Wardando riba Esun Pèrdí

Pa Elder Brent H. Nielson

Di e Setenta

Ku boso i ami por risibí e revelashon pa sa kon pa aserká mihó esnan den nos bida ku a pèrdè.

E Salbador a pasa Su ministerio terenal siñando di Su poder sanadó i redentor. Na un okashon den Lukas kapítulo  15den e Tèstamènt Nobo, En realidat E tabata wòrdu kritiká pa kome i pasa tempu ku pekadornan(wak Lukas 15:2). E Salbador a usa e kritikamentu aki komo un oportunidat pa siña nos kon pa trata esnan ku a pèrdè nan kaminda.

El a respondé na Su krítikonan dor di hasi nan dos pregunta:

“Si un di boso tin shen karné, anto e pèrdè un di nan, akaso e no ta laga e nobentinuebe karnénan den mondi, pa bai buska esun pèrdí te ora e hañ’é?” (Lukas 15:4).

“Òf ta kua muhé, ku pèrdè un di su dies monedanan di plata, no ta sende lampi, bari kas i buska ku mashá kuidou te ora e hañ’é?” (Lukas 15:8).

E Salbador despues ta siña e parábola di e yu pèrdí. E parábola aki no ta tokante 100 karné òf 10 moneda di plata; de ta tokante un yu hòmber balioso ku ta pèrdí. Kiko e Salbador ta siña nos pa medio di e parábola, tokante kon pa trata ora un miembro di nos famia a pèrdè su kaminda?

E yu pèrdí ta informá su tata ku e ke su herensia inmediatamente. E ke bai laga e seguridat di su hogar i famia i hiba un bida parotin(wakLukas 15:12–13). Por fabor nota ku den e Salbador su parábola e tata a respondé ku amor dor di duna su yu su herensia. Sigur e tata mester a hasi tur kos ku e tabata por pa kombensé e yu pa keda. Sinembargo, una bes ku e yu adulto a hasi su eskoho, e tata sabio a lag’é bai. E tata despues ta demostrá amor sinsero, i e ta wak i e ta warda (wak Lukas 15:20).

Mi famia tabatin un eksperensia similar. Mi dos rumannan hòmber fiel, mi ruman muhé maravioso, i ami a wòrdu kriá pa mayornan ehemplar. E Evangelio a wòrdu siñá na nos den nos hogar, nos a yega edat di adulto ku éksito, i nos tur kuater a wòrdu seyá den tèmpel na nos kasánan. Sinembargo, na 1994 nos ruman muhé, Susan, a bira desilushoná ku Iglesia i algun di su enseñansanan. El a wòrdu persuadí pa esnan ku tabata hasi mofa i kritiká Iglesia i algun di su enseñansanan. El a pèrmití su fe den profetanan bibiente i apòstelnan disminuí. Despues di tempu, su dudanan a vense su fe, i el a skohe pa bai for di Iglesia. Susan a duna mi pèrmit pa kompartí su historia ku e speransa ku e por yuda otronan.

Mi rumannan hòmber i nos mama biuda i ami tabata hopi tristu. Nos no por a imaginá kiko por a hib’é na bandoná su fe. Tabata parse ku e skohensianan di mi ruman muhé tabata kibra kurason di mi mama.

Mi rumannan i ami a sirbi komo obispu i presidentenan di quorum, i nos a eksperensiá e goso di éksito ku miembronan di bario i quorum ora nos a laga e nobentinuebe nan i a bai buska esun. Sinembargo, ku nos ruman muhé, nos esfuersonan persistente pa reskaté i invit’é pa bini bèk a solamente push’é mas i mas leu.

Miéntras nos tabata buska guia selestial pa sa kon nos por respondé korektamente na dje, a bira evidente ku nos tabatin ku sigui e ehèmpel di e tata den e parábola di e yu pèrdí. Susan a hasi su eskoho, i nos mester a lag’é bai---pero no sin ku el a sa i a sinti nos amor sinsero p’e. I asina ku, amor i amabilidat renobá, nos a wak i a warda.

Mi mama nunka no a stòp di stima i kuida Susan. Kada bia ku mi mama a bishitá tèmpel, el tabata pone Susan su nòmber riba e lista di orashon, i no a pèrdè speransa nunka. Mi ruman hòmber mas grandi i su esposa, ku tabata biba mas serka di Susan den California, tabata invit’é na tur evento familiar. Nan tabata prepará sena den nan hogar tur aña riba Susan su kumpleaño. nan tabata sigurá pa nan tin kontakto ku n’e semper i ku e por sa di nan amor sinsero pe.

Mi ruman hòmber mas yòn i su esposa a tuma kontakto ku Susan su yunan na Utah i a kuida i stima nan. Nan a sigurá nan mes ku su yunan tabata wòrdu invitá semper na reunionnan familiar, i ora tabata tempu pa Susan su nieta wòrdu boutisá, mi ruman hòmber tabata aya pa hasi e ordenansa. Susan tabatin maestronan orientadó ku amor i maestranan bishitante ku nunka no a pèrdè speransa.

Ora nos yunan a bai mishon i a kasa, Susan tabata invitá pa tuma parti na e selebrashonnan familiar aki. Nos a purba diligentemente pa krea eventonan familiar pa asina Susan i su yunan por ta huntu ku nos i nan por sa, ku nos ta stima nan i ku nan ta parti di nos famia. Ora Susan a risibí un grado mas haltu na un universidat na California, nos tur tabata aya pa apoy’é na su graduashon. Nos a stima, wak, i a warda.

Na 2006, despues di 12 aña ku Susan a bai for di Iglesia, nos yu Katy a muda ku su kasá pa California pa e por a bai studia pa bira abogado. Nan tabata den mes un suidat ku Susan. E pareha yòn aki a buska yudansa serka nan tanta Susan, i nan a stim’é. Susan a yuda kuida nos nietu Lucy di dos aña, i Susan haña e mes ta yuda Lucy ku su orashonnan anochi. Katy a yama mi un dia i a puntra mi si mi tabata pensa ku Susan lo regresá na Iglesia. Mi a sigur’é ku mi a sinti ku lo e regresá i ku nos mester sigui tin pasenshi. Miéntras tres aña mas a pasa, nos a sigui stima, wak i warda.

E wikènt aki ta seis aña pasá, ku mi kasá, Marcia, i ami tabata sintá den e promé rei den e sentro di konferensha aki. Mi lo a wòrdu sostené komo un Outoridat General nobo e dia ei. Marcia, ku semper ta den kontakto ku e Spiritu, a skibi un nota na mi ku tabata bisa, “Mi ta pensa ku ta tempu pa Susan bini bèk.” Mi yu muhé Katy a sugerí pa mi bai i yama Susan pa invit’é pa wak konferensha general e dia ei.

Animá pa e dos muhénan tremendo aki, mi a kana pa e entrada i a yama mi ruman. Mi a haña su voicemail i a simplemente invit’é pa wak e seshon aki di konferensha general. El a haña e mensahe. Pa nos alegria, el a sinti e impreshon pa wak tur e seshonnan di konferensha. El a skucha di profetanan i apòstelnan ku el a stima añanan pasá. El a skucha nòmbernan nobo ku e no a yega di skucha, manera di Presidente Uchtdorf i Èldernan Bednar, Cook, Christofferson, i Andersen. Durante esaki i otro eksperensianan manda di shelu, mi ruman muhé---meskos ku e yu pèrdí---a bini bei(wak Lukas 15:17).E palabranan di profetanan i apòstelnan i e amor di su famia a konmové pa bira i kuminsá na su kaminda pa kas. Despues di diesinku aña nos yu muhé i i ruman ku tabata pèrdí a wòrdu hañá. E wakmentu i wardamentu a kaba.

Susan ta deskribí e eksperensia aki meskos ku Lehi a deskribí den e Buki di Mormon. El a laga e bara di heru lòs i a haña su mes den un neblina di skuridat(wak 1 Nefi 8:23). El a bisa ku e no tabata sa ku e tabata pèrdí te ora ku su fe a wòrdu spièrtá pa e lus di Cristu, ku klaramente a magnifiká e kontraste fuerte entre lokual e tabata eksperensiando den mundu i lokual Señor i su famia tabata ofresiendo.

Un milager a sosodé den e seis añanan ku a pasa. Susan a renobá su testimonio di e Buki di Mormon. El a risibí su rekomendashon di tèmpel. El a sirbi komo obrero pa ordenansanan den tèmpel, i aktualmente e ta siña e klas di Doktrina di Evangelio den su bario. E bentananan di shelu a habri pa su yunan i su nietunan, i ounke tabatin konsekuensianan difísil, ta parse ku e no a bai nunka.

Algun di boso, meskos ku famia Nielson, tin miembronan di famia kua temporalmente a pèrdè nan kaminda. E Salbador su instrukshon na tur ku tin 100 karné ta pa laga e nobentinuebe i bai tras di di esun i reskaté. Su instrukshon na esnan ku tin 10 moneda di plata i a pèrdè un mester buska te ora e hañ’é. Ora esun pèrdí ta bo yu, bo ruman, i el a skohe pa bai,nos a siña den nos famia ku, despues di tur kos ku nos por hasi, nos ta stima e persona ei ku henter nos kurason i nos ta wak, hasi orashon i nos ta warda pa Señor su man wòrdu revelá.

Podisé e lès di mas importante ku Señor a siña mi den e proseso aki a sosodé durante nos estudio di skritura despues ku mi ruman a bai for di Iglesia. Nos yu David tabata lesa ora nos tabata studia huntu Lukas 15. Miéntras e tabata lesa e parábola di e yu pèrdí, mi a skuch’é diferente e dia ei for di manera ku mi a skuch’é ántes. Pa algun motibu, semper mi a relatá mi mes na e yu ku a keda kas. Miéntras David tabata lesa e mainta ei, mi a realisá ku den algun manera I ami tabata e yu pèrdí. Nos tur ta falta di e gloria di e Tata(wak Romanonan 3:23). Nos tur tin mester di e Salbador su Ekspiashon pa kura nos. Nos tur ta pèrdí i mester wòrdu hañá. E revelashon aki e dia ei a yuda mi sa ku mi ruman i ami tabatin mester di e amor di e Salbador i Su Ekspiashon. Susan i ami tabata riba e mesun kaminda bèk pa kas.

E palabranan di e Salbador den e parábola manera E ta deskribí e tata saludando su yu pèrdí ta poderoso, i mi ta kere ku nan por ta e deskripshon di e eksperensia ku boso i ami lo tin ku e Tata ora nos bolbe na nos hogar selestial. Nan ta siña nos di un Tata ku ta stima, warda, i wak. Esakinan ta e palabranan di e Salbador: “Su tata a mir’é ta bini djaleu; el a haña duele di dje. E tata a kore bai serka dje, bras’é i sunchié “”(Lukas 15:20).

Ku boso i ami por risibí e revelashon pa sa kon pa aserká esnan den nos bida ku ta pèrdí i, ora ta nesesario, pa tin pasenshi i amor di nos Tata den Shelu i Su Yu, JesuCristu, ora nos ta stima, wak, i warda pa esun pèrdí. Den e nòmber di JesuCristu, amèn.