Skohe pa Kere

Dor di Elder L. . Whitney Clayton

Dor di Elder L. Whitney Clayton

E Salbador a proveé Su Evangelio komo un lus pa guia esnan ku skohe pa kere den i pa siguiE.

Yanüari ku a pasa, Sailor Gutzler di shete aña i su famia tabata biahando di Florida pa Illinois den un avion privá. Sailor su tata tabata bulando e avion. Djis despues ku a bira anochi, e avion a desaroyá problemanan mekániko i a aksidentá den serunan skur di Kentucky, boka abou den tereno gròf. Tur hende a muri ménos Sailor. Su pòls a kibra den e aksidente. E la sufri kòrtánan i raspa i e la pèrdè su sapatunan. E temperatura tabata di 38 grado Fahrenheit (òf 3 grado Celsius)--- tabata hopi friu, ku áwaseru den e anochi di invierno na Kentucky- i Sailor tabata tin bisti solamente shòrt, un T-shirt i un mea.

E la grita pa su mama i su tata, pero niun hende no kontestá. Kolektando su forsa, e la lanta pia bou bai en buska di yudansa, pasando den aroyo, krusando roinan, i ku kurashon pasando den sumpiña. For di altura di un seru chikí, Sailor a mira un lus den distansha, manera un mia leu. Trompekando den skuridat den un arbusto den direkshon di e lus, e la yega porfin na kas di un hende hòmber ku nunka e la konosé promé ku a sali yud’é. Sailor a skapa. Pronto nan a hib’é hospital pa yudansa pa su kaminda rekuperashon.¹

Sailor a sobrebibí paso e la mira un lus den distansia i e la bringa pa yega na dje-- apesar di e área brutu, de profundidat di e tragedia ku e la pasa aden, i e heridanan ku e la risibí. Pero loke nos s ata ku e la rekonosé e lus di e kas den distansia i e su chèns pa salba. Tabata tin speransa. E la tuma kurashi den e echo ku ni maske kon malu kosnan tabata, su salbashon lo ta den e lus ei.

No ta masha di nos lo pasa den e eksperensha tan horibel ku Sailor a pasa aden. Pero kada un di nos, den algun momentu, lo tin di lucha spiritualmente dor di nos propio eksperensianan difísil i kuminsá nos propio hornada emoshonal difísil. Den e momentunan ei, maske kon skur òf sin speransa, si nos busk’É, semper lo tin un lus spiritual ku ta señalá na nos, dunando nos speransa di reskate i alivio. E lus ta bria for di e Salbador di humanidat, ku ta e Lus di e Mundu.

Persibí lus spiritual ta diferente for di wak lus físiko. Rekonosé e lus spiritual di e Salbador ta kuminsá ku nos deseo di kere. Dios ta rekerí pa inisialmente por lo ménos nos kere. “Si bo spièrta i lanta bo fakultatnan…i ehersé bo partíkula di fe,” e profeta Alma ta siña, “si, hasta si bo no por mas ku deseá di kere, laga e deseo aki traha den bo, hasta ora bo kere den un manera ku bo por duna lugá na un porshon di e Salbador su palabranan.”²

Alma su yamada na nos pa deseá di kere i pa “duna lugá” den nos kurason na e Salbador su palabranan ta rekordá nos ku kere i fe ta rekerí nos eskoho i akshon personal. Nos mester “spièrta i lanta nos fakultatnan.” Nos ta puntra promé ku nos risibié; nos ta buska promé ku nos topa; nos ta bati na porta promé ku habrié pa nos. A duna nos e promesa aki: “Pa kada ken ku pidi, e ta risibíbo; i esun ku ta buska, ta topa; i esun ku bati na porta, ta wòrdu habri p’e.” ³

No tin un yamada mas pashonal pa nos kere ku esun ku a bin for di e Salbador mes, durante di su ministerio aki na tera, ora e la apelá na skuchadónan inkrédulo:

“Si mi no hasi e obra di mi Tata, no keremi.

“Pero si mi hasi, maske bo no keremi, kere mi obranan: pa bo sa, i kere, ku e Tata ta den mi, i ami den dje.” ⁴

Tur dia kada un di nos ta konfrontá un prueba. Ta e prueba di nos bida: nos lo skohe pa kere den dje i permití e lus di su evangelio pa krese den nos, òf nos lo rechasá di kere i insistí di siguiE biahe nos so den skuridat? E Salbador ta proveé Su evangelio komo lus ta guia esnan ku ta skohe pa kere den Dje i siguiE.

Despues di e aksidente, Sailor tabata tin un opshon. E por a skohe di keda n’e avion den skuridat, su so i ku miedo. Pero tabata tin un anochi largu su dilanti, i tabata pa bai bira mas friu. E la skohe otro kaminda. Sailor a subi e seru, i einan el a mira e lus den e horizonte.

Gradualmente, segun el a haña e kaminda den skuridat, e lus a bira mas briante. Ounke tabata tin momentunan ku e no por a mir’é. Kisas e la pèrdè na bista ora e tabata den e partinan mas abou òf patras di e palunan, pero e la sigui kana. Kada bia ku e por a mira e lus, Sailor tabata tin e evidensia ku e tabata riba e kaminda korekto. E no tabata sa eksaktamente ainda kiko e lus tabata, pero e la sigui kana den e direkshon ei basá riba loke e tabata sa, konfiando i sperando ku e lo mir’é atrobe si e sigui move pa dilanti den e bon direkshon. Dor di a hasi esaki, e por a salba su bida.

Nos bida tambe ta manera esei. Lo tin momentunan kaminda nos a wòrdu di, kaminda nos ta kansá, i kaminda nos bida ta parse skur i friu. Lo tin momentunan kaminda nos no por mira e lus den e horizonte, i nos lo sinti gana di rindi. Si nos ta dispuesto na kere, si nos tin deseo di kere, si nos skohe pa kere, e ora ei e enseñansanan di Salbador i su ehèmpel lo mustra nos e kaminda pa dilanti.

Skohe pa kere

Manera Sailor mester a kere ku e lo haña siguridat den e lus den distansha ei, nos tambe mester skohe pa habri nos kurason pa e realidat divino di e Salbador pa Su lus eterno i Su mizerikòrdia sanador. Profetanan durante tempu a enkurashá nos i hasta implorá nos pa kere den Cristu. Nan eksortashon ta reflehá un hecho fundamental: Dios no ta forsa nos pa kere. Na lugá di esei E ta invitá nos pa kere dor di manda profetanan bibiente i apòstelnan pa siña nos, dor di proporshoná eskrituranan, i dor di manda señalnan pa medio Su Espíritu. Nos ta esnan ku mester skohe pa brasa e invitashonnan spiritual ei, skohe pa wak ku nos wowonan interno e lus spiritual ku kua e ta yama nos ku n’e. E desishon pa kere ta e eskoho di mas importante ku nos por hasi. E ta moldia tur nos demas desishonnan.

Dios no ta obligá nos pa kere mas ku e ta oblig’é nos pa kumpli ku e mandamentunan, apesar di Su deseo perfekto pa bendishoná nos. Su yamada na nos ta pa kere den dje- pa ehersé e partíkula di fe i duna lugá pa su palabranan- ta keda den efekto awendia. Manera e Salbador a bisa, “Mi ta testifiká ku e Tata ta manda tur hende, tur kaminda, pa arepentí i kere den mi. ”⁵

Kere i testimonio i fe no ta prinsipionan pasivo. Nan no ta djis pasa ku nos. Kere ta algu nos ta skohe- nos tin speransa p’e, nos ta traha p’e, i nos ta sakrifiká p’e. Nos lo no bin ta kere aksidentalmente den e Salbador i su evangelio mas ku nos ta hasi orashon i paga diesmo aksidentalmente. Nos ta skohe aktivamente pa kere, meskos ku nos ta skohe pa mantené e otro mandamentunan.

Pone Kreensha de Akshon

Sailor lo no tabata sa den promé instante ku loke e tabata hasi manera e tabata pusha den kaminda dor di e matanan ku si esaki en bèrdat lo funshoná. E tabata pèrdí, i na herida; tabata skur i friu. Pero e la laga e sitio di aksidente i a sali bai buska sperando di wòrdu reskatá, lastrando i raskando su kaminda pa dilanti te ora e la mira un lus den distansha. Manera e la mir’é, e la hasi su esfuerso pa bai den su direkshon, rekordando loke e la mira.

Nos tambe mester duna lugá pa e speransa ku nos ta haña e lus spiritual dor brasa kreensha na lugá di skohe pa duda.. Nos akshonnan ta e evidensia di nos kreensha i ta bira e supstansia di nos fe. Nos ta skohe pa kere ora nos ta hasi orashon i ora nos ta lesa e skrituranan. Nos ta skohe pa kere ora nos ta yuna, ora nos ta mantené e Sabat sagrado, i ora nos ta adorá den tèmpel. Nos ta skohe pa kere ora nos boutisá i partisipá di e santa sena. Nos ta skohe kere pa kere, ora nos arepentí i buska pordon divino i amor ku ta sana.

Nunka no entregá

Tin bia progreso den kosnan spiritual por ta mustra slou òf manera sende paga kada bia. Tin bia nos ta sinti ku nos a pèrdè tereno, ku nos a kometé fayonan, òf ku nos mihó esfuersonan pa haña e Salbadó no ta funshonando. Si bo ta sinti asin’aki, por fabor no entregá- nunka. Sigui kere den Dje i den su Evangelio i den su Iglesia. Alinia bo akshonnan ku e kreensha ei. Den e momentunan ei ora e lus di bo fe a baha, laga bo speransa den e Salbador Su amor i grasia haña den Su evangelio, i Su Iglesia pasa riba e duda. MI ta primintí ku E ta para kla pa risibí bosonan. Ku tempu lo bo bin mira ku bo a hasi e mihó eskoho ku bo por a yega di hasi. Bo desishon yen kurashi pa kere den Dje lo bendishonábo innumerabel i pa semper.

E Bendishon di Kere

Mi a sinti e amor miserikòrdioso di e Salbador den mi bida. Mi a busk’É. Den mi propio momentunan di skuridat. I El a ekstendé [Su mannan] na mi ku Su lus ku ta sana. Un di e gran gosonan den mi bida ta biahando ku mi kasa Kathy pa topa miembronan di e Iglesia den hopi skina di e mundu. E enkuentronan maravioso aki a siña mi i a siña nos si e amor di Dios pa Su yunan. Nan a mustra mi e potensial sin límite pa alegria ku ta bira e bendishonnan di esnan ku skohe pa sigui e enseñansanan di e Señor JesuCristu. Mi a siña ku kere den Dje i den Su poder ku ta redimí ta e bèrdadero kaminda na “pas den e mundu, i bida eterno den e mundu benidero.”⁶

Mi ta testifiká ku JesuCristu ta e Fuente di lus i speransa pa nos tur. Ta mi orashon pa nos tur skohe di kere den dje. Den e nòmber di JesuCristu, amèn.