P’esei Nan a Kalma Nan Temornan

Pa Elder David  A. Bednar

Di e Quorum di e Diesdos Apòstelnan

Diferente na temor pa mundu ku ta krea alarma i ansiedat, temor pa Dios ta un fuente di pas, siguransa i konfiansa.

Mi ta kòrda klaramente un eksperensha ku mi tabatin tempu mi tabata mucha. Un dia miéntras mi tabata hunga ku mi amigunan, aksidentalmente mi a kibra un bentana di un tienda banda di nos kas. Ora e glas a baster i e alarma di seguridat a zona masha duru mes, un miedu ku ta paralisá a yena mi kurason i mi mente. Mi a realisá inmediatamente ku lo mi tabata kondená pa pasa e restu di mi bida den prison. Mi mayornan a bin logra pa saka mi for di un skondite bou di mi kama i a yuda mi pa drecha kos ku e doño di e tienda. Afortunadamente, mi sentensia pa bai prison a keda abolí.

E miedu ku mi a sinti e dia ei, tabata abrumador i real. Sin duda boso a yega di eksperenshá sintimentunan muchu mas grandi di temor despues di un desafio personal di salú, [òf] ora deskubriendo ku un miembro di famia ta den difikultat òf den peliger, òf ora tuma nota di akontesimentunan mundial ku ta perturbá. Den momentonan asina, e emoshon di miedu ku ta trese angustia ta lanta dor di peliger inminente, inseguridat, òf doló i dor di eksperenshanan ku ta inesperá, tin biaha direpente, i probablemente pa produsí un resultado negativo.

Den nos bida diario, un sinfin di informashon di violensha kriminal, hamber, gueranan, korupshon, terorismo, balornan ku ta disminuí, i forsanan destruktivo di naturalesa por generá temor i angustia. Sin duda ku nos ta biba den temporada anunsiá pa Señor: “I den e dia ei.... hinter e mundu lo ta den konmoshon, i e kurasonnan di hòmbernan lo faya nan” (D&C 45:26().

Mi propósito ta pa deskribí kon miedu por wòrdu alehá dor di un konosementu korekto di i fe den Señor JesuCristu. Mi ta roga sinseramente ku e Spiritu Santu lo bendishoná kada unu di nos ora miéntras ku huntu nos ta konsiderá e tópiko importante aki.

Temor Mortal

Ora nan a skucha e bos di Dios despues di partisipá di e fruta prohibí, Adam i Eva a skonde nan mes den e Hardin di Eden. Dios a yama Adam i a puntra, “Unda bo ta? I [Adam a kontestá], Mi a tende bo stèm… , i mi tabata tin temor.” (Genesis 3:9–10). Notablemente un di e promé efektonan di e Kaida tabata pa Adam i Eva sinti temor. E emoshon potente aki ta un elemento importante di nos eksistensha mortal.

Un ehèmpel for di e Buki di Mormon ta destaká e poder di e konosementu di Señor (wak 2 Peter 1:2–8; Alma 23:5–6) pa alehá temor i pa proveé pas, asta ora nos ta enfrentá gran atversidat.

Den e tera di Helam, e pueblo di Alma tabatin temor di e ehérsito Lamanita ku tabata avansando.

“Pero Alma a bai dilanti i a para huntu ku nan, i atvertí nan ku nan no mester tin temor, pero ... [ku nan] mester kòrda e Señor nan Dios, i nan lo wòrdu liberá.

“P’esei nan a kalma nan temornan” (Mosia 23:27–28).

Nota ku Alma no a kalma e hendenan su temor. Na lugá di esaki el a konsehá e kreyentenan pa kòrda riba Señor i e libertat ku E so por duna (wak 2 Nefi 2:8). I konosementu di e Salbador Su kuido protektor ta permití e hendenan pa kalma nan propio temor.

Konosementu korekto di i fe den Señor ta empoderá nos pa kalma nos temornan pasó JesuCristu ta e úniko fuente di pas duradero. El a deklará, “siña di Mi, i skucha Mi palabranan; kana den e humildat di Mi Spiritu, i boso lo tin pas den Mi(D&C 19:23).

E Maestro tambe a splika, “Esun ku hasi e obra di hustisia lo risibí su rekompensa, asta pas den e mundu aki, i bida eterno den e mundu benidero” (D&C 59:23.

Konfiansa i fe den Cristu i un dependensha den Su méritonan, piedat, i direkshon yen grasia pa speransa, dor di Su Ekspiashon den e Resurekshon i bida eterno (wak Moroni 7:41). Fe i speransa asina ta invitá e pas di konsenshi dushi den nos bida, loke nos tur ta anhelá. E poder di e Ekspiashon ta hasi arepentimentu posibel i ta reprimí e desesperashon kousá pa piká; tambe e ta fortalesé nos pa wak, hasi, i bira bon den un manera ku nos nunka por rekonosé òf logra ku nos kapasidat mortal limitá. Di bèrdat un di e bendishonnan grandi di e disipulado dediká ta ”e pas di Dios, ku ta bai mas leu ku nos entendimentu”” (Filipensenan 4:7).

E pas [ku] Cristu ta duna ta permití nos pa visualisá mortalidat dor di perspektiva presioso di eternidat i ta suministrá un fundamentu spiritual (wak Kolosensenan 1:23) ku ta yuda nos pa mantené un enfoke konstante riba nos destinashon selestial. Asina ta, ku nos ta bendishoná pa kalma nos temornan pasó Su doktrina ta proveé propósito i direkshon den tur aspekto di nos bida. Su ordenansanan i kombenionan ta fortalesé i konsolá den tantu bon tempu komo den mal tempu. I Su outoridat di saserdosio ta duna seguransa di ku e kosnan ku ta importá mas por permanesé tantu den tempu komo den eternidat.

Pero nos por kalma e temornan ku asina fásil i frekuente ta apoderá di nos den e mundu kontemporáneo? E kontesta riba e pregunta aki ta un rotundo si. Tres prinsipio básiko ta sentral pa risibí e bendishon aki den nos bida: (1)  Wak na Cristu, (2)  konstruí riba e fundamentu di Cristu, i (3)  pusha [bai] dilanti ku fe den Cristu.

Wak na Cristu

E konseho ku Alma a duna su yu Helaman ta apliká presisamente na kada unu di nos awe: “Si, sigurá bo di akudí na Dios i biba” ” ((Alma 37:47). Nos mester akudí na i tin nos enfoke firmemente fihá riba e Salbador na tur momento i den tur lugá.

Kòrda kon e apòstelnan di Señor tabata den un barku, tirá meimei di laman. Jesus a bai serka nan, kanando riba awa; pero [dor] ku nan no a rekonos’É, nan a grita di temor.

“Jesus a papia ku nan, bisando, Sea di bon animo, Ta Ami; No teme.

“I Pedro a kontest’É bisando, Señor, si ta abo, pèrmití mi bin serka bo den e awa.

“ I el a bis’é, Bin” (Mateo 14:27–29).

Pedro e ora ei a kana riba awa pa bai serka Jesus.

“Pero ora el a mira e bientu fuerte, e tabata tin temor, el a kuminsá ta senk, i a grita: “Señor, salba mi.

“I inmediatamente Jesus a ekstendé su man, i a gar’é, i a bis’é, O abo di poko fe, dikon bo a duda?”(Mateo 14:30–31).

Mi por imaginá mi Pedro kontestando fervientemente i inmediatamente e invitashon di e Salbador. Ku su wowonan fihá riba Jesus, el a sali for di e boto i milagrosamente a kana riba awa. Ta ora su mirada a wòrdu desviá dor di e bientu i e olanan el a haña temor i a kuminsá senk.

Nos por wòrdu bendishoná pa konkistá nos temornan i fortalesé nos fe si nos sigui e instrukshon di Señor:”Elevá na Ami tur pensamentu; no duda; no teme” (D&C 6:36).

Konstruí riba e fundamentu di Cristu

Helaman a amonestá su yunan Nefi i Lehi: “Kòrda, kòrda ku ta riba e baranka di nos Redentor, ku ta Cristu e Yu di Dios riba unda bo mester konstruí boso fundamentu; pa ora e diabel manda su bientunan poderoso, si su flechanan den warwarú, si ora tur su hagel i su tormenta furioso ta suta boso, esaki lo no tin poder riba boso pa lastra boso pa e abismo di miseria i angustia sin fin, debí na e baranka riba kual boso ta edifiká, ku ta un fundamentu sigur, un fundamentu riba kual, si e hòmbernan edifiká, nan lo no kai”(Helaman 5:12).

Ordenansanan i kombenionan ta e blòkinan di konstrukshon ku nos ta usa pa konstruí nos bidanan riba e fundamentu di Cristu i Su Ekspiashon. Nos ta konektá firmemente na i ku e Salbador ora nos dignamente risibí e ordenansanan o drenta den e kombenionan, fielmente kòrdando i honrando e kompromisonan sagrado ei, i hasi nos esfuerso di akuerdo ku e obligashonnan ku nos a aseptá. I e vínkulo ei ta e fuente di fortalesa spiritual i stabilidat den tur e temporadanan di nos bida.

Nos por wòrdu bendishoná pa kalma nos temornan ora nos establesé firmemente nos deseonan i hechonan riba e fundamentu sigur di e Salbador pa medio di nos ordenansanan i kombenionan.

Pusha [Bai] Dilanti ku Fe den Cristu

Nefi a deklará: “ Asina ku, boso mester pusha dilanti ku un firmesa den Cristu, mustrando un puresa perfekto di speransa, i un amor pa Dios i pa tur hende. Di manera ku, si boso pusha dilanti, alimentando boso ku e palabra di Cristu, i perseverá te na fin, ata, asina e Tata ta bisa: boso lo tin bida eterno” (2 Nefi 31:20).

E perseveransha disipliná deskribí den e versíkulo aki, ta e resultado di komprendementu spiritual i vishon, persistensia, pasenshi, i grasia di Dios. Ehersiendo fe den i riba e nòmber sagrado di JesuCristu, someté humildemente na Su boluntat i tempu den nos bida, i rekonosé humildemente Su man den tur kos ta hiba na kosnan pasífiko di e reino di Dios ku ta trese goso i bida eterno (wak D&C 42:61). Asta ora nos haña difikultat i enfrentá e insertidumbre di e futuro, nos por perseverá alegremente i biba un “bida pasífiko den tur rektitut i honestidat” (1 Timoteo 2:2).

Nos por wòrdu bendishoná pa kalma nos temor ora nos risibí e fortalesa ku ta bin di siña i biba e prinsipionan di evangelio i bai dilanti ku siguransa riba e kaminda di kombenio.

E Temor pa Señor

Diferente di, pero relashoná ku e temornan ku hopi biaha nos ta eksperenshá ta loke e skrituranan ta deskribí komo “e temor pa Dios” (Hebreonan 12:28) òf e temor pa Señor” (Job 28:28; Proverbionan 16:6; Isaias 11:2–3) . Otro for di temor mundano ku ta krea alarma i ansiedat, temor pa dios ta un fuente di pas, siguridat i konfiansa.

Pero kon algu ku ta asosiá ku temor por ta edifikante òf spiritualmente útil?

E temor hustu ku mi ta trata di deskribí ta abarká un sentimentu profundo di reverensha, rèspèt, o asombro pa Señor JesuCristu (wak Salmonan 33:8)96:4), obedensia na Su mandamentunan (wak Deuteronomio 5:298:6; 10:12; 13:4; ;Salmonan 112:1), i antisipashon riba e Huisio Final i hustisia den Su man. P’esei, temor pa Dios ta surgi di un komprondementu korekto di e naturalesa divino i mishon di Señor JesuCristu, un deseo di someté nos boluntat na Su boluntat, i un konosementu ku kada hòmber i muhé lo bai ta responsabel pa nan propio pikánan riba e dia di Huisio. (wak D&C 101:78; Artíkulonan di Fe 1:2).

Manera skritura ta sertifiká, temor pa Dios “ta e kuminsamentu di konosementu” (Proverbionan 1:7),” e instrukshon di sabiduria” (Proverbionan 15:33), un “konfiansa fuerte(Proverbionan 14:26), i ”un fuente di bida” (Proverbionan 14:27).

Por fabor di tuma nota ku temor pa Dios ta ligá inseparablelmente na e komprendimentu di e Huisio final i nos responsabilidat individual pa nos deseonan, pensamentunan, palabranan i nos echonan (wak Mosia 4:30). E temor pa Dios no ta un temor pa drenta den Su presensha pa wòrdu huzgá. Mi no ta kere ku nos lo tin temor di Dje mes. Al kontrario, ta e perspektiva den Su presensha di enfrentá kosnan di nos manera nan ta en realidat i tin “un perfekto konosementu” (2 2 Nefi 9:14(2 ; wak tambe Alma 11:43) di tur nos rashonalisamentu, preteksto, i propio desepshonnan. Al final, nos lo keda sin èksküs.

Kada persona ku a biba òf ku lo bai biba riba e mundu “lo wòrdu hibá pa komparesé dilanti e Tribunal di Dios, pa wòrdu huzgá dor di Dje di akuerdo ku [su] obranan sea nan ta bon òf sea nan ta malu” (Mosia 16:10). Si nos deseonan tabata pa hustisia i nos obranan bon, e ora ei e Tribunal di hustisia lo ta plasentero Jakob 6:13; Enos 1:27; Moroni 10:34). I den e delaster dia nos lo wòrdu rekompensá den hustisia (Alma 41:6).

Kontrali, si nos deseonan tabata pa maldat i nos obranan inikuo, e ora ei e tribunal di hustisia lo ta kousa di temor. “Nos lo no tribi di wak Dios den su kara i lo nos ta hopi kontentu si nos por manda e barankanan i e serunan pa kai riba nos pa skonde nos di Su presensia” (Alma 12:14). I den e delaster dia nos lo “tin nos rekompensa di maldat” (Alma 41:5).

Manera ta resumí den Predikador:

“Teme Dios, i warda Su mandamentunan: pasó esaki ta tur e deber di e hòmber.

“Pasó Dios lo trese tur obra den huisio, ku kada kos sekreto, sea e ta bon, òf sea e ta malu” ( Predikador 12:13–14).

MI rumannan stimá, temor pa Dios ta kita temor mortal. E ta asta someté e preokupashon ku ta persiguí ku nos no por ta sufisientemente bon i ku nunka nos lo alkansá na e rekisitonan i espektativa di Señor. En bèrdat, nos no por ta bon sufisiente pa alkansá esaki dependiendo solamente di nos kapasidat i rekisitonan. Nos obranan i deseonan so no ta i no por salba nos. “Despues di tur kos ku nos por hasi (2Nefi 25:23), nos ta wòrdu hasí kompletu solamente pa medio di e mizèrikòrdia i grasia disponibel dor di e Salbador Su sakrifisio ekspiatorio infinito i eterno (wak Alma 34:10, 14). Sin duda, “ nos ta kere ku pa medio di e Ekspiashon di JesuCristu, e humanidat por wòrdu salbá dor di obedensia na e leinan i ordenansanan di e evangelio” (Artíkulonan di Fe 1:3).

Temor pa Dios ta amoroso i konfiando den Dje. Segun nos ta teme Dios mas kompletu, nos ta stim’É mas perfekto. I “amor perfekto ta kore ku tur temor” (Moroni 8:16). Mi ta primintí e lus briante di temor pa Dios lo kore ku e sombranan skur di temor mortal (wak D&C 50:25) ora nos mira na e Salbador, konstruí riba Dje komo nos fundamentu, i pusha dilanti den Su kaminda di kombenio ku su kompromiso konsagrá.

Testimonio i Promesa

Mi stima i honrá Señor. Su poder i pas ta real. E ta nos Redentor, i mi ta testifiká ku E ta biba. I dor di Dje, nos kurasonnan no mester ta preokupá òf ku miedu(wak Juan 14:27), i nos lo wòrdu bendishoná pa kalma nos temornan. Di esaki mi ta testifiká den e sagrado i santu nòmber di e Señor JesuCristu, amèn