Ta Fiel, No Infiel
Nos mester intenshonnalmente tuma tempu tur dia pa deskonektá for di mundu i konektá ku shelu.
No hopi tempu pasá mi a lanta prepará pa bai kuminsa studia mi skrituranan. Mi a kue mi telefòn i a sinta den e stul banda di mi kama, ku e intenshon pa habri e app di e Gospel Library. Mi a sende mi telefòn i tabata kasi bai kuminsá mi estudio, ora ku mi a mira algun notifikashon i mensahenan i emailnan ku a drenta den mardugá. Mi a pensa, “Na mi chèk e mensahenan aki lihé lihé, anto mi ta sigi djís ku mi skrituranan.” Awèl, dos ora despues, ainda mi tabata lesando mensahenan, emailnan, notisianan i notanan riba social media. Ora ku mi a realisá mi mes kwantor tabatin, mi mester a drecha lihé lihé pa por a kuminsa mi dia. E mainta ei mi a falta e studio di mi skrituranan, i pa e motibo ei mi no a haña e nutrishon spiritual ku mi tabata spera.
Nutrishon spiritual
Mi tin sigur ku boso tambe konosé situashonnan asina aki. Teknologia modèrno ta bendishoná nos na hopi manera. Nan ta konektá nos ku amigu i famia. E ta konektá nos ku informashon i notisia tokante evéntonan aktual rònt di mundu. No opstante, e por distraí nos for di loke ta nos konekshon di mas importante: nos konekshon ku shelu.
Mi ta ripití loke nos profeta Presidente Russell M. Nelson, a bisa, “Nos ta biba den un mundu ku ta kompleho i kada besmas kompleho. E disposishon konstante di social media i siklo di notisia ku ta sigui 24 ora pa dia ta bòmbardiá nos ku mensahenan sin fin. Si nos ke tin speransa pa distinguí entre tur e opiniónan i filosofianan di hende ku ta ataká bèrdat, nos mester siña pa risibi revelashon.”
Presidente Russell M. Nelson a siña, “den e dianan benidero, lo no ta posibel pa sobrebibí espiritualmente sin e guia, direkshon, konsuelo, i influensia konstante di e Espiritu Santu.”1
Hopi aña pasá Presidente Boyd K. Packer a konta nos di e rebaño di biná ku dor di sneu pisá tabata atrapá pafó di nan habitat natural. Nan tabata enfrentá e posibilidat di muri di hamber. Algun hende, den un enfòke pa salba e binánan, a hiba un kantidat di yerba sekù den e area—no tabata algu ku biná nòrmalmente lo sa kome, pero nan a spera ku esaki lo yuda e binánan pasa invierno. Desafortunadamente, mas lat a bin haña kasi tur e binánan morto. Nan a kome e yerba seku, pero esaki no a alimentá nan, i nan a muri di hamber ku nan barika yen.2
Hopi di e mensahenan ku ta bombardiá nos den e époká di informashonan aki ta e ekivalente spiritual di duna biná yerba seku – nos por komé henter dia, pero e lo no alimentá nos.
Unda nos ta haña nutrishon spiritual bèrdadero? Hopi biaha, no ta algu popular riba social media. Nos ta haña esaki ora ku nos perseverá bai dilanti riba e kaminda di kombenio, “dor di tene duru na e bara di heru, i partisipá di e fruto di e palu di bida.3 Esaki ta nifiká ku nos mester tuma tempu tur dia pa deskonektá for di mundu i konektá ku shelu.
Den su soño, Lehi a mira hendenan ku a partisipá di e fruto pero despues a bandoné pa motibu di e influensha di e edifisio grandi i espasioso, e orguyo di mundu.4 Ta posibel pa hobennan wòrdu kriá den un hogar di Santunan di delaster dianan, partisipá den tur e reunionnan i klasnan di Iglesia adekuá, hasta partisipá den e ordenansanan di tèmpel, i tòg kai den kamindanan prohibí i [kai] pèrdí.”5 Dikon esaki ta pasa? Hopi biaha ta pasó, ounke nan tabata hasi kosnan ku ta parse spiritual, nan no tabata realmente kombertí. Nan tabata haña kumnida pero no risibí nutrishon.
Di otro banda, mi a topa ku hopi hobennan, Santunan di delaster dianan, ku ta inteligente, fuerte, i fiel. Boso sa ku boso ta yunan di Dios i ku E tin un obra pa boso hasi. Boso ta stima Dios ku henter boso “kurason, poder, mente i forsa.”6 Boso ta mantené boso kombenionan i ta sirbi otro, kuminsando na kas. Boso ta ehersitá fe, arepentí i mehorá kada dia i esaki ta trese goso duradero. Boso ta prepará pa e bendishonnan di tèmpel i otro oportunidatnan ku boso lo haña komo siguidónan berdadero di e Salbador. I boso ta yudando pa prepará mundu pa e Segundo Binida, invitando tur hende pa bini serka Cristu i risibá e bendishonnan di Su ekspiashon. Boso ta konektá ku shelu.
Ta bèrdat, bo ta enkontrá retonnan. Pero tur generashon ta eksperenshá esaki. Esaki ta nos tempu, i nos tin ku ta fiel, no infiel. Mi ta tèstifiká ku Señor sa di nos retonan i dor di e líderasgo di Presidente Nelson, E ta preparando nos pa enfrentá nan. Mi ta kere ku e profeta su instrukshon resiente pa tin un iglesia sentrá riba hogar, i asistí dor di loke nos ta hasi den nos edifisionan,7 ta diseñá pa yuda nos sobrebibí –hasta floresé—den e tempu di malnutrishon spiritual aki.
Sentrá den Hogar
Kiko ta nifíka pa ta un iglesia sentrá den hogar? Hogarnan por ta mustra diferente rònt di mundu. Bo por ta pertenesé na un famia ku ya pa hopi generashon ta den Iglesia. Bo por ta e ùniko miembro di Iglesia den bo famia. Bo por ta kasá òf singel, ku òf sin yu na kas.
No opstante bo sirkunstanshanan, bo por hasi bo hogar e sentro di siñansa i bibá di e evangelio. Simplemente ta nifíka tuma responsabilidat personal pa bo kombershon i kresementu spiritual. Ta nifíka sigui Presidente Nelson su konseho pa “remodelá bo hogar den un santuario di fe.”8
E adversario lo trata di kombensé bo ku nutrishon spiritual no ta nesesario òf mas kuminiente ainda, ku bo nutrishon spiritual por warda. E ta e maestro di distrakshon i e outor di prokrastinashon. E lo hiba bo antenshon riba otro kos ku ta parse urgente pero enrealidat, no ta asina importante. E lo laga bo bira asina “okupá ku hopi kos”, ku bo ta “neglishá esun kos [ku] ta nesesario.”9
Kon gradesido mi ta ku mi “bon mayornan,”10 ku a kria nan famia den un hogar ku nutrishon spiritual konstante, relashonnan amoroso i aktividatnan ku ta fortalesé. E siñansanan ku nan a proveé den mi hubentut tabata bon pa mi. Mayornan, mi ta supliká boso traha riba relashonnan fuerte ku boso yunan. Nan mester mas di boso tempu, no menos.
Asistí dor di Iglesia
Sigun boso ta hasi esaki, Iglesia teinan pa asisití boso. Nos eksperenshanan na iglesia por reforsá e nutrishon spiritual ku ta pasa na kas. Te ainda e aña aki, nos a mira e típo di asistensia di Iglesia den Skol Dominikal i Primaria. Nos lo bin mira mas di esaki tambe den Saserdosio Aaroniko i Mujeres Jovenes. Kuminsando e Yanüari ku ta bini aki, e kurikulo pa e reunionnan lo wòrdu kambiá djís un tiki. E lo enfoká ainda riba tópikonan di evangelio relevante pero e tópikonan aki lo konektá ku Bini, Sigi Mi– Pa individualnan i famianan. Esaki ta un kambio chikitu pero e por hasi un gran impakto riba e nutrishon spiritual di e hobennan.
Ki otro típo di asistensia Iglesia ta proveé? Na misa nos ta partisipá di e santa sena, loke ta yuda nos reestablesé nos kompromisio ku e Salbador kada siman. I na Iglesia nos ta reuní ku otro hende ku tambe ta kere i ku a hasi e mesun kompromisio aki. E relashonnan amoroso ku nos ta krea ku e disípelnan di JesuCristu portá un supòrt poderoso den nos mes disipulado ku ta sentrá den nos hogar.
Ora ku mi tabatin 14 aña, mi famia a muda bai un bario nobo. Esaki lo no parse un tragedia pa boso, pero den mi mente, na e momentu ei, e tabata debastador. E tabata nifíka ku mi tabata rònt di hende ku mi no tabata konosé. Tabata nifíka ku tur otro hombres jovenens den mi bario tabata bai un otro skol ku ami tabata bai. Den mi mente di 14 aña, mi tabata pensa, “Kon mi mayornan por hasi mi e kos aki?” Mi tabata sinti manera mi bida a wòrdu dañá.
No opstante, dor di e aktividatnan di nos Hombres Jovenen, tabata posibel pa mi konstruí relashonnan ku e otro miembronan di mi quorum, i nan a bin bira mi amigunan. Ademas di esei, miembronan di e obispado i e konseheronan di Saserdosio Aaroniko a bin tuma interes den mi bida. Nan tabata bin na mi enkuentronan deportivo. Nan tabata skibi mi notanan pa fortalesé mi, ku te awe mi ta warda. Nan a sigui komunika ku mi regularmente despues ku mi a bai universidat i tambe ora ku mi a bai ku mishon. Un di nan hasta tabata na aeropuerto ora ku mi a bin kas bèk for di mishon. Lo mi ta semper gradisí na e rumannan ei i nan kombinashon di amor i ekspektashonan haltu. Nan a guia mi den direkshon di shelu i mi bida a bin bira briyante, felis i alegre.
Kon nos, komo mayornan i lídernan, por yuda hobennan sa ku nan no ta nan so, sigun nan ta kana e kaminda di kombenio? Huntu ku konstruí relashonnan personal, nos ta invitá nan na reunionnan grandi i chikí di —di Fortalesa para la Juventud, konferenshanan, kampamentunan di hoben i aktividatnan semanal di quorum òf di klas. Nunka no subestimá e fòrsa ku ta bini dor di para huntu ku otro ku tambe ta purbando di ta fuerte. Obispunan i otro lídernan, porfabor, enfoká riba alimentá e muchanan i hobennan den boso bario. Nan mester di mas di boso tempu, no menos.
No ta importá si bo ta un líder, un bisiña, un miembro di quorum òf simpelmente un Santu, si bo tin un oportunidat di toka bida di un persona yòn, yudé konekta ku shelu. Bo influensha portá nèt e “asistensha di Iglesia” ku e persona yòn ei mester.
Rumannan, mi ta tèstifiká ku JesuCristu ta e kabes di e Iglesia aki. E ta inspirá nos lídernan i guia nos na e nutrishon spiritual ku nos mester pa sobrebibí i floresé den e delaster dianan. E nutrishon spiritual ei lo yuda nos pa ta fiel i no infiel. Den e nòmber di JesuCristu, amèn.