E Sabat Ta un Delisia

Pa Elder Russell M. Nelson

Di e Quorum di e diesdos Apòstelnan

Kon nos por sigurá ku nos komportashon riba Sabat lo hiba pa alegria i goso?

Rumannan stimá, e dos dianan aki di konferensha tabata glorioso. Nos a wòrdu edifiká pa músika inspiradó i orashonnan elokuente. Nos spiritu a wòrdu edifiká pa mensahenan di lus i bèrdat. Riba e djadumingu di Pasku di Resurekshon aki, atrobe den union nos ta gradisí Dios pa un profeta!

E pregunta pa kada un di nos ta: kon lo mi kambia, pa motibu di e kosnan ku mi a skucha i sinti durante dje konferensha aki? Kua ku boso kontesta por ta, pèrmití mi invitá boso pa eksaminá tambe boso sentimentunan tokante, i boso komportashon riba, e dia di Sabat.

Mi ta fasiná pa e palabranan di Isaias, ku a yama e Sabat “un delisia.” ¹ Pero mi ta puntra mi mes, e Sabat ta realmente un delisia pa boso i ami?

Promé mi a haña delisia den e Sabat hopi aña pasá ora, komo un siruhano okupá, mi tabata sa ku e Sabat a bira un dia pa sanashon personal. Na fin di kada siman, mi mannan tabata morde dor di frega nan ku habon, awa, i un skeiru duru. Tambe mi tabatin mester di un sosiegu for di e karga di un profeshon difísil.

Kiko e Salbador tabata ke men ora El a bisa ku “a traha sabat pa hende, i no hende pa sabat”? ² Mi ta kere ku E ke pa nos komprondé ku e Sabat tabata Su regalo pa nos, dunando sosiegu real for di privashon di bida diario i un oportunidat pa renobashon spiritual i físiko. Dios a duna nos e dia spesial aki, no pa dibershon òf labor diario pero pa sosegá for di debernan, ku alivio físiko i spiritual.

Den Hebreo, e palabra Sabat ta nifiká “sosegá.” E meta di e Sabat ta eksistí for di Kreashon di mundu, ora despues di seis dia di trabou, Señor a sosegá for di tur su trabou di kreashon. ³ Despues ora El a revelá e Dies Mandamentunan na Moises, Dios a manda ku nos tin ku kòrda e dia di sabat, pa tené santu.” ⁴ Despues, e Sabat a wòrdu opservá komo un rekordatorio di e libramentu di Israel for koutiverio na Egipto. ⁵ Kisas mas importante, e Sabat a wòrdu duná komo un kombenio eterno, un rekordatorio konstante ku Señor por santifiká Su pueblo. ⁶

Ademas, awor nos ta partisipá di e santa sena riba e dia Sabat komo rekordatorio di e Ekspiashon di JesuCristu. ⁷ Hasiendo esei, nos ta hasi kombenio ku nos ta dispuesto pa tuma riba nos Su nòmber santu. ⁸

E Salbador a identifiká Su mes komo e Señor di e Sabat. ⁹ Ta Su dia! Hopi biaha El a pidi nos pa warda e Sabat ¹⁰ òf pa santifiká e dia di Sabat. Nos tambe ta bou di kombenio pa hasi asina.¹¹

Kon nos ta santifiká e dia di Sabat? Den mi añanan mas yòn, mi a studia e obra di otronan ku a kompilá listanan di kos pa hasi i no hasi riba Sabat. Ta hopi despues mi a siña for di skrituranan ku mi komportashon i mi aktitut riba e Sabat tabata un señal entre ami i mi Tata Selestial.¹² Ku e komprondementu ei, no tabata nesesario pa tin un lista di si òf no. Ora mi tabatin ku tuma un desishon sea ku un aktividat tabata apropiá of no pa e Sabat, mi tabata puntra mi mes, “Kua señal mi ke duna Dios?” E pregunta aki a hasi mi skohensianan tokante e Sabat bon kla.

Ounke e doktrina pertenesiente na e dia di Sabat ta di orígen antiguo, el a wòrdu renobá den e delaster dianan komo parti di un kombenio nobo ku un promesa. Señor a duna un mandamentu ku

Pa nos por mantené nos kompletamente sin mancha for di e mundu, nos mester bai e kasdi orashon i ofresé nos sakramentunan riba su dia santu.

E dia di Sabat ta un dia apuntá pa sosegá for di nos labornan, i pa duna nos deboshon na esun di Mas Haltu. …

I riba e dia aki, nos mester prepará nos kuminda ku simplesa di kurason p’asina nos ayuno por ta perfekto i nos goso por ta kompletu. …

I na e midí ku nos hasi e kosnan aki ku gratitut, i ku alegria i bon humor, … e plenitut di e mundu di e mundu aki lo ta di boso. ¹³

Imaginá kon magnífiko e deklarashon aki ta! E plenitut di e mundu ta primintí na esnan ku warda e dia di Sabat sagrado. ¹⁴ No ta straño ku Isaias a yama e Sabat “un delisia.”

Kon boso por ta sigur ku boso komportashon riba Sabat lo hiba na goso i alegria? Huntu ku boso baimentu Iglesia, partisipá na santa sena, i ta diligente den boso yamamentu spesífiko pa sirbi, kua otro aktividat lo yuda hasi e Sabat un delisia pa boso? Kua señal boso lo duna Señor pa mustra boso amor p’e?

E Sabat ta duna un oportunidat maravioso pa fortalesé lasonan familiar. Despues di tur kos, Dios ke pa kada un di nos, komo Su yunan, pa regresá na Dje komo Santunan envestí, seyá den e tèmpel komo famia, na nos antepasadonan, i na nos posteridat.¹⁵

Nos ta hasi e Sabat un delisia ora nos ta siña e evangelio na nos yunan. Nos responsabilidat komo mayornan ta bon kla. Señor a bisa relashoná ku mayornan ku tin yu den Sion, ku e piká lo ta riba kabes di esnan ku no a siña nan yunan pa komprondé e doktrina di arepentimentu, fe den Cristu e Yu di e Dios bibu, boutismo, i e don di e Spiritu Santu dor di ponementu di mannan riba kabes pa e tempu ku nan tin ocho aña. ¹⁶

Añanan pasá e Promé Presidensia a enfatisá e importansia di e kualidat di tempu familiar. Nan a skibi:

“Nos ta pidi mayornan pa dediká nan mihó esfuersonan na e enseñansa i kriansa di nan yunan den e prinsipionan di evangelio ku lo tene nan den Iglesia. E hogar ta e fundeshi di un bida rekto, i nada otro no por okupá su lugá òf kumpli ku su funshon esensial den kumplimentu di e responsabilidat aki duná di Dios.

“Nos ta konsehá mayornan i yunan pa duna prioridat di mas haltu na orashon familiar, nochi de hogar, estudio di evangelio i instrukshonnan, i aktividatnan familiar saludabel. Sin importá kon apropiá otro eksigensianan òf aktividatnan por ta, nan no tin ku pèrmití pa desplasá e debernan divinamente asigná ku solamente mayornan i famianan por realisá adekuadamente. ¹⁷

Ora mi ta pensa riba e konseho aki, kasi mi ta deseá pa mi ta un tata yòn atrobe. Awor aki mayornan tin tantu rekurso disponibel pa yuda nan hasi tempu ku famia mas signifikante, riba Sabat i otro dianan tambe. Nan tin LDS.org, Mormon.org, Bible videos, Mormon Channel, Media Library, Friend, ,New Era, ,Ensign, E Liahona, i mas—muchu mas. E rekursonan aki ta yuda mayornan hopi den kumpli ku nan deber sagrado pa siña nan yunan. Niun otro trabou no ta surpasá esun di edukashon rekto i deliberá di mayornan!

Ora boso ta siña e evangelio, boso lo siña mas. Esaki ta Señor su manera pa yuda boso pa komprondé Su evangelio. El a duna nos un mandamentu ku:

Nos mester siña e doktrina di e reino un na otro.

El a bisa tambe ku nos mester siña diligentemente … , p’asina nos por wòrdu instruí mas perfektamente den doktrina, den e lei di e evangelio, i den tur kosnan ku ta pertenesé na e reino di Dios. ¹⁸

Tal estudio di e evangelio ta hasi e Sabat un delisia. E promesa aki ta pertenesé sin importá sais di e famia, ken ta den, of na unda.

Banda di tempu ku famia, boso por eksperensiá delisia berdadero riba Sabat for di obra genealógiko. Buska i haña miembronan di famia ku a biba promé ku boso na mundu---esnan ku a haña un oportunidat pa aseptá e evangelio miéntras nan tabata aki---por trese goso inmenso.

Mi mes a presensiá esaki. Algun aña pasá, mi dushi kasá, Wendy, determiná pa siña kon pa hasi investigashon di historia familiar. Su progreso tabata slo, pero tiki tiki, el a siña kon fásil ta pa hasi e obra sagrado aki. I nunka mi no a mir’é mas felis. Boso tampoko no tin ku biaha pa otro paisnan òf hasta na un sentro di historia familiar. Na kas, ku ayudo di un kòmpiuter òf aparato mobil, boso por identifiká almanan ku ta anhelá pa nan ordenansanan. Hasi e Sabat un delisia dor di buska boso antepasadonan i libra nan for di prison spiritual! ¹⁹

Hasi e Sabat un delisia dor di duna servisio na otronan, espesialmente esnan ku no ta sinti bon òf esnan ku ta solitario òf den nesesidat. ²⁰ Elevá nan spiritu lo elevá di boso tambe.

Ora Isaias a deskribí e Sabat komo “un delisia” el a siña nos tambe kon pa hasié delisioso. El a bisa:

“Si boso kita bai … for di hasi boso boluntat riba mi dia santu; yama e sabat un delisia, … i lo bo ta e honor[ Señor], no kana den boso mes su kaminda, ni buska boso mes su plaser, ni papia boso mes su palabranan:

“ Despues boso lo deleitá den Señor. “.” ²¹

No buska “nos mes plaser” riba e Sabat ta eksigí outodisiplina. Boso por tin ku ninga boso mes algu ku boso por ta gusta. Si boso skohe pa deleitá boso mes den Señor, boso lo no pèrmití boso mes pa trat’é komo kualke otro dia. Rutina i aktividatnan rekreativo por wòrdu hasí otro biaha.

Pensa di esaki: Den pagamentu di diesmo, nos ta duna un désimo parti di nos entrada na Señor. Den wardamentu di e Sabat sagrado, nos ta reservá un dia den shete komo di Dje. Pues ta nos privilegio pa konsagrá tantu sèn komo tempu na Dje ku ta duna nos bida kada dia. ²²

Fe den Dios ta engendrá un amor pa e Sabat; fe den e Sabat ta engendrá amor pa Dios. Un Sabat sagrado ta di bèrdat un delisia.

Awor, ku e konferensha aki ta yegando na un fin, nos sa ku unda ku nos ta biba nos ta ehèmpelnan di e kreyentenan entre nos famianan, bisiñanan, i amigunan. ²³ Kreyentenan berdadero ta warda e dia di Sabat sagrado.

Mi ta konkluí ku un supliká di despedida di Moroni, ora el a finalisá e Buki di Mormon. El a skibi, “Bini na Cristu, i wòrdu perfekshoná den dje, i ninga boso mes tur inikidat; i si boso ninga boso mes tur inikidat i stima Dios ku henter boso alma, mente i forsa, e ora ei…boso ta santifiká den Cristu.”²⁴

Ku amor den mi kurason, mi ta laga esaki ku boso komo mi orashon, testimonio, i bendishon den e nòmber sagrado di JesuCristu, amèn.