Dikon Matrimonio i Famia ta Importá—Tur Kaminda na Mundu
Pa Elder L. Tom Perry
Di e Quorum di Diesdos Apòstelnan
Famia ta e sentro di bida i ta e yabi pa e felisidat eterno.
Novèmber pasá mi tabatin e privilegio di wòrdu invitá- huntu ku Presidente Henry B. Eyring i Obispu Gérald J. Caussé—pa asistí na un konferensha tokante matrimonio i famia na e Vatikano na Roma, Italia. Den asistensia tabatin representantenan religioso di 14 religion diferente i for di seis of shete kontinente, tur a wòrdu invitá pa ekspresá nan kreenshanan riba loke ta pasando na famia den e mundu di awe.
Papa Francisco a habri e promé seshon di e reunion ku e deklarashon aki: Awor nos ta biba den un kultura di kosnan temporal, den kua mas i mas hende ta simplemente no ta aseptá matrimonio komo un kompromiso públiko. E revolushon aki den manera i moralidat frekuentemente ta bai bou di e bandera di libertat, pero defakto el a trese desolashon spiritual i material pa hopi ser humano, spesial pa esnan mas pober i mas vulnerabel… Ta semper nan ta sufri mas den e krísis aki.”1
Papiando tokante di esnan ku ta e generashon hóben, el a bisa ku e ta importante ku nan “no entregá nan mes na e mentalidat venenoso di kosnan temporal, pero mihó bira e revolushonarionan ku e kurashi pa buska amor berdadero i duradero, pa bai kontra di modelonan komun”; esaki mester wòrdu hasí.2
Esaki a wòrdu siguí pa tres dia di presentashon i diskushonnan ku lidernan religioso papiando tokante e tema di matrimonio entre un hòmber i un muhé. Miéntras mi tabata tende na e variedat mas inimaginabel di lidernan religioso mundial, mi a tende nan bai di akuerdo kompletamente ku otro i ekspresá apoyo pa kreensha di otronan riba e santidat di e institushon di matrimonio i di e importansia di famianan komo e unidat básiko di sosiedat. Mi a haña un sentimentu poderoso di meta komun i unidat ku nan.
Tabatin hopi ku tabata mira i ekspresá e unidat aki, i nan a hasi esei den un variedat di manera. Un di mi faborito tabata ora un intelektualnan Musulman for di Iran a lesa dos párafo palabra pa palabra for di nos mes proklamashon di e famia.
Durante e konferensha, mi a mira ku ora e variedat religioso i denominashon di religion ta uní tokante matrimonio i famia, nan ta uní tambe riba e balornan i lealtat i kompromiso ku ta naturalmente asosiá ku unidatnan di famia. E tabata remarkabel pa mi wak kon prioridatnan sentrá riba matrimonio i famia tabata mas grandi ku diferensianan polítiko, ekonómiko, òf religioso. Ora e ta bai tokante amor di matrimonio, i speransanan, preokupashonnan, i soñonan pa yunan, nos tur ta meskos.
E tabata maravioso pa ta den reunionnan ku Diskursantenan mundial ora nan tabata papia universalmente di nan sentimentu di e importansia di matrimonio entre un hòmber i muhé. Kada un di nan diskurso a wòrdu siguí pa testimonionan di otro lidernan religioso. Presidente Henry B. Erying a duna e testimonio final di e reunion. El a duna testimonio poderoso di e beyesa di un matrimonio komprometí i na nos kreensha den e bendishonnan primintí di famianan eterno.
Testimonio di Presidente Eyring tabata apropiá komo delaster diskursante di e tres dianan speshal.
Awor, boso lo por puntra, “si e mayoria a sinti e similaridat di prioridat di famia i kreensha, si tur di e fe i religionnan den esensia ta di akuerdo riba loke matrimonio mester ta, i si tur ta di akuerdo riba e balor di loke mester wòrdu poné riba kas i relashon di famia, anto, kon nos ta diferente? Kon E Iglesia di JesuCristu di e Santunan di Delaster Dianan ta distinguí i diferensiá su mes for di e restu di e mundu?
Esaki ta e kontesta: miéntras e ta maravioso pa mira i sinti ku nos tin hopi en komun ku e restu di mundu tokante nos famia, únikamente nos tin e perspektiva eterno di e evangelio restourá.
Loke e evangelio restourá ta trese na e diskushon di matrimonio i famia ta asina grandi i relevante ku e no por wòrdu enfatisá dimas: nos ta hasi e tema eterno! Nos ta tuma e kompromiso i e santidat di matrimonio na un nivel mas haltu dor di nos kreensha i komprenshon ku famianan a kuminsá promé ku e tera tabata i nan ta sigui bai dilanti den eternidat.
E doktrina ta wòrdu siñá asina simpel, poderoso, i bunita dor di e tekstto di Ruth Gardner for di e kantika di Primaria. “Famianan Por Ta Huntu Pa Semper.” Hasi un pousa pa djis un momento i pensa riba di muchanan di Primaria rònt mundu kantando e palabranan aki den nan idioma, ku forsa, ku un animo ku únikamente amor di famia por evoká:
Famianan por ta huntu pa semper
Pa medio di e plan di Tata Selestial.
Semper lo mi ke ta ku mi mes famia,
I E Señor a mustrami kon mi por.3
E henter teologia di nos evangelio restourá ta sentrá den famianan i den e konbenio nobo i eterno di matrimonio. Den E Iglesia di JesuCristu di e Santunan di Delaster Dianan, nos ta kere bida premortal unda nos tur a biba komo yunan spiritual liternal di Dios nos Tata Selestial. Nos ta kere ku nos tabata, i ainda ta, miembronan di Su famia.
Nos ta kere ku matrimonio i lasonan familiar por sigui mas aya ku e graf— ku matrimonionan ehekutá pa esnan ku tin e outoridat apropiá den Su tèmpelnan lo sigui di ta válido den e mundu ku ta bini. Nos seremonia di matrimonio ta eliminá e palabranan “asta ku morto lo separá nos” i la lugá di esaki ta bisa “pa tempu i pa tur eternidat.”
Tambe nos ta kere ku famianan tradishonal fuerte no ta djis e úniko unidat básiko di un sosiedat stabil, un ekonomia stabil, i balornan kultural stabil—pero ku nan tambe ta e unidatnan básiko di e eternidat i di e reino i gobièrnu di Dios.
Nos ta kere ku e organisashon i gobièrnu di shelu lo wòrdu edifiká rònt famia i pariente.
ta un lider i un partisipante de esfuersonan mundial pa fortalesé nan. Nos sa ku no ta únikamente esnan ku ta religiosamente aktivo ku ta kompartí balornan komun i prioridatnan di matrimonio duradero i relashonnan di famia fuerte. Un kantidat grandi di hende sekular a konkluí ku un matrimonio komprometí i estilo di bida di famia ta e manera mas sensibel, mas ekonómiko, i e manera mas felis pa biba.
Niun hende a yega di bin ku un manera mas efisiente pa lanta e generashon nobo ku esun ku ta konsistí di un famia di mayornan i muchanan.
Dikon e matrimonio i famia ta importante—tur kaminda? Enkuesta di opinion públiko ta mustra ku matrimonio ainda ta e meta ideal i e speransa entre e mayoria di grupo di tur edat— asta entre e generashon di milenio unda nos ta tende hopi tokante skohensia pa ta soltero, libertat personal, i biba huntu la lugá di matrimonio. E realidat ta ku mayorianan mundial ainda ke pa tin yunan i pa krea famianan fuerte.
Ora ku nos kasa i nos tin yunan, e punto komun berdadero entre henter humanidat ta bira mas evidente. “Komo hende [ku ta kere den] famia” — sin importá unda nos ta biba of kua por ta nos kreenshanan religioso— nos ta kompartí hopi desafio, e mesun ahustenan, i e mes speransanan, preokupashonnan i soñonan pa nos yunan.
Un skritor den e korant New York Times David Brooks a bisa: “Hende no ta mihó ora nan ta wòrdu duná máksimo libertat personal pa hasi loke nan ke. Nan ta mihó unda nan ta rondoná pa kompromisonan ku ta transendé desishon personal—kompromisonan pa famia, Dios, trabou i pais.”4
Un problema ta ku ta hopi di e medionan i entretenimentu ku e mundu ta kompartí no ta reflehá e prioridatnan i balornan di e mayoria. Pa kualkier motibu, hopi di nos televishon, pelíkulanan, músika, e Internet ta presentá un kaso klásiko di un minoria pretendiendo ku ta e mayoria. Inmoralidat i falta di moralidat, for di violensia gráfiko i sèks pa rekreashon, ta wòrdu mustrá komo e norma i por hasi esnan ku ta den e mayoria di balornan tradishonal sinti komo nos ta for di moda, òf for di otro tempu pasá. Den un mundu ei ku ta dominá pa e Internet i media, nunka tabata mas difísil pa kria yunan responsabel i pa warda matrimonionan i famianan huntu.
Apesar di loke hopi di e media i forma di entretenimentu por sugerí, tòg, i apesar di e realidat di kaida den e orientashon di matrimonio i famia di algun, e mayoria sólido di humanidat ainda ta kere ku matrimonio mester ta entre un hòmber i un muhé. Nan ta kere den fidelidat den matrimonio, i nan ta kere den promesanan di matrimonio “den enfermedat i den salú” i “asta ku morto separá nos.”
Nos mester rekòrdá nos mes frekuentemente, manera mi a wòrdu rekòrdá na Roma, di e konfiansa maravioso i ku ta duna konsuelo ku matrimonio i famia te ainda ta e aspirashon i meta ideal di kasi tur hende i ku nos no ta nos so den e kreenshanan ei. Nunka tabata un desafio mas difísil pa haña un balanse práktiko entre trabou, famia, i nesesidat personal manera ta den nos dianan. Komo un iglesia, nos ke yuda den tur loke nos por pa krea i apoyá matrimonionan fuerte i famianan.
Esaki ta e motibu ku e Iglesia ta partisipá aktivamente den i ta duna liderazgo na hopi grupo i esfuerso ekuméniko pa fortalesé e famia. E ta e motibu ku nos ta kompartí nos balornan enfoká riba famia den e media i riba media sosial. E ta e motibu ku nos ta kompartí nos registro genealógiko i di famia ku tur nashon.
Nos ke nos bos wòrdu skuchá kontra e estilo di bida falsu ku ta purba pa remplasá e organisashon di famia ku Dios Mes a establesí. Nos ke nos bos wòrdu skuchá den sostenementu di e goso i logro ku famia tradishonal ta trese. Nos mester sigui ekspresá e bos ei rònt mundu deklarando kon matrimonio i famia ta asina importante i e motibu ku matrimonio i famia ta berdaderamente importá, i dikon semper nan lo ta importante.
Mi rumannan, e evangelio restourá ta sentrá riba matrimonio i famia. E ta tambe riba matrimonio i famia unda nos mas por uni ku otro religionnan. E ta rònt di matrimonio i famia unda nos por haña e parti mas grandi [ku nos tin en] komun ku e restu di e mundu. E ta rònt di matrimonio i famia ku E Iglesia di JesuCristu di e Santunan di Delaster Dianan tin e oportunidat mas grandi pa ta un lus riba e seru.
Laga mi kaba dunando mi testimonio (i mi nuebe dékadanan riba e tera aki ta kalifikámi kompletamente pa bisa esaki) ku miéntras mi ta bira mas bieu, mas mi ta ripara ku e famia ta e sentro di bida i ta e yabi pa felisidat eterno.
Mi ta duna danki pa mi kasa, pa mi yunan, i pa mi nietunan i mi bisa-nietunan, i pa tur e primonan i parientenan ku ta hasi mi mes bida hopi riku i, si, asta eterno. Di e bèrdat eterno aki mi ta duna mi testimonio mas fuerte i mas sagrado den e nòmber di JesuCristu, amèn.