí ningun yamamentu di liderazgo i kon e tabata lucha ku e lenga koreano apesar di tabata hopi tempu den e pais. Pero segun mi a yega na konosé e elder aki, mi a haña sa ku e tabata un di mishoneronan di mas obediente i fiel ku mi a konosé. E tabata studia ora tabata tempu pa studia; e tabata traha ora tabata tempu pa traha. E tabata sali na tempu for di apartamentu i tabata regresá na tempu. E tabata diligente den studiamentu di koreano ounke e lenga tabata espesialmente difísil p’e.
Ora mi a realisá ku e komentarionan ku mi a tende no tabata bèrdat, mi a sinti manera ku e mishonero aki tabata wòrdu huzgá robes komo sin éksito. Mi kier a bisa henter e mishon kiko mi a deskubrí tokante di elder aki. Mi kompartí mi deseo ku mi presidente di mishon pa koregí e mal komprendementu aki. Su kontesta tabata, “Tata Selestial konosé e hòmber hóben aki komo un mishonero eksitoso, i ami tambe.” El a agregá, “I awor abo tambe, pues ken otro ta importá?” E sabio presidente di mishon aki a siña mi kiko ta importante den servisio, i e no tabata alabansa, posishon, poder, honor,òf outoridat. Esaki tabata un lès importante pa un mishonero yòn ku tabata muchu enfoká ku títulonan.
Ku e lès aki na mente, mi a kuminsá pa wak patras riba mi bida i mira kuantu bia mi a wòrdu influensiá pa hòmbernan i muhernan ku den e tempu ei no tabatin gran título òf posishon. Un di almanan paresido na Shiblon tabata mi maestro di seminario durante mi añanan na skol sekundario. E bon hòmber aki a siña seminario pa solamente dos òf tres aña, pero el a habri mi kurason den un manera ku a yuda mi haña un testimonio. Por ku e no tabata e maestro di mas popular di skol, pero e tabata semper prepará i su influensia riba mi tabata poderoso i duradero. Un di e poko biahanan ku mi a mira e hòmber aki den e kuarenta aña for di e tempu ku el a siña mi tabata ora el a bini pa wak mi na entiero di mi tata. Realmente, esei tabata un akto ku no tabata motivá pa título òf poder.
Mi ta honra e maestro ku dedikashon aki i hopi manera e ku ta realmente bon i sin engaño. Mi ta honra e maestro di Skol Dominikal ku no ta siña su studiantenan djis durante lès di djadumingu pero tambe ta siña i ta influensiá e mesun studiantenan aki dor di invitá nan pa djòin su famia pa desayuno. Mi ta honra lidernan di hóbennan ku ta bishita e aktividatnan deportivo i kultural di e hombres i mujeres jovenes den nan barionan. Mi ta honra e hòmber ku ta skibi notanan di animo na bisiñanan i na e muhé ku no ta djis manda karchinan di Pasku pero partinan na man na miembronan di famia i amigunan ku tin mester di bishita. Mi ta honra e hermano ku regularmente ta bai kore outo ku e bisiña durante di su dianan difísil di Alzheimer—dunando e i su kasá un kambio hopi nesesario for di nan rutina normal.
E kosnan aki no ta hasí pa alabansa òf honor. E hòmbernan i muhernan aki no ta motivá pa e posibilidat di risibí títulonan òf outoridat. Nan ta disípulonan di Kristu, ta trata di hasi bon kontinuamente, i meskos ku Shiblon, nan ta purbando pa komplasé nan Tata den Shelu.
Ta tristu pa mi ora mi tende di algun ku a stòp di sirbi òf hasta di bai iglesia pasobra nan a haña relevo di un yamamentu òf ta sinti di no a wòrdu mira pa un posishon òf título. Mi ta spera ku un dia nan lo siña e mes un lès ku ami a siña komo un mishonero yòn---ku e servisio ku ta konta mas en general ta wòrdu rekonosé pa Dios so. Den nos búskeda di ami i di mi, nos a lubidá Abo i di Bo?
Algun lo bisa, “Pero mi tin ku hasi asina tantu pa bira manera esunnan ku bo ta deskribí.” E bon notisia di e evangelio di Hesu Kristu ta ku e deseonan di nos kurason por wòrdu transformá i nos motibunan por wòrdu eduká i refiná. Ora nos boutisá den e berdadero rebaño di Dios, nos ta kuminsá ku e proseso di bira kriaturanan nobo (wak2 Korintionan 5:17; Mosia 27:26). Kada bia ku nos renobá e kombenio di boutismo dor di partisipá di e santa sena, nos ta un paso mas serka di e meta final.5 Segun nos perseverá den e kombenio ei, nos ta haña e forsa pa yora ku esnan ku ta yora i konsolá esnan ku tin mester di konsuelo(wakMosia 18:9). Den e kombenio aki, nos ta haña e grasia ku ta permití nos pa sirbi Dios i warda Su mandamentunan, inkluyendo stima Dios ku henter nos kurason i stima nos próhimo manera nos mes. 6 Den e kombenio aki, Dios i Kristu ta yuda nos pa asina nos por yuda esnan ku tin mester di nos yudansa (wak Mosia 4:16; wak tambe versíkulonan 11–15).
Tur lokual mi ke den bida ta pa komplasé mi tatanan—terenal i selestial-----i pa ta mas manera Shiblon.7
Mi ta gradisí mi Tata Selestial pa almanan manera Shiblon kual su ehèmpel ta ofresé ami----i nos tur----speransa. Den nan bida nos ta mira un testigu di un Tata den Shelu i un Salbador kariñoso i ku kompashon. Mi ta agregá mi testimonio na di nan ku un splika pa bira mas manera nan, den e nòmber di Hesu Kristu,amèn.