E Plan di Felisidat

Pa Presidente Boyd K. Packer

Presidente di e Quorum di e Diesdos Apòstelnan

E meta di tur aktividat na Iglesia ta pa sòru pa un hòmber i un muhé huntu ku nan yunan ta felis na kas, seyá pa eternidat.

Hopi aña pasá, despues di e di dos Guera Mundial, mi tabata bai universidat. Ei mi a topa Donna Smith. Rònt dje tempu ei mi a lesa ku dos ingrediente esensial pa un matrimonio eksitoso ta un kuki i un sunchi. Mi a pensa ku e tabata un bon ekilibrio.

Mi tabata bai universidat parti mainta, i despues bai bèk Brigham City pa traha den mi tata su garashi pa drecha outo parti atardi. Donna su delaster lès di mainta tabata ekonomia doméstiko. Mi tabata para na su klas promé ku mi a bai. E porta tabatin un glas transparente, pero ku mi tabata para serka di e glas, e por a mira mi sombra pafó. E lo a sali ketu ketu ku un kuki i un sunchi. Sobra ta historia. Nos a kasa den e Salt Lake Tèmpel, i asina e gran aventura di nos bida a kuminsá.

Durante e añanan ku frekuensia mi a siña un prinsipio importante: e resultado final di tur aktividat den Iglesia ta pa logra ku un hòmber i un muhé huntu ku nan yunan ta felis na kas i seyá huntu pa tempu i pa eternidat

Na kuminsamentu:

E Diosnan a bai abou pa organisá hende den nan propio imágen, den e imágen di Dios a forma nan, maskulino i femenino.

I e Diosnan a bisa ku nan lo bendishoná nan. I e Diosnan a bisa ku nan lo hasi pa nan ta fruktífero i multipliká, i yena e tera, i someté. (Abraham 4:27–28).

I asina e siklo di bida humano a kuminsá riba e mundu aki ora Adam a uni ku su kasá i el a dun’é yunan hòmber i yunan muhé, i nan a kuminsá multipliká i a yena e tera.

I  e yunan di Adam a kuminsá separá nan mes den par den e tera   i nan tambe a haña yunan. (Moises 5:2–3).

E mandamentu pa multipliká i yena e tera no a wòrdu anulá. E ta esensial pa e plan di redenshon i ta e fuente di felisidat humano. Dor di ehersé e poder aki korektamente, nos lo por yega serka di nos Tata den Shelu i eksperensiá goso kompletu, inkluso dibinidat. E poder di prokreá no ta un parti insidental di e plan di felisidat; e ta e plan di felisidat.

E deseo den ser humano pa ta pareha ta konstante i hopi fuerte. Nos felisidat den bida mortal, nos goso, i eksaltashon ta dependé na kon nos ta reakshoná riba e deseonan físiko persistente i iresistibel aki. Ora e poder pa prokreá ta madurá den edat adulto, sentimentunan hopi personal ta presentá, den un manera natural, diferente for di kualke otro eksperensia físiko.

Idealmente, forma pareha ta kuminsá ku romanse. Ounke kustumbernan por varia, e ta floresé ku tur sentimentunan di eksitashon i antisipashon manera den kuentanan, hasta tin biaha ku rechaso. Tin lus di luna, rosa, kartanan i kantikanan di amor, poesia tenementu di man, i otro ekspreshonnan di afekto entre un hòmber i muhé yòn. Mundu ta disparsé pa e pareha, i nan ta eksperensiá sentimentunan di goso.

I si boso ta suponé ku plaser kompletu di amor romántiko yòn ta e suma total di e posibilidatnan ku ta brota for di e fuentenan di bida, ainda boso no a biba pa mira e deboshon i komodidat di amor den matrimonio di bida largu. E parehanan kasá ta wòrdu probá ku tentashon, malkomprendementu, problemanan finansiero, krísis den famia,i enfermedat, i miéntras tantu tur e amor ta bira mas fuerte. Amor madurá tin un dicha ku pareha resien kasá ni sikiera por imaginá.

Amor berdadero ta pidi pa reservá te despues di matrimonio e interkambio di e afekto ku ta habri e podernan sagrado di e fuente di bida. E ta nifiká pa evitá situashonnan unda e deseo físiko por tuma kòntròl. E amor puru ta suponé di ta solamente despues di un promesa di fidelidat eterno, un seremonia legal i legítimo i preferiblemente despues di e ordenansa di seyamentu den tèmpel, ku e podernan prokreadó ta wòrdu liberá den bista di Dios pa e ekspreshon kompleto di amor. E ta pa wòrdu kompartí únikamente i  solamente  ku boso kompañero eterno.

Ora drenta den dje digno, e proseso aki ta kombiná e sentimentunan físiko, emoshonal i spiritual di mas ekskisito i eksaltá asosiá ku e palabra amor.E parti di bida aki no tin igual, no tin ekivalente, den henter e eksperensia humano. Lo e dura eternamente, ora kombenionan wòrdu hasí i wardá, pasobra den dje e yabinan di e santu saserdosio ta ordená, pa nos por risibí honor i gloria(D&C 124:34), kua gloria lo ta un plenitut i kontinuashon pa tin desendensia pa semper. (D&C 132:19).

Pero amor romántiko ta inkompleto; e ta un preludio. Amor ta wòrdu alimentá dor di binimentu di yunan, ku ta sali for di e fuente di bida konfiá na parehanan den matrimonio. Konsepshon ta tuma lugá den un abraso íntimo entre esposo i esposa. Un kurpa chikitu ta kuminsá forma despues di un patronchi di kompleksidat magnífiko. Un yu ta bini for di e milager di nasementu, kreá den e imágen di su tata i mama mortal. Den su kurpa mortal tin un spiritu kapas pa sinti i persibí kosnan spiritual. Den e kurpa mortal ei di e mucha aki tin e poder inaktivo pa haña yu den su propio imágen.

“E spiritu i e kurpa ta e alma di hende” (D&C 88:15), i tin leinan spiritual i físiko pa obedesé si nos ke ta felis. Tin leinan eterno, inkluso leinan relatá na e poder aki pa duna bida, “irevokablemente dekretá den shelu promé ku e fundashon di e mundu aki, riba kua tur bendishon ta basá” (D&C 130:20). Esakinan ta leinan spiritual ku ta definí e norma moral pa humanidat(wak Joseph Smith Translation, Romans 7:14–15 [in the Bible appendix]; 2 Nefi 2:5; D&C 29:34; 134:6). Tin kombenionan ku ta mara, seya, i salbaguardiá i duna promesa i bendishonnan eterno.

Alma a amonestá su yu Shiblon pa e perkurá dominá tur su pashonnan, pa e por ta yená ku amor (Alma 38:12). Un rienda ta wòrdu uza pa guia, dirigí, i pa dominá. Nos pashon ta pa wòrdu kontrolá. Uza legítimamente, e poder di prokreashon lo bendishoná i santifiká(wak Teachings of Presidents of the Church: Joseph F. Smith [1998], 158).

Tentashonnan ta semper presente. Pasobra e atversario no por haña bida, e ta yalurs riba tur ku tin e poder selestial aki. E i esnan ku a siguié a wòrdu saká i a pèrdè e derechi di un kurpa mortal. “E ta purba pa tur hende por ta miserabel meskos kuné.” (2 Nefi 2:27). E lo purba, si e por, pa degradá, korumpí, i si ta posibel, destruí e don aki pa kua nos por, si nos ta digno, tin posteridat eterno (wakD&C 132:28–31).

Si nos profaná nos fuente di bida òf hiba otronan pa transgredí, lo bai tin kastigunan mas intenso i mas difísil pa soportá (D&C 19:15) ku tur e plaser físiko no tabata bale la pena.

Alma a bisa su yu Coriantón, “Bo no sa, mi yu, ku e kosnan aki ta un abominashon den e bista di Señor; si, mas abominabel ku tur piká eksepto dramamentu di sanger inosente òf ninga e Spiritu Santu?” ( Alma 39:5). Nos no por skapa e konsekuensianan ora nos transgredí.

E úniko ekspreshon legítimo i outorisá di e podernan di prokreashon ta entre esposo i esposa, un hòmber i un muhé, ku a wòrdu kasa legalmente. Kualke otro kos ku esaki ta violashon di e mandamentunan di Dios. No someté na e tentashonnan teribel di e atversario, pasó tur debe di transgreshon mester wòrdu pagá “te ora ku boso paga e delaster sèn chikí (Mateo 5:26).

Niun kaminda e generosidat i miserikòrdia di Dios ta manifestá mas tantu ku den arepentimentu.

Nos kurpa físiko, ora e ta heridá, ta kapas pa drecha su mes, tin biaha ku e yudansa di un dòkter. Sinembargo ora e daño ta grave, hopi biaha lo keda un marka komo rekuerdo di e herida.

Ku nos kurpanan spiritual ta un otro asuntu. Nos spiritu ta defekto ora nos hasi fayonan i kometé piká. Pero diferente for di e kaso di nos kurpa mortal, ora e proseso di arepentimentu ta kla, niun marka no ta keda pa motibu di e Ekspiashon di JesuCristu. E promesa ta: “E persona ku arepentí di su pikánan ta pordoná, i Señor no ta kòrda nan mas” (D&C 58:42).

Ora nos ta papia di matrimonio i bida familiar,inevitablemente ta bini na mente, “Kiko tokante di e eksepshonnan?” algun ta nase ku limitashonnan i no por haña yu. Algun su matrimonio ta frakasá pa motibu di infidelidat di nan kasá. Otronan no ta kasa i ta biba soltero ku dignidat.

Pa awor, mi ta ofresé e konsuelo aki: Dios ta nos Tata! Tur e amor i generosidat manifestá den e tata ideal na tera ta magnifiká den E ku ta nos Tata i nos Dios mas leu di e kapasidat di nos mente mortal pa komprondé. Su huisionan ta hustu; Su miserikòrdia sin límite; Su poder pa kompensá fuera di kualke komparashon.” Si nos konfiansa den Cristu ta konta solamente pa e bida akí, nos ta e hendenan di mas miserabel riba mundu” (1 1 Korintionan 15:19).

Awor ku reverensia mi ta usa e palabra tèmpel. Mi ta imaginá un sala di seyamentu i un altar ku un pareha hóben na rudia. E ordenansa sagrado di tèmpel aki ta muchu mas ku un kasamentu, pasó e matrimonio aki por wòrdu seyá pa e Spiritu Santu di Promesa, i e skrituranan ta deklará ku nos “lo heredá trononan, reinonan, prinsipadonan, i podernan, i dominionan, (D&C 132:19)Mi ta mira e goso ku ta warda esnan ku aseptá e regalo selestial aki i uz’é dignamente.

Hermana Donna Smith Packer i ami ta banda di otro den matrimonio pa kasi 70 aña. Ora ta trata di mi kasá, mi mama òf nos yunan, mi ta sin palabra. E sentimentu t’asina profundo i e gratitut asina poderoso ku mi ta keda kasi sin ekspreshon. E rekompensa di mas grandi ku nos por risibí den e bida aki, i den e bida benidero, ta nos yunan i nos nietunan. Na fin di nos bida mortal huntu, mi ta gradesido pa kada momento ku mi ta ku n’e na mi banda i pa e promesa ku Señor a duna ku lo no tin fin.

Mi ta testifiká ku Jesus ta e Cristu, i e Yu di e Dios bibu. E ta para na kabes di Iglesia. Pa medio di Su Ekspiashon i e poder di e saserdosio, famianan ku kuminsá den mortalidat por ta huntu den eternidat. E Ekspiashon, ku por reskatá kada un di nos, no ta laga sikatris. Esei ta nifiká ku no ta importá kiko nos a hasi, ni unda nos tabata ni kon el a pasa, si nos arepentí berdaderamente, El a primintí ku E lo ekspiá. I ora E hasié, e ta keda solushoná. Tin hopi di nos ku ta biba kastigando nos mes, pa bisa asina, ku sentimentunan di kulpa, sin sa eksaktamente kon pa skapa. Ta skapa ora aseptá e Ekspiashon di Cristu, i tur loke tabata pena por kambia den beyesa, amor i eternidat.

Mi ta asina gradesido pa e bendishonnan di Señor JesuCristu, pa e poder di prokreashon, pa e poder di redenshon, pa e Ekspiashon—e Ekspiashon ku por limpia tur mancha, sin importá kon difísil òf kuantu tempu òf kuantu biaha a wòrdu ripití. E Ekspiashon por libra boso atrobe pa sigui dilanti, limpi i digno, pa sigui e kaminda ku boso a skohe den bida.

Mi ta duna mi testimonio ku Dios ta biba, ku Jesus ta e Cristu, ku e Ekspiashon no ta algu general pa henter e Iglesia. E Ekspiashon ta personal i si boso tin algu ku ta prekupá boso—tin biaha asina tantu tempu ku apénas boso ta kòrd’é—hasi uso di e Ekspiashon. Esaki lo solushon’é,tantu boso, komo E, lo no rekòrdá boso pikánan mas. Den e nòmber di JesuCristu, amèn.