E Perspektiva Eterno di e Evangelio

Pa Elder Rafael E. Pino

Di e Setenta

Ta esensial pa tin un perspektiva di e evangelio, pa e desishonnan ku ta afektá eternidat.

Den revelashon duná na Moises, ta wòrdu bisa na nos e intenshon deklará di nos Tata Selestial: Tata Selestial a deklará ku Su obra i Su gloria ta pa logra inmortalidat i bida eterno pa hende. ¹ Segun e deklarashon aki, e Tata su deseo ta pa duna tur hende e oportunidat pa risibí goso kompletu. Revelashonnan di delaster dia ta mustra ku nos Tata Selestial a krea un gran plan di felisidat pa tur Su yunan, un plan hopi spesial p’asina nos por regresá pa biba ku n’e.

Komprondé e plan di felisidat aki ta duna nos un perspektiva eterno i ta yuda nos pa balorá e mandamentunan, ordenansanan, kombenionan, i e pruebanan i tribulashonnan berdaderamente.

Un prinsipio importante ta bini di Alma: “Di manera ku Dios a duna nan mandamentunan, despues di a dunanan na konosé e plan di redenshon.” ²

Ta interesante pa nota e sekuensia den proseso di siñamentu. Nos Tata Selestial a siña Adam i Eva e plan di redenshon promé, i despues a duna nan mandamentunan.

Esaki ta un bèrdat grandi. Komprondé e plan lo yuda hende warda e mandamentunan, tuma mihó desishonnan, i tin e motivashon korekto.

Durante di e tempu ku mi a sirbi den Iglesia, mi a presensiá e deboshon i fieldat di miembronan di Iglesia den diferente pais, algun di nan ku tin konflikto polítiko, sosial, òf ekonómiko. Un faktor komun ku mi a haña hopi biaha den e miembronan aki ta e perspektiva ku nan tin di eternidat. E perspektiva eterno di e evangelio ta guia nos pa komprondé e lugá ku nos tin den Dios su plan, pa aseptá e difikultatnan i progresá dor di nan, pa tuma desishonnan, i pa sentralisá nos bida riba nos potensial dibino.

Perspektiva ta e manera ku nos ta mira kos ora nos wak nan for di sierto distansia, i e ta laga nos apresiá nan balor.

Ta manera di ta den un mondi i tin un palu dilanti nos. Si nos no hala un tiki patras, nos lo nos por ta kapas pa apresiá kiko e mondi ta realmente. Un biaha mi a bishitá e Amazon jungel den Leticia, Colombia, serka di e frontera di Brazil i Perú. No tabata posibel pa apresiá su magnitut te ora ku mi a bula over di dje i a haña e perspektiva.

Tempu nos yunan tabata chikitu, nan tabata wak un kanal di televishon pa mucha ku tabata pasa un programa yamá Kiko bo Ta Mira? E pantaya lo zum hopi serka di algu, i e muchanan lo rei kiko e tabata segun e imágen ta bira gradualmente hanchu. Una bes ku e opheto ta kompletamente visibel, bo por sa fásilmente ku e tabata un pushi, un mata,un pida fruta,i sigui asina.

Mi ta kòrda ku na un okashon nan tabata wak e programa aki i el a mustra un kos masha serka i e tabata mustra masha mahos pa nan, hasta repugnante; pero ora e imágen a bira grandi, nan a realisá ku e tabata un pizza hopi apetitoso. Despues nan a bisa mi, “Papi, kumpra un pa nos meskos ku esun ei!” Despues nan a komprondé kiko e tabata, algu ku promé a mustra desagradabel pa nan a resultá un kos masha atraktivo.

Laga mi kompartí un otro historia. Den nos hogar nos yunan tabata gusta traha pùzel. Probablemente nos tur a haña e oportunidat pa traha un pùzel. Algun ta trahá di hopi pida chikitu. Mi ta kòrda ku un di nos yunan(lo mi no menshoná su nòmber pa protehá su identidat) tabata konsentrá riba e pidanan individual, i ora un no tabata pas kaminda el a pensa ku e mester ta, e tabata bira rabiá i asumí ku e no tabata bon i ke a tir’é afó. Finalmente el a siña pa traha e pùzel ora el a komprondé ku kada pida chikitu tin su lugá den e imágen final, hasta ora e no tabata sa unda e ta pas na dado momento.

Esaki ta un manera pa konsiderá Señor su plan. Nos no tin ku prekupá nos mes ku kada parti separadamente pero mas bien purba di trese e imágen kompletu den nos enfoke, i tene na mente kiko e resultado final lo ta. Señor sa unda kada pida ta bai p’asina e pas den e plan. Tur e mandamentunan ta di importansia eterno den e konteksto di e gran plan di felisidat.

Ta sumamente importante pa nos no tuma desishonnan di balor eterno for di e perspektiva di mortalidat. Ta esensial pa tin un perspektiva di e evangelio, pa e desishonnan ku ta afektá eternidat.

Elder Neal A. Maxwell a siña: “Ounke nos ta ankrá den e speransa grandioso di kosnan eterno, kisas algun di nos speransanan ménos grandioso no ta wòrdu kumplí. Nos por spera pa mas pago, un sita spesial, viktoria elektoral, òf un kas mas grandi---kosnan ku por wòrdu i keda sin wòrdu realisá. Fe den Tata su plan ta duna nos persistensia hasta ora e meta nan aki no ta wòrdu lográ. Speransa ta tene nos ansiosamente envolví den bon kousanan hasta ora esakinan ta parse di ta kousanan pèrdí (wakD&C 58:27).”³

No tin un perspektiva eterno, òf pèrd’é, por hiba nos pa tin un perspektiva mundano komo nos norma personal i pa tuma desishonnan ku no ta den harmonia ku e boluntat di Dios.

E Buki di Mormon ta menshoná e aktitut ku Nefi a tuma i e aktitut di Laman i Lemuel. Nan tur a sufri hopi difikultat i bastante aflikshon; sinembargo, nan aktitut na pruebanan tabata hopi diferente. Nefi a bisa, “I asina grandi tabata e bendishonnan di Señor riba nos, ku ounke nos tabata biba riba karni kurú den desierto, nos muhénan tabatin hopi lechi pa nan yunan, i tabata fuerte, si, asta manera e hòmbernan; i nan a kuminsá soportá nan biahenan sin murmurashon.” ⁴

Sinembargo Laman i Lemuel,, a keha ku amargura. “I di e manera aki Laman i Lemuel, ku tabata esnan mayó, a kuminsá murmurá kontra nan tata. I nan a murmurá pasobra nan no tabata konosé e tratonan di e Dios ei ku a krea nan.” ⁵ No konosé òf sin konsiderá “e tratonan di … Dios ta un manera di pèrdè perspektiva eterno, i murmurá ta djis un di e síntomanan. Ounke Laman i Lemuel a presensiá hopi milager huntu ku Nefi, nan a sklama, bisando: “I nos a kana rònt den e desierto pa tur e añanan aki; i nos muhénan a pasa trabou, miéntras nan tabata na espera; i nan a duna lus den e desierto i sufri hopi kos, ménos morto; i lo tabata mihó si nan a muri promé ku nan a sali di Yerúsalèm en bes di sufri e aflikshonnan aki.” ⁶

Eseinan tabata dos aktitut diferente, ounke e difikultatnan i e aflikshonnan ku nan tabatin tabata similar. Opviamente, nan perspektiva tabata diferente.

Presidente Spencer W. Kimball a skibi e siguiente: “Si nos wak na mortalidat komo e totalidat di eksistensia, e ora ei doló, tristesa, frakaso, i bida kòrtiku lo bira kalamidat. Pero si no wak na bida komo un kos eterno ku ta ekstendé mas leu ku pasado premortal te den e futuro eterno despues di morto, e ora ei tur akontesimentu lo wòrdu poné den e perspektiva apropiá.” ⁷

Elder David B. Haight a konta un historia tokante dje eskultor Michelangelo pa ilustrá e importansia di mira tur kos den un perspektiva apropiá: “Ora e eskultor tabata usa beitel riba un blòki di marmer, un mucha hòmber tabata bini tur dia i wak ku timides. Ora e figura di David a aparesé for di e piedra,kompletu pa henter mundu atmirá, e mucha a puntra Michelangelo, ‘Kon bo tabata sa ku e tabata ei den?’’’ ⁸

E perspektiva ku kua e eskultor a mira e blòki di marmer aki tabata diferente for di esun di e mucha ku tabata wak e traha. E bista di e artista di e posibilidatnan enserá den e piedra a pèrmití pa e krea un obra di arte.

Señor sa kiko E ke logra ku kada un di nos. E sa kua sorto di reformashon E ke pa nos logra den nos bida, i nos no tin e derechi pa konseh’é. Su pensamentunan ta mas grandi ku nos pensamentunan. ⁹

Mi ta testifiká ku nos tin un Tata Selestial amoroso, hustu, i miserikordioso ku a prepará un plan pa nos felisidat eterno. Mi ta testifiká ku JesuCristu ta Su Yu i e Salbador di mundu. Mi sa ku Presidente Thomas S. Monson ta un profeta di Dios. Mi ta bisa e kosnan aki den e nòmber di JesuCristu, amèn.