Buska Señor
Pa Elder José A. Teixeira
Di e Setenta
Ora nos profundisá nos komprondementu di e Salbador, nos lo haña un deseo mas grandi pa biba ku goso i un konvikshon di e goso aki ta posibel.
Mi rumannan stimá, ta ku gran goso mi ta pará aki dilanti boso awor ku nos ta partisipá huntu den e konferensha general aki. Skucha na e palabranan di sabiduria, konseho, konsuelo, i atvertensia den konferenshanan general durante hopi aña tabata un gran bendishon pa Hermana Teixeira, nos famia, i pa ami.
Den e temporada spesial aki di aña, spesialmente riba Pasku di Sabat, mi tin ku reflehá riba e nifikashon di e Salbador su enseñansanan i Su ehèmpel amabel i amoroso den mi bida.
Un komprondementu mas profundo di JesuCristu lo duna nos mas speransa pa futuro i, apesar di nos imperfekshonnan, mas konfiansa den logra nos metanan hustu. Esaki tambe lo duna nos un deseo mas grandi pa sirbi nos próhimo.
Señor a bisa, “[Buska] mi den tur pensamentu; no duda, no teme.” 1 Buska Señor i sinti Su presensia ta un búskeda diario, un esfuerso ku bal la pena.
Rumannan, awendia mas ku tur otro tempu, nos tin oportunidatnan i rekursonan eksepshonal na nos disposishon pa profundisá nos komprendementu di e enseñansanan di JesuCristu i di Su Ekspiashon. Usa e rekursonan aki bon lo yuda nos biba un bida fruktífero yen di goso.
Den e Salbador su metáfora di e mata di wendrùif i e takinan, el a bisa: “Keda den Mi i Ami den boso. Manera un taki no por duna fruta su mes,sin ku e ta pegá na e mata; boso tampoko no por, eksepto ku boso keda den mi.” 2
Mas mihó nos komprondé e ròl importante di Cristu den nos bida, mas konsiente nos ta bira di e propósito aki den mortalidat, ku ta pa tin goso. Sinembargo, e goso ei, no ta prevení nos for di eksperensiá pruebanan i difikultatnan, hasta algun asina grandi i kompleho ku nan por hiba nos na pensa ku felisidat no ta posibel den tal sirkunstansianan.
Mi sa pa eksperensia personal ku e goso di biba rektamente i permanente den Cristu por sigui apesar di e tribulashonnan ku ta karakterístika di mortalidat. Finalmente, e tribulashonnan hopi biaha ta enrikesé, refiná, i guia nos na un komprondementu mas profundo di e propósito di nos eksistensia aki den mortalidat i di e Ekspiashon di JesuCristu. En bèrdat, e plenitut di goso por wòrdu solamente lográ pa medio di JesuCristu. 3
El a bisa, “Ami ta e mata di wendrùif; boso ta e takinan. Esun ku keda den Mi i Ami den dje, lo karga hopi fruta, pasobra boso no por hasi nada sin Mi. ”4
Mi ta kere ku ora nos profundisá nos komprendementu di e Salbador, nos lo haña mas deseo pa biba ku goso i un konvikshon ku e goso aki ta posibel. Konsekuentemente, nos lo tin un abilidat mas grandi pa biba kada dia ku mas entusiasmo pa bida i pa warda e mandamentunan di Dios hasta den sirkunstansianan desafiante.
Laga nos no laga kos di hasi awe pa mañan. Ta awor nos tin ku bini na Cristu pasobra “si [nos]kere [E], [nos] lo traha miéntras ku ta awe.” 5
Tur dia nos mester konsiderá pa inkluí interakshon frekuente ku e enseñansanan di Cristu. Gestonan i aktonan chikitu i simpel hasí tur dia lo:
-
Profundisá nos komprendementu di e nifikashon di Señor den nos bida, i lo por:
-
Yuda nos kompartí e komprendementu aki ku e generashonnan ku ta lantando, ku sigur lo sinti e amor di Tata Selestial i Su Yu, JesuCristu, ora nan mira nos ehèmpel di biba e evangelio sinseramente.
Pues kua ta algun di e komportashonnan simpel den e tempu moderno aki ku lo bira un bálsamo pa nos alma den fortalesé nos testimonio di Cristu i Su mishon?
Na 2014,den e kompetensia di potrèt di National Geographic a risibí mas di 9,200 sumishon di fotografnan profeshonal i afishonadonan di mas di 150 pais. E potrèt ganadó ta representá un muhé den e sentro di un trein yená ku pasaheronan. E lus ku ta bini for di e selular ta iluminá su kara. E ta komuniká un mensahe kla na e otro pasaheronan: apesar di ta físikamente presente, en realidat e no ta einan. 6
Data mobil, smartphones, i retnan sosial a kambia nos manera di ta den mundu profundamente i kon nos ta komuniká ku otronan.
Den e era digital aki, nos por wòrdu transportá nos mes rápido na otro lugánan i aktividatnan ku ta kita nos lihé for di loke ta esensial pa un bida yen di goso.
E bida ku internèt aki, si lag’é sin kontròl, por duna mas importansia na relashon ku hende ku nos no konosé òf sin a topa nunka, mas bien ku hende ku nos ta biba ku n’e—nos mes famia!
Di otro banda nos tur sa ku nos ta bendishoná ku e ekselente rekursonan online, inkluso esnan desaroyá pa Iglesia manera vèrshonnan di teksto i ouditivo di e santu skrituranan i konferensha general, produkshonnan di video di e bida i e enseñansanan di JesuCristu, appnan pa graba nos historia familiar, i oportunidatnan pa skucha músika inspiradó.
E skohensianan i prioridatnan ku nos ta hasi ku nos tempu online ta desisivo. Nan por determiná nos progreso spiritual i madures den e evangelio i nos deseo pa kontribuí na un mihó mundu i pa biba un bida mas produktivo.
Pa e motibu aki, awe lo mi ke menshoná tres kustumber simpel ku lo establesé aktividat online saludabel. Esakinan lo generá e reflekshon propio diario ku ta nesesario pa nos por ta mas serka di e enseñansanan di nos Tata Selestial i Su Yu, JesuCristu.
Kustumber Number un: Bishitá e website ofisial di Iglesia pa rekursonan.
Bishita regular di e rekursonan aki durante siman lo yuda nos pa ta semper sensitivo pa e enseñansanan di e evangelio i ta animá nos famia i amigunan pa pensa i reflehá riba loke ta mas importante.
Kustumber Number dos: Suskribí na retnan sosial ofisial di Iglesia
E skohensia aki lo trese na boso pantaya e kontenido ku ta esensial pa profundisá boso búskeda i Señor i Su enseñansanan, i e lo fortalesé boso deseo pa komprondé e evangelio. Mas importante, esaki lo yuda boso kòrda kiko Cristu ta spera di kada un di nos.
Meskos ku “no tin bon tera sin un bon kunukero,” 7 meskos lo no tin bon kosecha online a ménos ku nos duna prioridat for di prinsipio kiko ta aksesibel pa nos dedenan i nos mente.
Kustumber Number tres: Traha Tempu pa Pone Boso Aparatonan Mobil un Banda
Ta refreskante pa pone nos aparatonan elektróniko un banda pa un tempu i na lugá bòltu blachinan di e skrituranan òf tuma tempu pa kombersá ku famia i amigunan. Spesialmente riba Señor su dia, eksperensiá e pas di partisipá den reunion sakramental sin e impulso konstante pa wak si boso tin un mensahe òf pòst nobo.
E kustumber di pone nos aparatonan mobil un banda pa un tempu lo enrikesé i amplia nos bista riba bida, pa bida ku no ta limitá na un pantaya di dies centimeter.
Señor JesuCristu a bisa, “Meskos ku e Tata a stima mi, asina mi ta stima boso: keda den mi amor.” 8 Dios ke pa nos tin goso i pa sinti Su amor. Cristu ta hasi e goso aki posibel pa kada un di nos. Nos tin e medionan pa konosé mihó i pa biba Su evangelio.
Mi ta duna mi testimonio di e goso ku ta eksistí ora nos warda e mandamentunan i di e pas i seguridat ku nos ta sinti ora nos permanesé den e amor di Tata Selestial i Su Yu, nos Salbador. Den e nòmber di JesuCristu, amèn.