ពួកព្យាការីថ្លែងដោយព្រះចេស្ដានៃព្រះវិញ្ញាណបរិសុទ្ធ
ការមានពួកព្យាការីគឺជាសញ្ញាមួយនៃសេចក្ដីស្រឡាញ់របស់ព្រះចំពោះកូនចៅរបស់ទ្រង់ ។ ពួកលោកប្រាប់ឲ្យដឹងអំពីការសន្យា ព្រមទាំងនិស្ស័យពិតនៃព្រះ និងព្រះយេស៊ូវគ្រីស្ទ ។
បងប្អូនប្រុសស្រីជាទីស្រឡាញ់ មិនថាបងប្អូននៅទីណាទេ ខ្ញុំចង់សម្ដែងការអរគុណដ៏ស្មោះសយ៉ាងជ្រាលជ្រៅរបស់ខ្ញុំចំពោះការគាំទ្ររបស់បងប្អូនកាលពីម្សិលមិញ ។ ទោះជាយ៉ាងណា ខ្ញុំមានអារម្មណ៍ថានិយាយស្ទើរតែមិនចេញដូចជាម៉ូសេ ខ្ញុំលួងលោមខ្លួនឯងដោយព្រះបន្ទូលរបស់ព្រះអម្ចាស់ទៅលោកម៉ូសេ ៖
« តើអ្នកណាបានបង្កើតមាត់មនុស្ស តើអ្នកណាដែលធ្វើឲ្យគ ឬ ឲ្យថ្លង់ ឲ្យភ្លឺ ឬ ឲ្យខ្វាក់ នោះបើមិនមែនអញជាព្រះយេហូវ៉ាប៉ុណ្ណោះទេ ?
« ដូច្នេះចូរឯងទៅឥឡូវចុះ យើងនឹងនៅជាមួយនឹងមាត់ឯង ព្រមទាំងបង្រៀនសេចក្តីដែលឯងត្រូវនិយាយផង » ( និក្ខមនំ ៤:១១–១២, សូមមើលផងដែរ ខទី ១០ ) ។
ខ្ញុំក៏បានទទួលការលួងលោមចិត្តដោយសារសេចក្ដីស្រឡាញ់ និងការគាំទ្រពីភរិយាជាទីស្រឡាញ់របស់ខ្ញុំដែរ ។ គាត់គឺជាគំរូមួយនៃសេចក្ដីល្អ សេចក្ដីស្រឡាញ់ និងមានការលះបង់ខ្ពស់ចំពោះព្រះអម្ចាស់សម្រាប់ខ្ញុំ និងគ្រួសារខ្ញុំ ។ ខ្ញុំស្រឡាញ់គាត់អស់ពីដួងចិត្តរបស់ខ្ញុំ ហើយខ្ញុំមានអំណរគុណចំពោះឥទ្ធិពលវិជ្ជមានដែលគាត់បានផ្ដល់ឲ្យយើង ។
បងប្អូនប្រុសស្រី ខ្ញុំសូមថ្លែងទីបន្ទាល់ទៅកាន់បងប្អូនថា ប្រធាន រ័សុល អិម ណិលសុន គឺជាព្យាការីរបស់ព្រះនៅលើផែនដី ។ ខ្ញុំពុំធ្លាប់មនុស្សដែលមានសន្ដានចិត្តល្អ ហើយមានសេចក្ដីស្រឡាញ់ច្រើនជាងលោកឡើយ ។ ទោះជាខ្ញុំមានអារម្មណ៍ថា ខ្វះសមត្ថភាពចំពោះការហៅដ៏ពិសិដ្ឋនេះក្ដី ក៏ប្រសាសន៍ និងទឹកមុខដ៏ទន់ភ្លន់របស់លោក នៅពេលលោកផ្ដល់ការទទួលខុសត្រូវនេះបានធ្វើឲ្យខ្ញុំទទួលអារម្មណ៍នូវសេចក្ដីស្រឡាញ់របស់ព្រះអង្គសង្គ្រោះដែរ ។ សូមអរគុណប្រធានណិលសុន ។ ខ្ញុំគាំទ្រលោក ហើយខ្ញុំស្រឡាញ់លោក ។
តើវាពុំមែនជាពរជ័យមួយទេឬអី ដែលយើងមានពួកព្យាការី អ្នកមើលឆុត និង អ្នកទទួលវិវរណៈនៅលើផែនដីក្នុងជំនាន់ដែលយើងរស់នៅ ជាអ្នកដែលខិតខំចង់ស្គាល់ព្រះទ័យរបស់ព្រះអម្ចាស់ ហើយធ្វើតាមនោះ ? វាគឺជាការលួងលោមចិត្តមួយដើម្បីដឹងថា យើងមិនឯកោនៅក្នុងពិភពលកនេះឡើយ ទោះជាជួបឧបសគ្គជីវិតបែបណាក្ដី ។ ការមានពួកព្យាការីគឺជាសញ្ញាមួយនៃសេចក្ដីស្រឡាញ់របស់ព្រះចំពោះកូនចៅរបស់ទ្រង់ ។ ពួកលោកប្រាប់ឲ្យដឹងអំពីការសន្យា ព្រមទាំងនិស្ស័យពិតនៃព្រះ និងព្រះយេស៊ូវគ្រីស្ទដល់រាស្ត្រទ្រង់ ។ ខ្ញុំបានដឹងកិច្ចការនោះតាមរយៈបទពិសោធន៍របស់ខ្ញុំផ្ទាល់ ។
ដប់ប្រាំបីឆ្នាំមុន ភរិយាខ្ញុំ និងខ្ញុំបានទទួលទូរសព្ទមួយមកពីប្រធាន ជែមស៍ អ៊ី ហ្វោស្ត ពេលនោះលោកគឺជាទីប្រឹក្សាទីពីរនៅក្នុងគណៈប្រធានទីមួយ ។ លោកបានហៅឲ្យយើងបម្រើជាប្រធានបេសកកម្ម និងដៃគូនៅប្រទេសព័រទុយហ្គាល់ ។ លោកបានប្រាប់យើងថា យើងមានពេលតែប្រាំមួយសប្ដាហ៍ប៉ុណ្ណោះ ពីមុនយើងចាប់ផ្ដើមបេសកកម្មនោះ ។ ទោះជាយើងមានអារម្មណ៍មិនបានត្រៀមខ្លួន ហើយខ្វះសមត្ថភាពក្ដី ក៏យើងបានទទួលយកការហៅនោះដែរ ។ កង្វល់ដ៏សំខាន់បំផុតរបស់យើងនៅពេលនោះ គឺការទទួលបានទិដ្ឋាការដើម្បីបម្រើនៅក្នុងប្រទេសនោះ ដោយសារយើងដឹងថា វាត្រូវចំណាយពេលពីប្រាំមួយទៅប្រាំបីខែ ស្របតាមបទពិសោធន៍កាលពីមុន ។
បន្ទាប់មក ប្រធានហ្វោស្ត បានសួរថា តើយើងមានសេចក្ដីជំនឿថា ព្រះអម្ចាស់នឹងធ្វើអព្ភូតហេតុមួយ ហើយថា យើងនឹងអាចដោះស្រាយបញ្ហាទិដ្ឋាការនោះបានយ៉ាងលឿនដែរឬទេ ។ ចម្លើយរបស់យើងគឺថា « យើងជឿ » ហើយបានចាប់ផ្ដើមរៀបចំភ្លាមៗ ។ យើងបានរៀបចំឯកសារដែលតម្រូវសម្រាប់ធ្វើទិដ្ឋាការ យកគ្រួសារថ្មីថ្មោងរបស់យើងទៅស្ថានកុងស៊ុលឲ្យបានលឿនបំផុត ។ មានសុភាពស្ត្រីម្នាក់បានជួបយើងនៅទីនោះ ។ ដោយពិនិត្យមើលឯកសាររបស់យើង ហើយដឹងថា យើងនឹងទៅធ្វើអ្វីនៅប្រទេសព័រទុយហ្គាល់នោះ នាងបានសួរយើងថា « តើអ្នកទាំងពីរពិតជាទៅជួយប្រជាជននៅប្រទេសខ្ញុំមែនឬ ? » យើងបានឆ្លើយយ៉ាងម៉ឺងម៉ាត់ថា « មែនហើយ » ហើយបានពន្យល់ថា យើងនឹងជាតំណាងឲ្យព្រះយេស៊ូវគ្រីស្ទ ហើយថ្លែងទីបន្ទាល់អំពីទ្រង់ និងបេសកកម្មដ៏ទេវភាពរបស់ទ្រង់នៅក្នុងពិភពលោកនេះ ។ យើងបានត្រឡប់ទៅទីនោះវិញនៅបួនសប្ដាហ៍ក្រោយ ដើម្បីទទួលទិដ្ឋាការ ហើយបានទៅតំបន់បេសកកម្មក្នុងរយៈពេលតែប្រាំមួយសប្ដាហ៍ ដូចដែលព្យាការីមួយរូបរបស់ព្រះបានសុំឲ្យយើងធ្វើ ។
បងប្អូនប្រុសស្រី ខ្ញុំសូមថ្លែងទីបន្ទាល់របស់ខ្ញុំដោយអស់ពីដួងចិត្តថា ពួកព្យាការីថ្លែងដោយព្រះចេស្ដានៃព្រះវិញ្ញាណបរិសុទ្ធ ។ ពួកលោកថ្លែងទីបន្ទាល់អំពីព្រះគ្រីស្ទ និងបេសកកម្មដ៏ទេវភាពរបស់ទ្រង់នៅលើផែនដី ។ ពួកលោកតំណាងឲ្យព្រះតម្រិះ និងព្រះទ័យនៃព្រះអម្ចាស់ ហើយត្រូវបានហៅជាតំណាងរបស់ទ្រង់ ហើយបង្រៀនយើងនូវអ្វីដែលយើងត្រូវធ្វើដើម្បីត្រឡប់ទៅរស់នៅក្នុងវត្តមានរបស់ព្រះ និងព្រះរាជបុត្រារបស់ទ្រង់ព្រះយេស៊ូវគ្រីស្ទ ។ យើងមានពរ នៅពេលយើងអនុវត្តសេចក្ដីជំនឿរបស់យើង ហើយធ្វើតាមការបង្រៀនរបស់ពួកលោក ។ ដោយការធ្វើតាមពួកលោក ជីវិតរបស់យើងមានភាពរីករាយ ហើយមិនសូវស្មុគស្មាញ ការលំបាក និងបញ្ហារបស់យើងងាយនឹងទ្រាំទ្រ ហើយយើងបង្កើតគ្រឿងសឹកខាងវិញ្ញាណមួយជុំវិញយើង ដែលវានឹងការពារយើងពីការវាយប្រហាររបស់មារសត្រូវនៅក្នុងជំនាន់របស់យើង ។
នៅថ្ងៃបុណ្យអ៊ីស្ទើរនេះ ខ្ញុំសូមថ្លែងទីបន្ទាល់យ៉ាងមុតមាំថា ព្រះយេស៊ូវគ្រីស្ទបានមានព្រះជន្មរស់ឡើងវិញ ទ្រង់មានព្រះជន្មរស់ ហើយថា ទ្រង់ដឹកនាំសាសនាចក្ររបស់ទ្រង់នៅលើផែនដីតាមរយៈ ពួកព្យាការី ពួកព្យាការី អ្នកមើលឆុត និង អ្នកទទួលវិវរណៈរបស់ទ្រង់ ។ ខ្ញុំសូមថ្លែងទីបន្ទាល់ថា ទ្រង់គឺជាព្រះអង្គសង្គ្រោះ និងព្រះប្រោសលោះនៃពិភពលោក ហើយថា តាមរយៈទ្រង់ យើងអាចត្រូវបានសង្គ្រោះ ហើយតម្កើងឡើងនៅក្នុងវត្តមានរបស់ព្រះជាទីស្រឡាញ់របស់យើង ។ ខ្ញុំស្រឡាញ់ទ្រង់ ខ្ញុំស្ងើចសរសើរដល់ទ្រង់ ។ ខ្ញុំចង់ធ្វើតាមទ្រង់ ហើយធ្វើតាមព្រះទ័យរបស់ទ្រង់ ហើយក្លាយកាន់តែដូចជាទ្រង់ ។ ខ្ញុំសូមពោលពាក្យទាំងនេះដោយរាបសា នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន។